Kasem Taem Yumi Mit Bakegen
Hat blong King Wetem Ropnil, Hat blong King Wetem Viktri
Long mi, hat blong king wetem ropnil i kam olsem wan saen se Sevya i save long evri harem nogud blong yumi we i haed—mo Hem i gat paoa blong hilim olgeta.
Manis Ogis long Holi Lan. Raon long mifala, ol olfala samting blong Kapaneam oli stap saen long hot san blong aftanun. Hem i wan naesfala ples blong stap, be gaed blong mifala mo wan bigfala pepet we i stap kolosap long mifala, tugeta i stap mekem noes blong samfala taem, mo mi stap tingting i go.
Kwiktaem nomo mi save se i gat wan samting taem gaed i poenem wan tri we mifala i stap long sado blong hem mo talem, “Oli singaotem tri blong ‘hat blong king wetem ropnil.’” Mi luk antap long ol branj blong hem we i gat ol lif. Wehem ol nil ia? Mi kasem wan branj mo pulum sloslo i kam kolosap.
Mi luk, insaed long ol sopsop lif ia, ol nil. Oli tintin mo oli grin, oli sap nogud tru mo oli longfala olsem nambawan fingga blong mi, yu no save luk olgeta taem yu stap longwe smol. Be eniwan we bae i fas long ol smosmol branj ia we oli gat fulap lif bae i filim i soa tru.
Mi tingbaot plante penting we mi bin luk blong Sevya i stanap long fored blong kot we oli bin stap jikim hem, i werem wan pepol dres mo hat blong king we oli tantanem wan rop blong bus we i drae mo i gat ol nil longhem. Wantaem nomo long ae blong mi, mi luk olsem se man ia o soldia ia we oli askem hem blong mekem hat blong king ia bae i wantem blong wok wetem ol grin branj olsem olgeta we mifala i stap andanit long olgeta ia—i no wetem ol branj we oli drae mo isi blong brok. Be stamba tingting blong hat blong king ia i no blong mekem hem i harem nogud nomo be i blong traem blong mekem hem i kros nogud mo jikim hem mo laf long hem.
Long olfala wol, wan hat blong king we i gat ol grin lif o flaoa—speseli ol grin lif we oli gat gudfala smel—oli givim oltaem long olgeta we oli win long wan faet. Ol grin lif wetem flaoa i blong flasem fes blong ol king mo empera. Ating rabis hat blong king ia we oli fosem i go daon long fored blong fes blong Sevya hem i gat ol lif mo i grin long wan kaen fasin blong olgeta blong givim ona. Hem i no wan doktrin, i wan tingting nomo. Be blong mi, taem mi luk long wei ia i givim long mi wan klia wei blong lukluk long Atonmen. Sevya i save ol sore blong yumi, mo Hem i save hilim yumi.
Dres we Hem i werem i wan saen blong jikim Hem long saed blong laen blong Hem olsem wan king. Dres ia i kavremap ol mak mo ol kil blong ol wip we Hem i bin kasem. Long sem fasin ia, hat blong king we i gat nil we i gat ol lif bae i kamaot olsem flaoa blong viktri be bae i haedem soa mo harem nogud we hat ia i givim long Hem.
Plante long yumi oli stap karem long olgeta ol harem nogud we oli haed. Hym ia i tijim se “sore i haed insaed long kwaet hat ia we ae i no save luk” (“Lord, I Would Follow Thee,” Hymns, no. 220). Be Sevya hem i stap luk. Hem i save gud harem nogud we man i no save luk. Long ful ministri blong Hem,Hem i bin laef wetem tingting ia blong mekem Atonmen mo Laef Bakegen long Ded. Yet olgeta we Hem i bin tijim olgeta mo blesem olgeta oli no save. Iven ol disaepol blong Hem oli no bin save.
Sevya i lukluk tru i go bitim “ol dres” mo “ol hat blong king” we oli haedem ol sore blong yumi long ol narawan. From se Hem i safa long ol “harem nogud mo soa mo temtesen blong evri kaen,” Hem i fulap long sore mo Hem i save olsem wanem blong helpem yumi taem yumi putum ol harem nogud blong yumi long graon long fored blong leg blong Hem (luk long Alma 7:11–12). Hem i pomad ia we i save mekem gud bakegen ol bigfala soa, iven ol kil we soa blong hem i dip mo i haed. Mo hat blong king we i soemaot long yumi, hem i blong tru man we i win long faet.
Kraes Wetem Hat blong King Wetem Ropnil, i kam long Kal Henrij Blok, oli yusum wetem raet we i kamlong Nasonal Miusium long Frederiksbog long Hilerod, Denmak, no mekem kopi.