ʻOku faingataʻa ki hoku tokouá ke fakapapauʻi pe ʻoku moʻoni koā e Siasí. ʻE lava fēfē ke u tokoni kiate ia?
Poupouʻi ia; ʻokú ne fie maʻu ke ne ongoʻi ʻa e ʻofá—kae ʻikai ke lōmekina—mei hono fāmilí. Fakakaukau ke ke fehuʻi ange ʻa e ngaahi meʻa ʻokú ne hohaʻa mo taʻepauʻia aí. Tuku ke ne talaatu ke ʻosi e ngaahi meʻa ʻokú ne tokanga ki aí pea toki fai haʻo tali. Mahalo ko e ngaahi meʻa fakasōsiale pe fakatāutaha pē ʻoku hohaʻa ia ki aí, kae ʻikai makatuʻunga ʻi he tuí. He ʻikai te ke maʻu kotoa e tali ʻokú ne fie maʻú, ka te ke lava ʻo fakahā ange ʻe lava ke maʻu ha ngaahi founga ke fakaleleiʻi ʻaki.
Kole ange ke mo lotua e ngaahi meʻa ʻoku hohaʻa ki aí pea fakalotolahiʻi ke ne lotua fakatāutaha foki ia. ʻIloʻi ʻe taimi lōloa ange ki he niʻihi ʻi ha niʻihi kehe pea nau toki maʻu ha tali, kae tautefito ʻo kapau te nau fie maʻu ke fakakaukauʻi pē ʻe kinautolu e ngaahi meʻa ko iá. ʻE lava ke ke laukonga mo ia ʻo kau ki he lotú mo hono maʻu ʻo ha fakamoʻoní mei he ʻAlamā 32, 3 Nīfai 17, pe Molonai 10. ʻE lava foki ke ke fakalotolahiʻi ia ke talanoa mo hoʻo ongomātuʻá, mo hoʻo pīsopé pe palesiteni fakakoló, pe kāingalotu faivelenga kehe ʻo e Siasí kuo nau fakaleleiʻi ha ngaahi meʻa tatau ne nau hohaʻa ki ai.
Fai hoʻo fakamoʻoní kiate ia ʻi hano ueʻi koe ʻe he Laumālié. ʻAi ke ne ʻiloʻi e ongo ʻokú ke maʻu ki he ongoongoleleí.
Fakaʻosí, kae ʻikai ko e siʻi tahá, manatuʻi ko e Laumālié ʻokú ne fakamoʻoniʻi ʻa e moʻoní. Ke maʻu ʻe ho tokouá ha fakamoʻoni pe ke ne ʻiloʻi kuo ʻosi ʻi ai ʻene fakamoʻoni, kuo pau ke ne ako ke ʻiloʻi e Laumālie Māʻoniʻoní. Mahalo ʻe taimi lōloa ʻeni, pea he ʻikai lava ke fakamālohiʻi ia. Te ke lava ʻo fakamatala ki ai ʻa e ngaahi moʻoniʻi meʻá ʻi he ʻaho kakato, ka ko haʻane toki fehokotaki pē mo e Laumālié peá ne maʻu ha fakamoʻoni.
Lotua pea fakalotolahiʻi ia, poupouʻi mo fakafanongo kiate ia, ka ke manatu ʻokú ne tauʻatāina pe ke fili. ʻE fakapotopoto taha pē ʻene filí ʻo ka ne muimui ʻi he fakahinohino ʻa e Laumālié.
Tokoniʻi ʻa kinautolu ʻokú ke ʻofa aí ke maʻu haʻanau fakamoʻoni ʻaki haʻo lau mei he folofolá pea akoʻi kiate kinautolu ʻa e founga ke ʻiloʻi ai ʻa e fakamoʻoni ʻa e Laumālie Māʻoniʻoní.