Manavasiʻi ke Liliu
Hili haʻaku fai ha fehuʻi ki he ʻOtuá, ne u maʻu ʻa e lototoʻa ne u fie maʻú.
Ne u tupu hake ko ha Kalisitiane. Neongo ne ʻikai ke tui fakalotu hoku fāmilí, ka naʻe akoʻi maʻu pē au ʻe heʻeku tamaí ke u fai e meʻa ʻoku ou ʻilo ʻoku totonú.
ʻI hoku taʻu hongofulu tupú ne u foua ha ngaahi ʻahiʻahi lahi. Ne hoko hono tafa hoku tuʻá, vete mali ʻeku ongomātuʻá, puke ʻa ʻeku faʻeé, pea mo hono tokangaʻi ʻa hoku kiʻi tuofefiné ko ha meʻa ia ke u ʻiteʻita mo fakataʻetaʻetui ai. Ka ʻi ha ngaahi māhina siʻi pea hoko hoku taʻu 15, ne u fetaulaki ai mo ha ongo faifekau. Ne akoʻi mai ʻe ʻEletā Sionisoni mo ʻEletā Setiuiki ʻa e ongoongoleleí.
Naʻá ku lau e Tohi ʻa Molomoná, ka naʻe ʻikai ke u fie fakahoko e ngaahi liliu ne kole mai ʻe he ongo ʻeletaá. Naʻá ku talaange ne fuʻu lahi e ngaahi liliú peá u mei talaange ke tukunoaʻi au. Naʻá ku sio hake ʻi heʻeku lea ʻaki e ngaahi lea ko iá peá u sio atu ki he mata ʻo ʻEletā Setiuikí. Ne tafe hifo ha loʻimata ʻi hono kouʻahé, pea kuo teʻeki ke u ongoʻi mā pehē. Naʻá ku talaange te u toki tā ange he ʻaho hokó.
Ne u foki ki ʻapi mei he lotú peá u fakaʻosi ʻeku fuofua lau e Tohi ʻa Molomoná. Ne u tūʻulutui, ʻa ia ne teʻeki ke u fai pehē kimuʻa, ʻo fehuʻi ki he ʻOtuá pe ʻoku moʻoni. Ne teʻeki ke u fai ha fehuʻi ki he ʻOtuá kimuʻa. Ne u manavasiʻi ke liliu. Hili ʻeku pehē “ ʻēmení,” ne u ongoʻi ha nonga mo ha fiemālie. Naʻá ku ʻiloʻi ʻoku ʻi ai haʻaku Tamai Hēvani ʻoku ʻofa ʻiate au, naʻá ku ʻiloʻi ʻoku moʻoni e Tohi ʻa Molomoná peá u ʻiloʻi te u lava ʻo liliu.
Ne u papitaiso hili pē ha ʻaho ʻe hongofulu. Ne omi ʻeku ongomātuʻá ki hoku papitaisó. Neongo ko au pē ʻi hoku fāmilí ʻoku kau ki he Siasí, ʻoku ou tui ʻe ʻi ai e ʻaho te nau tūʻulutui mo kinautolu ʻo fehuʻi ki he ʻOtuá. ʻOku ou lolotonga lau e Tohi ʻa Molomoná pea ko hono tuʻo valú ia, ʻoku kei fakaofo pē ʻo hangē ko e fuofua taimí. ʻoku ou ʻilo ʻoku moʻoni e Tohi ʻa Molomoná. ʻOkú ne maʻu e mālohi ke liliu e kakaí.