Telefoni ki Hoʻo Ongo Faiako Fakaʻapí
Taiana Lōsiki, Penisolovēnia, USA
ʻI he ngaahi taʻu lahi kuo hilí ʻi he kei iiki ʻema fānau ʻe toko faá, naʻe ʻalu hoku husepānití ʻo ngāue ʻi ha siteiti ʻe taha ka u nofo pē kae ʻoua kuo ʻosi e ako ʻema ongo tamaiki lalahí ʻi he taʻu ko iá. Naʻe toki vahe mai pē ʻema ongo faiako fakaʻapi foʻou kimuí ni mai, pea naʻe tuʻo ua pē ʻena ʻaʻahi ange pea toki hiki hoku husepānití.
Hili ʻeku fakamohe e fānaú he pō ʻe taha, ne u fanongo ki he tangi ʻema kiʻi pēpē fefiné ʻi hono lokí. ʻI heʻeku fua hake iá, ne u fakatokangaʻi naʻe mofi. Ne u fakakaukau ke ʻave ki falemahaki, ka ʻi heʻeku sio fakavave hifo ki heʻemau tuʻutuʻuni maluʻi foʻoú, naʻe ʻaonga pē ia kiate kinautolu naʻe nofo ʻi ʻAitahoó—ʻa e siteiti ko ia ʻoku ngāue ai hoku husepānití he taimi ní. Ko hono toenga ʻo kimautolú naʻe kei lau pē ia ʻoku mau nofo ʻi Uasingatoni.
Naʻe fakaʻau ke u hohaʻa ʻi heʻeku fua e mofi ʻo ʻema tama fefiné—naʻe tikilī Fālenihaiti ʻe 105 (tikilī S. ʻe 41). Ne u tūʻulutui hifo he taimi pē ko iá ʻo lotu mo kole tokoni fakamātoato. Ne u maʻu ha tali ʻa ia naʻe ʻikai pē ke u mei fakakaukau au ki ai: “Telefoni ki hoʻo ongo faiako fakaʻapí.”
Kuo fakaʻau ke fuoloa e poʻulí, pea ne u ʻiloʻi fakapapau kuo ʻosi mohe ʻa e ongo tangatá, ʻa Misa Halavasoni mo Misa Peeti. Ka naʻá ku toʻo pē ʻa e telefoní ʻo tā kia Misa Peeti mo fakahā fakavavevave ki ai e meʻa naʻe hokó. ʻI he ʻosi pē ha miniti ʻe nima mei ai, ʻa ia ko e taimi 11 ia, kuo ʻosi tuʻu ʻeku ongo faiako fakaʻapí ʻi he matapā ʻi muʻá—ʻokú na suti mo hēkesi.
ʻI he taimi ia ko ʻení kuo ʻosi kula e ongo kouʻahe mo e mata ʻo ʻema kiʻi pēpeé, pea viviku hono louʻulú he pupuhá. Naʻá ne ngīngī pē heʻene mamahiʻiá, ka naʻe mokomoko pē ʻa Misa Peeti mo Halavasoni ʻi heʻena fua hake iá. Naʻá na hili leva hona nimá ʻi hono ʻulú ʻo foaki hono tāpuaki mo fakahā ange ʻi he huafa ʻo e Fakamoʻuí te ne moʻui.
ʻI heʻeku ʻāʻā hake hili e faingāué, naʻe ʻikai ke u meimei tui ki he meʻa naʻá ku mamata ki aí. Naʻe kata mo fute holo ʻeku kiʻi taʻahiné ke tuku ia ki lalo ke vaʻinga. Kuo ʻosi hono mofí!
ʻI heʻemau ofo hono siofi ʻeku tamá, naʻe pehē mai ʻe Misa Peeti, “Naʻe lava pē ke u tala ʻa ʻene fakaʻau ke mokomokó ʻi he taimi naʻá ma faingāue aí.” Taimi siʻi pē peá na ō, kau ʻā pē ʻi ha ngaahi houa lahi mo e kiʻi pēpē ko ʻeni naʻe fie ʻā pē ia ʻo vaʻingá. Naʻe ʻikai ke u tokanga au ki ai.
Kuo ʻosi atu ha ngaahi taʻu lahi mei he pō ko ia naʻe ō mai ai ha ongo ʻāngelo ʻi he fōtunga ʻo ha ongo faiako fakaʻapi ʻo faingāue ki heʻeku tamá. ʻIkai fuoloa mei ai ne mau hiki ki ʻAitahō pea ʻikai ke mau toe felōngoaki mo kinaua, ka te u fakamālō maʻu pē ko ha ongo faiako fakaʻapi naʻá na ō ange he taimi hongofulu mā tahá ko e fai e fekau ʻa e ʻEikí.