Wanem Yumi Bilivim

Jisas Kraes I Bin Pem Praes From Ol Sin blong Yumi

Wan long ol risen from wanem yumi stap long wol ia i blong lanem blong obei long ol komanmen blong God. Be Jisas Kraes nomo, we i bin gat wan laef we i stret evriwan. Evriwan we i bin laef long wol ia i bin mekem sin (luk long Rom 3:23; 1 Jon 1:8). Sin, hem i taem yumi gat tingting blong brekem ol komanmen blong God, mo evri sin i gat wan panismen we i go wetem. Taem yumi mekem sin, jastis i wantem se bae yumi mas safa long panismen blong hem (luk long Alma 42:16–22).

Nao, risal blong eni sin, hem i we yumi seperet long God (luk long 1 Nifae 10:21). Taem ia we yumi seperet ia i had tumas, mekem se yumi no save stretem yumiwan.

Blong winim taem blong seperet ia, Papa blong yumi long Heven i givim wan rod blong Stret Pikinini Ia Nomo blong Hem, Jisas Kraes, blong tekem long Hemwan, hevi trabol blong ol sin blong yumi, blong mekem i posibol blong yumi stap klin long saed blong spirit mo kam wan bakegen wetem Hem. Hemia i plan blong sore.

Sevya i bin tijim se Hem i bin safa evri samting ia long bihaf blong yumi, blong mekem se bae yumi no safa long ol samting ia sapos yumi sakem sin; be sapos yumi no wantem sakem sin, bambae yumi mas safa semmak nomo olsem we Hem i bin safa (Luk long D&C 19:16–17).

Olsem pat blong Atonmen blong Hem, Jisas i bin safa from ol sin blong yumi long Garen blong Getsemane mo antap long kros blong Kalvari. Taem yumi sakem ol sin blong yumi, yumi save tekem paoa blong Atonmen blong Hem insaed long laef blong yumi.

Jisas Kraes, we i bin glad blong pemaot ol sin blong yumi i bin talem:

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.

“Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi” (Matiu 11:28–30).

Atonmen i tekem ol blesing ia tu oli kam:

1. Laef bakegen long ded long evriwan we oli bin bon long wol ia (luk long Alma 11:42–45).

2. Laef we i no save finis wetem God blong evri pikinini we oli ded bifo oli kasem yia blong stap akaontebol, we hem i eit yia (luk long Mosaea 3:16; 15:24–25; Moronae 8:8–12).

3. Paoa blong faenem pis long taem blong tes from se Jisas i bin tekem long Hemwan ol soabodi mo ol sik blong yumi (luk long Jon 14:27; Alma 7:11–12).

4. Praes blong pembak long olgeta we oli stret mo gud from ol nogud samting we oli bin kasem long laef ia (luk long Prijim Gospel blong Mi [2004], 56).

Blong gat moa infomesen, luk long Gospel Principles (2009), 59–66; mo True to the Faith (2004), 14–20.

“Luk, mi bin kam long wol blong tekem fasin blong pemaot i kam long wol, blong sevem wol long sin.

“Taswe, eni man we i sakem sin mo kam long mi olsem wan smol pikinini, hem bae mi akseptem, from olgeta ia i gat raet long kingdom blong God. Luk, from olgeta olsem, mi bin givim laef blong mi mo mi bin tekem bakegen; taswe sakem sin, mo kam long mi yufala evriwan long evri en blong wol, mo stap sev” (3 Nifae 9:21–22).

“Jisas Kraes, olsem Wan Stret Pikinini Ia Nomo blong God, mo wan man ia nomo we i no gat sin we i bin laef long wol ia, i bin wan man ia nomo we i bin save mekem atonmen ia blong ol man blong wol” (luk long Bible Dictionary, “Atonement”).

O Papa blong Mi, i kam long Saemon Diwi; Jisas Kraes I Visitim Ol Amerika, i kam long Jon Skot © IRI; foto pikja blong bebi © Geti Imej; ol nara foto pikja oli kam long Kristina Smit