Toʻu Tupú
ʻAka Pasikala ki he Kahaʻú
ʻOku teuteu fakapaʻanga ha kau talavou tokolahi ke nau ngāue fakafaifekau. ʻI ʻAfiliká, ʻoku kau he teuteu ko iá ʻa hono ngāueʻi ʻo ha paʻanga feʻunga ke ʻai ʻaki ha paasipooti. Naʻe ngāueʻi ʻe Setuliki Samipeni ʻa e paʻanga naʻá ne fie maʻú ʻi ha founga mālie: ʻaki ʻene fakatau atu e siainé mei heʻene pasikalá.
ʻOku nofo ʻa Setuliki ʻi Laputa ʻi he Lepupelika Faka-Temokalati ʻo Kongikoó. ʻOkú ne kau he kau talavou ʻe toko 45 ʻi he vahefonua Laputá ʻoku ngāue ke fakahū ha paʻanga ke ʻai ʻaki ʻene paasipōtí ke ʻalu ʻo ngāue fakafaifekau. ʻI he Vahefonua Kongikoó, ʻoku $250 ʻa e totongi ʻo e paasipōtí, ʻa ia ʻoku meimei ko e vahe-tolu ʻe ua ia ʻo e totongi ʻo hano langa ha fale.
Ka ʻoku ʻikai tuka ai ʻa Setuliki ia. Naʻá ne ngāueʻi ʻene paʻanga ngāue fakafaifekaú ʻaki ʻene ʻaka pasikala ʻi ha kilomita ʻe 15–30 (maile ʻe 9–19) mei Laputa ki he tukui kolo īkí, ʻo fakatau siaine mei ai peá ne toe ʻaka pasikala ʻo kolosi mai he hala ʻafu ʻo ʻAfiliká kuo mamafa ʻene pasikalá ʻi hono fakaheka ai e fuaʻiʻakau ke ne fakatau atu ʻi he koló. ʻOkú ne fononga he uike kotoa pē ʻi ha kilomita ʻe 180 (maile ʻe 112) ʻi he hala touʻoné, pea naʻe tuʻo taha pē haʻane tō ko e ʻikai palanisi ʻene utá.
ʻI he ngāué ni, ʻoku maʻu mei ai ʻe Setuliki ha $1.25 he uike, pe $65.00 he taʻu. Naʻe feʻunga mo ha taʻu ʻe fā ʻene tānaki sēniti ke totongi ʻaki ʻene paasipōtí, ka ʻokú ne ʻiloʻi he taimí ni ʻoku kau e ngāue fakafaifekaú ʻi hono kahaʻú he kuo faifai peá ne mateuteu ʻeni ke tali ʻa e ui ke ʻalu ʻo ngāué.