ʻOku ou Fakaʻamu ʻe Ui Au ke Ngāue Fakafaifekau?

Fai ʻe Loran Cook

Mahalo pē kuó ke ʻosi fanongo he foʻi hiva Palaimeli ko ia ko e “ ʻOku ou ʻAmanaki ʻe Ui Au Ke u Ngāue Fakafaifekaú.” ʻOku ʻi ai mo ha foʻi hiva mahuʻinga ʻe taha ʻa e fānaú ʻo kau pē ki he ngāue fakafaifekaú. ʻOku pehē ai: “ ʻOku ou ʻamanaki ʻe ui au, Ke ngāue fakafaifekau. Mo mateuteu haʻaku lahi.”¹ ʻOku tui pehē mo ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne pehē, “ ʻOku fie maʻu ke fakatukupaaʻi ʻe he kau talavoú ʻenau moʻuí ʻi heʻenau kei tupu haké ke ō ʻo ngāue fakafaifekau.”²

Neongo ia, ko e ongo meʻa kehekehe pē ʻa hoʻo ʻiloʻi ko ia ʻoku fie maʻu ke ke ngāue fakafaifekaú mo hoʻo ongoʻi kuó ke mateuteu ke ngāue fakafaifekaú. Ko fē te ke kamata mei aí? Ko e ua ʻo e ngaahi meʻa lelei taha ʻe lava ke ke faí ko hono fakamālohia hoʻo fakamoʻoní mo hono ʻiloʻi ʻo e ongoongoleleí. ʻOku ʻoatu ʻi lalo ha ngaahi founga ʻe niʻihi ʻe lava ke ke teuteu ai ki haʻo ngāue fakafaifekau.

1. Tuí

ʻOku fie maʻu ke tau fakatupulaki fakaʻaho ʻetau tuí. Naʻe akonaki ʻa Sīsū Kalaisi ʻo pehē, “Kapau te mou tui kiate au te mou maʻu ʻa e mālohi ke fai ʻa e meʻa kotoa pē ʻoku totonu ke fai ʻiate aú” (Molonai 7:33).

Ako ʻa e folofolá. ʻOku nau akonaki ʻaki mo fakamoʻoni kia Sīsū Kalaisi.
Ngāue ʻaki ʻa e tuí ʻi hono fakalelei ʻo e ngaahi palopalema fakatāutahá. ʻE fakafiemālieʻi koe ʻe hoʻo tui kia Sīsū Kalaisí ʻi he ngaahi taimi ʻo e faingataʻá pea ʻe tokoni ke ke ikunaʻi ʻa e ngaahi faingataʻa kotoa pē.
Mapuleʻi ange ho sinó mo ho ʻatamaí ʻaki haʻo ako ʻa e mahuʻinga ʻo e akó, mālohi ʻa e sinó, mo e moʻui leleí.
Hokohoko atu hoʻo fakatomalá, talangofua ki he ngaahi fekaú, ʻaukaí, mo e lotu ke fakamaʻa hoʻo moʻuí.
Ki he kau talavoú, ngāue ʻaki ʻa e tui kia Sīsū Kalaisí ʻo ako mo fakahoko ho ngaahi fatongia ʻi he lakanga fakataulaʻeikí.

2. Laumālié

Naʻe akonaki foki ʻa ʻEletā Pālati ʻo pehē, “ ʻOku fie maʻu ke moʻui angamaʻa mo mateuteu fakalaumālie e kau faifekaú.”³

Ako mo muimui ʻi he ngaahi fakahinohino ʻi he Ki Hono Fakamālohia ʻo e Toʻu Tupú.
Fekumi ki he fakahinohino ʻa e Laumālie Māʻoniʻoní ʻaki ʻa e ʻaukai, ako folofola, mo lotu ke maʻu ha fakahinohino.
Lau fekauʻaki mo e ngaahi meʻafoaki ʻo e Laumālié ʻi he Tokāteline mo e Ngaahi Fuakava 46:11–26. Fekumi ʻi he faʻa lotu ke ʻiloʻi hoʻo ngaahi meʻafoaki fakalaumālié. Kumi faleʻi mei hoʻo ongomātuʻá mo e kau takí ke tokoni atu ʻi hono fakatupulaki hoʻo ngaahi meʻafoaki fakalaumālié.
Fehuʻi hifo kiate koe, “ ʻOku fakatupulaki nai e ngaahi tohi ʻoku ou laú mo e ngaahi polokalama televīsone mo e ngaahi heleʻuhila ʻoku ou sio aí?” Kapau ʻoku ʻikai, fakakaukau ki ha founga te ke lava ai ʻo fili ha ngaahi fakafiefia ʻoku lelei angé.
Ako ke ke fakafanongo ki he ngaahi ueʻi fakalaumālié.

