Ko e Meʻa ʻOku Tau Tui Ki Aí
ʻOku Akonaki ʻAki mo Fakamoʻoni ʻa e Folofolá kia Sīsū Kalaisi
ʻOku ʻi he folofolá ʻa e akonaki mei he kau palōfitá, ngaahi fakamatala fakalaumālie ki he fengāueʻaki ʻa e ʻOtuá mo e kakaí, mo e ngaahi fakahā mei he ʻOtuá ki Heʻene kau palōfitá. ʻOku akoʻi ʻe he folofolá ko e fānau kitautolu ʻa ʻetau Tamai Hēvaní, ʻa ia ʻokú Ne ʻofa ʻiate kitautolu. Ko e konga ia ʻo ʻEne palani maʻa ʻetau fiefia taʻengatá ke tau haʻu ki he māmaní. Lolotonga ʻetau ʻi hení, ʻoku hoko ʻa e folofolá ko ha fehokotakiʻanga fakalaumālie ki heʻetau Tamai Hēvaní mo Sīsū Kalaisi.
Ko e tefitoʻi taumuʻa ʻo e folofolá ke fakamoʻoniʻi ʻa Kalaisi, tokoniʻi kitautolu ke tau haʻu kiate Ia ʻo maʻu ʻa e moʻui taʻengatá (vakai, Sione 5:39). Ko ia ʻoku faleʻi ai kitautolu ʻe he kau palōfita ʻo e ngaahi ʻaho kimui ní ke tau ako fakaʻaho e folofolá, fakafoʻituitui pea mo fakafāmili. Naʻe pehē ʻe Palesiteni Tōmasi S. Monisoni: “[Kau ʻi hono] ako fakaʻaho ʻo e folofolá. Ko hono toki akoʻi fakaʻangataha hake pē iá, ʻoku ʻikai tatau hono ʻaongá mo hono lau fakakongokonga mo fakahoko fakaʻaho ia ʻi heʻetau moʻuí. Feinga ke maheni mo e ngaahi lēsoni ʻoku akoʻi mai ʻe he folofolá. … Ako kinautolu ʻo hangē pē ʻoku nau lea fakahangatonu atu kiate koé, he ko hono moʻoní ia.”1
ʻOku tau lava ke ʻiloʻi mo ʻofa ʻi heʻetau Tamai Hēvaní mo e Fakamoʻui ko Sīsū Kalaisí ʻo fakafou ʻi he ngaahi fakalea ʻo e folofolá. ʻOku lava ke tau lau ʻEna ngaahi fekaú, pea ʻoku tupu mei ai ʻa ʻetau lava ʻo ako ke tala ʻa e faikehekehe ʻo e meʻa ʻoku totonú mo ia ʻoku halá. ʻOku tau maʻu ʻa e mālohi ke matuʻuaki ʻa e ʻahiʻahi ke tau faiangahalá. ʻOku tau fakatupulaki ai ʻa e holi ke talangofua ki he ngaahi fono ʻa e ʻOtuá. ʻOku fakafiemālieʻi mo akonekina kitautolu ʻe he ngaahi folofolá lolotonga ʻetau ʻi he māmaní, pea ʻoku nau fakahā mai ʻa e hala ke tau foki ai ki hotau ʻapi fakalangí.
ʻOku tali ʻe he Kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi tohi ko ʻení ko e folofola:
-
Ko e Tohi Tapú ko hano tānaki fakataha ia ʻo ha ngaahi meʻa toputapu kuo tohi ʻa ia ʻoku ʻi ai e ngaahi fakahā ʻa e ʻOtuá ki he kau palōfita ʻo e kuonga muʻá ʻi he Fonua Tapú. ʻOku pehē ʻe heʻetau tefito ʻo e tui hono valú, “ ʻOku mau tui ko e Tohi Tapú ko e folofola ia ʻa e ʻOtuá ʻi he ngaahi meʻa pē kuo liliu totonú.”
-
Ko e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi, ʻa ia ʻoku ʻi ai e ngaahi fakahā ʻa e ʻOtuá ki he kau palōfita ʻo e kuonga muʻá ʻi he ongo ʻAmeliká. ʻOku ʻi ai ʻa hono kakato ʻo e ongoongolelei ʻo Sīsū Kalaisí (vakai, T&F 20:9).
-
Ko e Tokāteline mo e Ngaahi Fuakavá ko ha tohi ia ʻo e ngaahi fakahā fekauʻaki mo hono Toe Fakafoki Mai ʻo e ongoongolelei ʻo Sīsū Kalaisí, ʻa ia ʻoku foaki ki he kau palōfita ʻo onopōní ʻo kamata pē meia Siosefa Sāmita.
-
Ko e Mataʻitofe Mahuʻingá ʻa ia ʻoku ʻi ai mo e ngaahi fakahā kehe mei he ʻOtuá kia Mōsese, ʻĒpalahame, mo Siosefa Sāmita.
-
ʻOku kei hokohoko mai pē hono fakahā ʻe he ʻOtuá ʻa e ngaahi moʻoní ki he kau palōfita moʻuí ʻo fakafou ʻi he ueʻi ʻa e Laumālie Māʻoniʻoní. ʻOku lau e ngaahi moʻoni ko ʻení ko e folofola (vakai, T&F 68:4). ʻOku ʻomi ia kiate kitautolu ʻo fakafou mai ʻi he konifelenisi lahi ʻoku fakahoko ʻi he fakaʻosinga ʻo e ʻuluaki uiké ʻi ʻEpeleli mo ʻOkatopa, ʻa ia ʻoku fanongo ai ʻa e kāingalotu ʻi he māmaní kotoa ki he ngaahi lea mei hotau palōfitá mo e kau taki kehe ʻo e Siasí.
Takai fakatoʻomataʻu mei he tafaʻaki toʻohema taupotu taha ki ʻolungá: tā fakatātaaʻi ʻo e ʻatá ʻe Derek Israelsen © 2002; Ko Kalaisi ʻi Ketisemani, tā ʻe Harry Anderson © IRI; Ko e Kau Toluʻi Nīfaí, tā ʻe Gary Kapp © 1996 IRI; Ko e Hā ʻa Sīsū Kalaisi ki he Palōfita ko Siosefa Sāmitá mo ʻŌliva Kautele, tā ʻe Walter Rane, ʻi he angalelei ʻa e Musiume Hisitōlia ʻo e Siasí; Ko e ʻUluaki Mata Meʻa-Hā-Maí, tā ʻe Del Parson © 1987 IRI; faitā ʻa Craig Dimond © IRI; tā fakatātaaʻi ʻo e ʻatá ʻe Christina Smith © IRI