Ko e Lakanga Taulaʻeiki Faka-ʻĒloné—Maʻongoʻonga Ange ʻi He Meʻa ʻOkú ke Fakaʻuta Ki Aí
Ko ha Pōpoaki fekauʻaki mo e Fatongia ki he ʻOtuá
ʻI he taʻu ʻe fā kuo hilí ne u kau atu ki hono malangaʻi ʻo e meʻafakaʻeiki ʻo hoku tokoua ko Keulí. Naʻe fakalāngilangiʻi lahi hoku tokouá ʻe ha taha ʻo e kau leá. Talu mei ai mo ʻeku nofo pē ʻo fakakaukau ki ai. Naʻá ne pehē, “Ko ha tangata maʻu lakanga fakataulaʻeiki ʻa Keuli. … Naʻe mahino kiate ia ʻa e lakanga fakataulaʻeikí, fakaʻapaʻapaʻi e lakanga fakataulaʻeikí, pea naʻá ne tali kakato ʻa e lakanga fakataulaʻeikí mo hono ngaahi tefitoʻi moʻoní.”
ʻI he taimi ne mālōlō ai hoku tokouá, naʻá ne hoko ko ha taulaʻeiki lahi ʻi he Lakanga Taulaʻeiki Faka-Melekisētekí, pea naʻá ne ngāue ʻi he lakanga fakataulaʻeikí ʻi ha taʻu ʻe 50. Ko ha husepāniti mo ha tamai ʻofa ʻa Keuli ʻa ia naʻá ne lavaʻi fakalāngilangi ʻene ngāue fakafaifekau taimi kakató, mali ʻi he temipalé, fua totonu hono ngaahi uiuiʻi ʻi he lakanga fakataulaʻeikí, pea ngāue tōtōivi ʻi heʻene hoko ko e faiako fakaʻapí.
Ko ha tokotaha maʻu Lakanga Taulaʻeiki Faka-ʻĒlone koe. Ko e toki kamata ʻeni hoʻo ngāue ʻi he lakanga fakataulaʻeikí. Mahalo kuo teʻeki ke ke aʻusia ha ʻaho ʻe 50 ʻo haʻo ngāue ʻi he lakanga fakataulaʻeikí. Ka ʻe lava pē ke ke moʻui taau ke maʻu ʻa e fakalāngilangi naʻe maʻu ʻe Keulí. Ko hono moʻoní, ʻoku totonu ke ke taau mo e fakalāngilangi ko iá. Kuo uiuiʻi koe ʻe he ʻEikí ki ha ngāue fakaofo, pea ʻokú Ne ʻamanaki mai te ke hoko ko ha tangata ʻo e lakanga fakataulaʻeikí.
Ko e Maʻongoʻonga ʻo e Lakanga Taulaʻeiki Faka-ʻĒloné
Fakakaukau angé ki he maʻongoʻonga ʻo e Lakanga Taulaʻeiki Faka-ʻĒlone ʻokú ke maʻú:
-
Ne fekauʻi mai ʻe he ʻEikí ʻa Sione Papitaiso kuo toetuʻú ke fakafoki mai ʻa e Lakanga Taulaʻeiki Faka-ʻĒloné. ʻI he taimi naʻe foaki ai ʻe Sione ʻa e lakanga fakataulaʻeiki ko ʻení kia Siosefa Sāmita mo ʻŌliva Kautelé, naʻá ne ui kinaua ko hono “ongo kaungā-tamaioʻeiki” (T&F 13:1). Ne fakamahinoʻi mai ʻe Palesiteni Kōtoni B. Hingikelī (1910–2008) naʻe “ ʻikai ke fokotuʻu ʻe [Sione] ia ke ne māʻolunga ange ʻia Siosefa mo ʻŌliva. Naʻá ne fokotuʻu ia ke nau tuʻunga tatau pē ʻi heʻene ui kinaua ko hono ongo kaungā-tamaioʻeikí.’” Ne hoko atu e lea ʻa Palesiteni Hingikelií ʻo pehē ʻoku lava foki ke hoko ha tīkoni taʻu 12 ko ha kaungā-tamaioʻeiki ʻo Sione.1
