Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.

“Femoʻuekina ʻi he Ngāue Hisitōlia Fakafāmilí,” p. 8: Te ke lava ʻo ʻoange ha puha ke taki taha ʻa e mēmipa ʻo e fāmilí ke teuteuʻi mo ngāue ʻaki ke faʻo ai ʻa e ngaahi laʻi tā, tohinoa, mo ha ngaahi lekooti kehé.

“Ko e Hā ʻa e Meʻa Foʻou ʻi he Fakalakalaka Fakatāutahá?”, p. 34, mo e “Ko e Lakanga Taulaʻeiki Faka-ʻĒloné—ʻOku Lahi Ange ʻi he Meʻa Naʻá ke Fakakaukau Ki Aí,” p. 37: ʻOku poupouʻi ʻe he ongo polokalama foʻou ʻo e Fakalakalaka Fakatāutahá mo e Fatongia ki he ʻOtuá ʻa e toʻu tupú ke nau fakalaulauloto mo vahevahe ʻa e meʻa naʻa nau akó. Kapau ʻoku ʻi ai haʻo fānau toʻu tupu, te ke lava ʻo kole ke nau palani ha efiafi fakafāmili ʻi ʻapi ʻo makatuʻunga ʻi he ʻekitivitī ʻi he Fatongia ki he ʻOtuá pe ko e Fakalakalaka Fakatāutahá ʻa ia kuo nau toki fakakakató.

“Te u Fakatoka Fēfē ha Fakavaʻe Fakalaumālie?”, p. 62: Faʻo ha fanga kiʻi foʻi maka ʻi ha hina ʻoku ʻikai lava ke hū ki ai ha vai. Faʻo ha ʻoneʻone ʻi ha foʻi hina ʻe taha. Kumi ha ongo kiʻi meʻa te na fakafofongaʻi ha ongo fale. Tuku ʻa e “fale” ʻe taha ʻi he makamaká pea taha ʻi he ʻoneʻoné. Pea fakafonu leva ʻa e hina takitaha ʻaki ʻa e vaí. Ko e “fale” ʻi he ʻoneʻoné ʻe ngoto ia, ka ʻe tuʻu maʻu pē ʻa e “fale” ʻi he makamaká. Fealeaʻaki ki he anga hono fakafaingamālieʻi kitautolu ʻe he makatuʻunga fakalaumālie ʻoku mālohí ke tau katakiʻi ʻa e ngaahi matangi mālohi ʻo e moʻuí (vakai Hilamani 5:12).

Ko e Ngaahi Lēsoni Naʻe Akoʻi ʻe ha Kiʻi Kulī

ʻI he taimi naʻe kei iiki ai ʻema fānaú, naʻá ku ʻave kinautolu ki ha falekoloa fakatauʻanga ʻo e fanga monumanu ʻa e fanga manu lalatá (pet store) ke ngāue ʻaki ha kūponi ke maʻu mai ha kiʻi ika taʻe totongi. Hili ha houa ʻe ua mei ai kuo mau foki mai mo ha kiʻi kulī, ʻa ia naʻe fakatau ʻaki ʻa e silini pē ʻa e fānaú. ʻI he pō ko iá naʻa mau tuku ʻa e kiʻi kulií ʻi he loki foó ke mohe ai. ʻI he pongipongi haké naʻe maveuveu ʻa e lokí. Naʻe tuku ki he fānaú ke nau fakamaʻa, ka naʻa nau ongoʻi ko e fuʻu ngāue lahi. Naʻa nau tangi, “Heʻikai te mau lava!”

ʻI he pō ko iá naʻa mau fakahoko ha efiafi fakafāmili ʻi ʻapi ʻo fekauʻaki mo e ngaahi nunuʻá. Naʻe pehē ange ʻe heʻenau tamaí, “ ʻI he taimi naʻa mou fakatau ai ʻa e kulií, naʻe ʻikai te mou fakakaukau ki hono ngaahi nunuʻá. ʻI he taimi ní kuo hoko ʻa e kulií ko e konga hotau fāmilí, pea kuo pau ke mou tokangaʻi mo tauhi ia.” Naʻa mau aleaʻi ʻa e anga ʻo e muimui mai ʻo e ngaahi nunuʻá ʻi he ngaahi fili ʻoku mau faí, peá ma fakalotolahiʻi kinautolu ke nau fai maʻu pē ʻa e fili ʻoku totonú.

Naʻe toki mālōloó ni ʻa e kulií hili ʻene hoko ko e konga ʻo homau fāmilí ʻi ha taʻu ʻe 14, ka ʻe kei nofo maʻu pē mo kimautolu ʻa e ngaahi lēsoni mahuʻinga ne tokoni ke akoʻi mai kiate kimautolú.

Sila Kalānite, Vikatōlia, ʻAositelēlia