Hotau Ngaahi ʻApí, Hotau Ngaahi Fāmilí
Ko e Mālohi Fakafoʻou ʻo e Lotú
ʻOku ou kei manatuʻi pē ʻa e ongo ne u maʻu ʻi he taimi ne u mamata ai ki he tafe ʻa e loʻimata ʻo e fakatomalá ʻi he fofonga ʻo hoku foha taʻu 10 ko ʻAliané.
Naʻá ne vaʻinga mo hono taʻokete ko Sioelí, ʻa ia naʻe taʻu 12, ʻi he lokimohé, pea fakafokifā pē kuó na fakakikihi, pea naʻe pau ke u taʻofi ʻeni mo fakaleleiʻi. Mahalo ko e tupu ʻena faʻa keé mei hona taʻu motuʻá.
Naʻe ʻikai ke lelei e founga naʻe tali mai ʻaki ʻe ʻAliane kiate aú, pea naʻá ne tetetete mo tangi hili ʻene fekīhiaki mo hono taʻoketé. Ne tuʻo ua ʻeku fakatonutonu ia (ko au ʻeni ia ʻokú ma fakakikihí) ka naʻe fakaʻau pē ke kovi ange. Kuo ʻikai kei lava hano taʻotaʻofi, pea kula hono matá mo ne tetetete. Naʻe kamata ke u ʻita, ka naʻá ku ʻiloʻi kuo pau pē ke ʻi ai ha founga ke fakaleleiʻi ʻaki kae ʻikai ko e kamata ke u kaikailá.
Ne vave ʻeku fakakaukau hake ki he tefitoʻi moʻoni ʻo e lotú. ʻIo, ko e talí ia, ko ia ne u ʻave ia ki hoku lokí, tāpuniʻi e matapaá, peá u pehēange, “ ʻE ʻAliane, ta tūʻulutui, pea te u fai ha lotu ki he Tamai Hēvaní.”
Ne ma fakatou tūʻulutui hifo kae kei hoko atu pē ʻene tangi ʻi heʻene ʻitá. Ne u lotú ko e fakataumuʻa ke tokoniʻi hoku fohá. Lolotonga e lotú ne u fakatokangaʻi ne holo ʻene tangí. Ko e loʻimata ko ia ne tafe hifo ʻi hono ongo kouʻahé he taimi ko ʻení ko e loʻimata ʻo e fakatomala.
ʻI he ʻosi ʻema lotú, naʻe hanga hake ʻa ʻAliane ʻo kole mai, “Tangataʻeiki, fakamolemoleʻi muʻa au?” Ne ma fefāʻofuaʻaki, pea naʻe ʻikai ke u lava ʻo taʻofi hoku loʻimatá. Naʻe fakafonu hoku laumālié ʻe he melino mo e ʻofa. Naʻe ʻikai ke toe lea ʻa ʻAliane, ka ne u ʻiloʻi kuó ne aʻusia ʻa e mālohi fakafoʻou ʻo e lotú pea naʻe hū atu e Laumālie Māʻoniʻoní ki hono lotó
Naʻe ʻikai ngata pē ʻi heʻene ʻilo ki he mālohi ʻo e lotú, ka kuó ne maʻu ha fakamoʻoni ki ai.
Tā fakatātaaʻi ʻo e ʻatá ʻe David Stoker