-
“ ʻOku maʻu ʻe he Lakanga Taulaʻeiki Faka-ʻĒloné ʻa e kī ʻo e tauhi mai ʻa e kau ʻāngeló (vakai, T&F 13:1). ʻI hoʻo moʻui angatonu mo ngāue fakamātoató, te ke lava ke maʻu e tauhi mai ʻa e kau ʻāngeló ke tataki mo fakamālohia koe. ʻI hoʻo ngāue ki he sākalamēnití, te ke lava ʻo tokoni ai ki he niʻihi kehé ke nau maʻu ʻa e tāpuaki ko ʻení.2
-
ʻOku “maʻu [ʻe he Lakanga Taulaʻeiki Faka-ʻĒloné] ʻa e ngaahi kī ʻo e … ongoongolelei ʻo e fakatomalá, pea mo e papitaiso ʻi he fakauku ke fakamolemole ʻa e ngaahi angahalá” (T&F 13:1). ʻOku fakataha ʻa e fakatomalá mo e papitaisó ke faʻu ʻa e matapā ko ia ʻoku hū atu ai e kakaí ke kamata ʻi he hala ki he moʻui taʻengatá (vakai, 2 Nīfai 31:17–18). ʻI hoʻo ngāue ʻo fakatatau mo e fakahinohino ʻa hoʻo kau taki lakanga fakataulaʻeikí, te ke lava ʻo tokoniʻi ai e kakaí ke nau fakaava ʻa e matapaá ni.
-
ʻOku kau ʻi he Lakanga Taulaʻeiki Faka-ʻĒloné ʻa e mafai ko ia ke ngāue ki he sākalamēnití. ʻI hoʻo teuteuʻi, tāpuakiʻi, pe tufa ʻa e sākalamēnití, ʻokú ke fakafofongaʻi ai ʻa Sīsū Kalaisi (vakai, 3 Nīfai 18:1–12). ʻOkú ke tokoni ki he kau mēmipa ʻo ho fāmilí ke nau manatu kiate Ia, fakafoʻou ʻenau ngaahi fuakavá, mo taau ke maʻu e takaua ʻa e Laumālie Māʻoniʻoní.
ʻOku fie maʻu ke ngāueʻi e ngaahi faingamālie pehení ʻe he kau tangata maʻu lakanga fakataulaʻeikí—ha kau tangata ʻoku nau mālohi fakalaumālie mo fakahoko honau ngaahi fatongia fakataulaʻeikí.
Tohi Foʻou ʻo e Fatongia ki he ʻOtuá
ʻOku ʻi ai ha maʻuʻanga tokoni kuo teuteuʻi ʻo fakatatau mo e fakahinohino ʻa hotau kau palōfita moʻuí, ke tokoniʻi koe ke ke hoko ko ha tangata ʻo e lakanga fakataulaʻeikí. Neongo ʻoku foʻou ʻa e maʻuʻanga tokoní, ka ko e hingoa pē ʻokú ke maheni mo ia: Fatongia ki he ʻOtuá.
ʻOku ou fiefia ʻi he tohi foʻou ʻo e Fatongia ki he ʻOtuá. Te ne lava ʻo tokoniʻi koe ke ke talangofua ki he fekau ʻa e ʻEikí ke ke “akó ni ʻo ʻilo [ho] fatongiá” pea “ngāue ʻi he lakanga kuo fakanofo [koe] ki aí, ʻi he faivelenga kakato” (T&F 107:99).
