Ko e Kau ʻi he Ngāue Hisitōlia Fakafāmilí

Mahalo ko koe toko taha pē ʻi homou fāmilí ʻoku kau ki he Siasí pea ʻokú ke foʻou ki he ngāue hisitōlia fakafāmilí. Pe mahalo kuo ʻosi fai ʻe ha niʻihi ia ʻi ho fāmilí ha konga lahi ʻo e hisitōlia fakafāmilí mo e ngāue fakatemipale maʻa hoʻo ngaahi kuí. Ko e hā pē ho tūkungá, ʻoku kei lahi pē ʻa e ngaahi founga ʻe lava ke ke tokoni ai ki he ngāue mahuʻingá ni.

Kapau ʻoku ʻikai te ke fakapapauʻi e meʻa te ke kamata aí, kamata ʻaki pē ʻa e meʻa ʻokú ke ʻiloʻi lelei tahá: ʻa koe. He ʻoku ʻikai ʻuhinga ʻataʻatā pē e hisitōlia fakafāmilí ki ho ngaahi ʻofaʻanga kuo nau pekiá. ʻOku ʻuhinga foki ia ki hoʻo maʻu ho hisitōlia fakafāmilí lolotonga hoʻo moʻuí. Ko ha ngaahi founga ʻeni ʻe lava ke ke kamata ʻaki:

Kumi ha puha feʻunga ʻoku malu ki he tauhiʻanga meʻa fakapepá pea faʻo ai hoʻo ngaahi lekooti ʻoku mahuʻingá: ho tohi taʻú, ʻū tohi fakamoʻoni fakaakó, ngaahi fakalāngilangí, ngaahi tohinoá, ʻū tā—ha meʻa pē ʻokú ne fakafofongaʻi hoʻo moʻuí.
Kapau ʻoku ʻi ai ha mīsini hiki tatau te ke lava ʻo fakaʻaongaʻi peá ke faitaaʻi (scan) hoʻo ngaahi laʻitā motuʻá ke maʻu ha ngaahi tatau ʻo e ʻū tā ʻoku mahuʻingá.
Tauhi ha tohinoa ʻoku hiki ai hoʻo ngaahi fakakaukau fakalaumālié, ngaahi ongó, mo e ngaahi meʻa ʻoku hoko ʻi hoʻo moʻuí.
ʻInitaviu e kau mēmipa ho fāmilí ke hiki ha lekooti ʻo e ngaahi hisitōlia ʻo ʻenau moʻuí. Kamata mei ho kāinga taʻu motuʻa taha ʻoku kei moʻuí. Fai e ngaahi fehuʻi hangē ko ʻení: Naʻá ke maʻu fēfē ho hingoá? Ko e hā hoʻomou ngaahi tukufakaholo fakafāmili ʻi he taimi naʻá ke kei siʻi aí mo e konga mai kimui ʻo hoʻo moʻuí? Ko e hā ha meʻa te ke lava ʻo talamai fekauʻaki mo e ngaahi talēniti pe ʻulungāanga makehe ʻo ho fāmilí? ʻE hoko hono fakatahatahaʻi ʻo e ngaahi hisitōlia ʻo e niʻihi kehé ko ha koloa fakafāmili maʻá e ngaahi toʻu tangata hoko maí.
Lesisita haʻo ʻakauni ʻi he www.New.FamilySearch.org pea fakahū e ngaahi fakamatala fakatohihohoko ʻokú ke maʻu kau kiate koe mo e kau mēmipa ho fāmilí. ʻE tokoni atu e ngaahi fakahinohino ʻi he ʻInitanetí mei he sitepu ki he sitepu.
Kapau ʻe lava peá ke ʻalu ki he temipalé ʻo fakahoko e ngaahi ouau maʻa hoʻo ngaahi kuí.

Kapau ʻoku ʻi ai haʻo ngaahi fehuʻi fekauʻaki mo e ngāue ki he hisitōlia fakafāmilí, ʻe lava ke tokoni atu hoʻo faifaleʻi ʻi he hisitōlia fakafāmilí ʻi ho uōtí pe koló.