Joes blong Naea
Naea i bin stap plei long fored blong haos blong hem taem anti blong hem i singaotem hem insaed. “Naea, bae yu save go long stoa blong pem sam karot blong dina?” anti blong hem i askem.
“Yes!” Naea i talem wetem glad. Hem i laekem blong go long stoa, mo laekem blong helpem anti blong hem.
Naea i tekem mane we anti blong hem i givim long hem mo i wokbaot i go long stoa we i stap kolosap.
“Mi nidim blong pem sam karot blong dina,” Naea i talem long stoakipa.
Stoakipa i putum ol karot long basket blong Naea mo i talem praes blong ol karot. Naea i givim mane long hem.
“Hemia jenis blong yu,” stoakipa i talem taem hem i givimbak sam mane long Naea.
Naea i talem tangkyu long hem mo i stat wokbaot i go long haos. Taem hem i stap wokbaot, hem i stap luk mane we stokipa i bin givim long hem. “Hem i givim plante jenis long mi,” hem i stap tingting. “Naoia mi save tekem ol mane ia blong mi!”
Be afta Naea i bin stop blong wokbaot. “Papa long Heven bae i no hapi wetem mi sapos mi kipim mane ia,” hem i tingting. “Mi mas stap ones long ol toktok blong mi mo ol wok blong mi.”
Naea i tanem raon mo i gobak long stoa. “Yu bin givimbak plante mane long mi,” hem i talem long stoakipa taem i givimbak ol mane we i ova long hem.
Stoakipa i bin tekem mane. “Yu wan gud gel,” hem i talem. Afta hem i putum sam apol long wan plastik mo givim long Naea. “Tankyu blong stap ones. Plis tekem ol apol ia mo serem wetem famle blong yu.”
Naea i bin filim gud mo glad insaed long hem taem hem i bin wokbaot i go long haos. Hem i save Papa long Heven i glad se hem i bin jusum blong stap ones.
Ol pikja oli kam long Luis Peka