ʻI hoʻo fakaʻaongaʻi e tohí ko ha tīkoni, akonaki, mo ha taulaʻeikí, te ke kau ai ʻi ha ngaahi ʻekitivitī ʻoku faʻahinga ʻe ua: ko e mālohi fakalaumālie mo e ngaahi fatongia ʻo e lakanga fakataulaʻeikí.
Ko ha Sīpinga ke Hoko Ki Ai
ʻOku muimui ʻa e ʻekitivitī takitaha ʻi he tohi Fatongia ki he ʻOtuá ʻi ha sīpinga ʻe tokoniʻi ai koe ke ke hoko ko e tokotaha maʻu lakanga fakataulaʻeiki ʻoku fie maʻu ʻe he ʻEikí: ʻUluakí, ʻokú ke ako ki ha tefitoʻi moʻoni ʻo e ongoongoleleí pe ko ha fatongia ʻo e lakanga fakataulaʻeikí. Hili iá peá ke ngāueʻi ʻa e meʻa naʻá ke ako ʻo ʻiló. Fakaʻosí, ʻokú ke vahevahe mo ha niʻihi kehe ʻa hoʻo ngaahi fakakaukaú mo hoʻo ngaahi ongo fekauʻaki mo e meʻa kuó ke ako mo aʻusiá. Ko e niʻihi ʻo e ngaahi ʻekitivitī ko ʻení ko ha ngaahi ʻekitivitī fakatāutaha. ʻE lava ke fulifulihi mo e ngaahi ʻekitivitī kehe maʻa hoʻomou kōlomú kotoa ke fakaʻaongaʻi ʻi he ngaahi lēsoni ʻo e ʻaho Sāpaté pe ʻi he ngaahi ʻekitivitī lolotonga ʻo e uiké.
ʻOku fakaʻaliʻali ʻe he fakatātā mei he tohí he peesi 39 ʻa e founga hono ngāue ʻaki ʻo e sīpinga ko ʻení. Ko e ngaahi fakamatala ʻeni mei ha kau talavou kuo lahi e ngaahi meʻa kuo nau aʻusia ʻi heʻenau ngāue ki he tohi foʻoú.
Ko ha Tangata ʻo e Lakanga Fakataulaʻeikí
ʻI he taimi ʻoku ou fakakaukau ai ki he kupuʻi lea ko e “tangata ʻo e lakanga fakataulaʻeikí,” ko e meʻa mahino pē ʻeku fakakaukau ki hoku tokoua ko Keulí. Ka ʻoku ou toe fakakaukau pē foki ki ha niʻihi kehe. ʻOku ou fakakaukau kia Palesiteni Tōmasi S. Monisoni ʻi heʻene kei tīkoní, ʻene ongoʻi naʻá ne tuʻu ʻi ha potu toputapu ʻi heʻene tokoniʻi ha tangata naʻe faingataʻaʻia fakaesino ke ne maʻu e sākalamēnití.3 ʻOku ou fakakaukau kia Sione Papitaiso, ko ha tokotaha maʻu Lakanga Taulaʻeiki Faka-ʻĒlone maʻongoʻonga naʻá ne teuteuʻi e halá ki he ngāue fakafaifekau ʻa e Fakamoʻuí ʻi he māmaní ʻaki ʻene akonaki, fakamoʻoni, mo fakahoko e ouau toputapu ʻo e papitaisó. Pea ʻoku ou fakakaukau atu kiate kimoutolu. ʻI he tupulaki ho mālohi fakalaumālié peá ke tokoniʻi e kakai kehé ke nau haʻu kia Kalaisi ʻo fakafou ʻi hoʻo ngāue ʻi he lakanga fakataulaʻeikí, ʻokú ke hoko moʻoni ko e tangata ʻo e lakanga fakataulaʻeikí.
Tā fakatātaaʻi ʻo e ʻatá ʻe Craig Dimond
Tā fakatātaaʻi ʻo e ʻatá ʻe Steve Bunderson © 2000; faitā ʻa John Luke © IRI