3. ʻOfá

ʻOkú ke fie maʻu ʻa e ʻofa faka-Kalaisí, ʻa e ʻofa haohaoa ʻa Kalaisí kae lava ke ke ngāue fakafaifekau lelei. ʻOku ʻikai faingofua maʻu pē ke te ʻofa ki he niʻihi kehé. ʻOku fie maʻu ki ai ʻa e tokoní, tuí, ʻa e Laumālie Māʻoniʻoní mo e lototoʻá. Naʻe pehē ʻe Molomona ʻoku fie maʻu ke ke lotu ʻaki ho iví kotoa koeʻuhí ke fakafonu kimoutolu ʻaki ʻa e ʻofa haohaoa ʻa Kalaisí (vakai, Molonai 7:48).

Lotu ʻi he loto fakatōkilalo pea ʻi he loto fakamaatoato ke ke lava ʻo ʻofa ki he niʻihi kehé ʻo hangē ko e ʻofa ʻa Kalaisí.
Fakahā hoʻo ʻofa ki ho fāmilí ʻaki hano fai ha ngāue lelei ki he mēmipa takitaha ʻo e fāmilí. Fili ha mēmipa ʻo e fāmilí ʻokú ne fie maʻu ha ʻofa pe tokanga lahi ange pea fakamoleki hao taimi mo ia.
Fakahaaʻi hoʻo ʻofa ki ha taha ʻoku faingataʻaʻia ʻaki hano fai ha faʻahinga ngāue ʻofa maʻana.

4. Ngāue Tokoni

Naʻe ako ʻaki ʻe he Tuʻi ko Penisimaní ki hono kakaí ʻa hono mahuʻinga ʻo e ngāue tokoní. Naʻá ne pehē ko e taimi ʻoku tau tokoni ai ki he niʻihi kehé, ko ʻetau ngāue ia maʻá e ʻOtuá (vakai, Mōsaia 2:17).

ʻAi ke ke ʻulungāanga ʻaki ʻa e ngāue tokoní. ʻE lava ke ke fufulu ipu he ʻosi ʻa e houakai efiafí, tokoni ki hao tokoua ʻi heʻene ngāue fakaako mei ʻapí, talanoa mo ha taha ʻoku fie maʻu hano kaungāmeʻa, pe tokoni ki hono tauhi homou feituʻú ke maʻa.
Lotu ke maʻu ha ivi mo ha fakahinohino ke muimui ʻi he tā sīpinga ʻa e Fakamoʻuí ʻi he tokoní.
Tokoni ki he kulupu ʻo hoʻomou Kau Talavoú pe Kau Finemuí ʻi hono palani ha ʻekitivitī ngāue tokoni.

5. Fakaafé

Naʻe hanga ʻe ʻAlamā, ko e taha ʻo e kau faifekau maʻongoʻonga ʻo e Tohi ʻa Molomoná ʻo fakaafeʻi ʻa kinautolu naʻe ʻikai kau ki he Siasí ke nau “haʻu ʻo papitaiso ki he fakatomalá” (ʻAlamā 5:62). Te ke lava ʻo muimui ʻi heʻene sīpingá.

Hoko ko ha kaungāmeʻa mo ha faʻifaʻitakiʻanga lelei ki ho ngaahi kaungāmeʻa mo e kau mēmipa ʻo e fāmilí ʻoku ʻikai ke kau ki he Siasí.
Kumi ha ngaahi faingamālie ke akoʻi ai ʻa e ongoongoleleí ki ho ngaahi kaungāmeʻá mo e kaungāʻapí.
ʻAko ʻa e ongoongoleleí pea akoako hono akoʻi iá he taimí ni. Kole ha fakahinohino ki hono akoʻi ʻo e ongoongoleleí ki he taki ngāue fakafaifekau ʻi ho uōtí pe koló. Kapau ʻe lava peá ke ʻi ai ʻi he taimi ʻoku akoʻi ai ʻe he kau faifekau taimi kakató e ngaahi lēsoní ki he kau fiefanongó.
Ako ʻa e Malangaʻaki ʻEku Ongoongoleleí mo hoʻo mātuʻá ki he efiafi fakafāmili ʻi ʻapí. ʻE lava ke mou fetongitongi ʻi hono fakamatalaʻi ʻo e ngaahi lēsoní, akoʻi hanau konga, mo fefakaafeʻaki ke fai ha fakamoʻoni ki he meʻa kuo mou akó.

Ko e taumuʻa mahuʻinga ke fokotuʻu he taimí ni ʻa e ngāue fakafaifekaú, pea ʻi hoʻo teuteu he taimi ní, ʻe ʻaonga ia ki hoʻo moʻuí ʻi he ʻaho kotoa pē ʻo aʻu ki haʻo ngāue fakafaifekau. ʻOku ʻikai ha taimi ia ke pehē ʻokú ke fuʻu kei siʻi ai ke kamata hoʻo teuteú—ʻoku ʻikai fie maʻu ke ke tatali kae ʻoua kuó ke kiʻi lahi hake.

Ngaahi Tā fakatātaaʻi ʻa Sal Velluto MO travis walton