Ko Hono Vahevahe ʻa e Mā ʻo e Moʻuí
Ko ha ʻaho ʻafu ʻeni ʻi Fosi to ʻIkuasu, ʻi Palana, Palāsila. Naʻá ku fononga ʻi ha ngaahi houa lahi pea naʻá ku ongosia. Ko ha taki au ʻi he Potungāue Ako ʻa e Siasí, pea naʻe ʻi ai ha ngaahi meʻa ke ma talanoa ki ai mo e pīsopé, ʻa ia te ma fetaulaki ki ʻapi siasi. Ka naʻe ʻikai ke ne ʻatā ʻi ha ngaahi miniti siʻi he taimi ne u aʻu atu aí.
Ne hū ange ki he falelotú ha fefine lolotonga ʻeku talitalí. Naʻá ne haʻu ʻo kole mai ha kiʻi sēniti ke fakatau ʻaki haʻane foʻi mā. Naʻá ne talamai ʻokú ne fiekaia mo hono husepānití, pea neongo ʻene mā ke kole maí, ka naʻe ʻikai toe ʻi ai haʻane fili. Naʻá ne toe pehē mai, “Ko e ʻai pē ke fakatau ʻaki ha kiʻi foʻi mā.”
Naʻe ongo ki hoku lotó, peá u toʻo hake ha kiʻi paʻanga siʻisiʻi pē mei hoku kató. Ko e fuʻu meʻa lahi ia ki ai. Ne u talaange, “Fakatau ʻaki ha mā, huʻakau, mo ha kakanoʻi manu.”
Naʻe hounga kiate ia peá ne talamai naʻe ʻosi palōmesi ange ha ngāue ʻa hono husepānití ki he Tūsite hoko maí. Naʻá ne loto ke totongi fakafoki mai ʻeku paʻangá ʻi hono maʻu pē ʻene vahé.
Ne u talaange ʻoku ʻikai fie maʻu ia ke ne toe totongi mai. Naʻá ne talamai ʻe totongi pē.
Ne u pehēange, “ ʻOua te ke toe totongi maí, ka ke toe haʻu ki he falelotu pē ko ʻení ʻi he pongipongi Sāpaté. ʻI hoʻo aʻú mai pē peá ke talaange ki ha taha pē te ke sio ki aí ʻokú ke fie talanoa mo e kau faifekaú. ʻE sai ia?” Naʻá ne loto lelei ki ai.
Naʻe ʻalu e fefiné. Ne u talanoa mo e pīsopé ki he meʻa naʻe fie maʻu ke aleaʻí pea hoko atu ʻeku fononga holo ʻi Palaná ʻo fai ʻeku ngāué.
Ne ʻosi mei ai ha ngaahi māhina lahi, pea toe ʻi ai ʻa e faingamālie ke u ʻalu ai ki ha konifelenisi ʻi he falelotu tatau pē ʻi Fosi to ʻIkuasú. Naʻe fakaʻofoʻofa e kuaeá pea mālie ʻenau hivá. ʻI he ʻosi ʻa e konifelenisí, naʻe lue mai ha taha ʻo e kau kuaeá kiate au. Naʻe mafao mai hono nimá, pea fakafeʻiloaki mai ʻaki ha malimali fakaʻofoʻofa, peá ne lea mai mo e loto māfana, “Mālō ʻaupito. Ne ʻikai ngata pē ʻi hoʻo foaki mai ha mā ke fakamākona ʻaki ʻema fiekaia mo hoku husepānití; ka naʻá ke foaki mai foki mo e mā ʻo e moʻuí. Mālō.”
Ne u ongoʻi ha fiefia lahi ʻi heʻeku fakatokangaʻi ko e fefine ʻeni naʻe kole mai ha kiʻi sēniti ʻi he ngaahi māhina kuo hilí. Ne u ʻiloʻi ʻoku liliu ʻe he ogoongolelei ʻo Sīsū Kalaisí—ʻa ē naʻá Ne pehē ko Ia ʻa e Mā ʻo e Moʻuí—ʻa e moʻui ʻa e tokotaha ʻokú ne tali iá.