Ko e hā ʻoku fie maʻu ai ke u lotu ʻiate au pē lolotonga iá kuó u ʻosi lotu fakataha mo hoku fāmilí?
Fakakaukauloto angé ʻokú ke fekuki mo ha palopalema fakatāutaha. Te ke ongoʻi fiemālie nai ke vahevahe ʻa e ngaahi meʻa ʻokú ke fekuki mo iá mo ha kulupu, pe te ke saiʻia ange ke fakahā ia ki ha toko taha pē?
Naʻe akonaki ʻa Palesiteni Sipenisā W. Kimipolo (1895–1985) ʻo pehē: “ ʻOku ʻi ai e ngaahi meʻa ia ʻe lelei taha pē ke lotu lilo ki ai, ʻo ʻikai ke tau toe tokanga ki he taimí pe ʻikai toe fakahāhāholo ʻetau lotú. ʻOku mahuʻinga ʻaupito mo ʻaonga ʻa e lotu liló. ʻE tokoni ʻa e lotu toko tahá ke tau fakaʻehiʻehi ai mei he maá pe fakangalingalí, ha faʻahinga kākā ʻe kei ʻiate kitautolu; ʻe tokoni ke tau fakaava hake hotau lotó pea tau faitotonu mo fakaʻapaʻapa kakato ʻi hono fakahā ʻo ʻetau ngaahi ʻamanakí mo e ngaahi tōʻongá kotoa.”1 Ko e ngaahi meʻa ko ia ʻoku ʻikai ke tau ongoʻi fiemālie ke lotua ʻi heʻetau ngaahi lotu fakafāmilí, ʻe lava—pea ʻoku faʻa totonu pē—ke lea ʻaki ʻi he lotu liló.
ʻI heʻetau ngaahi lotu fakatāutahá ʻoku lava ke tau talanoa fiefia ai mo ʻetau Tamai Hēvani ʻofá mo aleaʻi e ngaahi meʻa ʻoku tau tailiili taha ki aí pea mo e ngaahi holi taupotu ʻa hotau lotó. Ko e taimi naʻe lotu lilo ai ʻa Siosefa Sāmitá naʻá ne maʻu ai e fakahā ko ia naʻá ne kamata hono Toe Fakafoki Mai ʻo e ongoongolelei ʻo Sīsū Kalaisí. ʻI heʻetau talanoa fakatāutaha ki heʻetau Tamai Hēvaní, ʻoku lava ai ke tau ongoʻingofua ʻa e ngaahi ueʻi ʻa e Laumālié ʻoku fakataumuʻa ke ʻaonga kiate kitautolú.
Neongo ia, ʻoku mātuʻaki mahuʻinga ʻaupito foki mo e lotu fakafāmilí—ʻoku lava ke tau ʻunuʻunu ʻo ofi ange ai ki heʻetau Tamai ʻi Hēvaní pea aʻusia ha ngaahi meʻa fakalaumālie mo hotau ngaahi fāmilí. Hangē ko e akonaki ʻa Palesiteni Kimipoló, “ ʻOku naʻinaʻi mai e Siasí ke fakahoko e lotu fakafāmilí ʻi he efiafi mo e pongipongi kotoa pē.”2
“Ke ke lotu ʻaki ʻa e leʻó pea ʻi ho lotó foki; ʻio, ʻi he ʻao ʻo e māmaní pea ʻi he liló foki, ʻi he ʻao ʻo e kakaí pea ʻi he liló foki” (T&F 19:28).