Sam Tingting blong Famle Haos Naet

Liahona ia i gat ol stori mo aktiviti we yu save yusum long famle haos naet. Olgeta ia oli sam long ol eksampol.

“Blong Tingbaot Hem Oltaem,” pej 20: Tingting blong toktok raon, olsem wan famle, long kaonsel blong Elda Kristofeson we i talem se “Yumi save stat blong tekemaot wanwan long evri samting aot long laef blong yu mo afta, putum i gobak tugeta long oda wetem Sevya we i stap long medel.” Tingting blong toktok abaot sam long ol blesing we Elda Kristofeson i tokbaot we i kam taem yumi “tingbaot Sevya oltaem.”

“Paoa blong Skripja,” pej 52: Afta we yufala i ridim atikol ia tugeta, invaetem ol memba blong famle blong serem ol filing abaot fasin blong ridim ol skripja mo blong stap go long seminari. Invaetem olgeta blong raetem ol testemoni blong olgeta long jenol blong olgeta, long saed blong paoa blong ol skripja. Leftemap tingting blong ol pikinini blong yufala blong stadi mo lanem baehat ol skripja blong skripja mastri.

“Man we I Stap long Medel,” pej 56: Taem yufala i stap ridim atikol ia tugeta, invaetem famle blong yu blong lisin long hamas hem i impoten blong gat wan man we i toktok long bihaf blong yumi. Askem olgeta se wanem nao bae i hapen sapos i no wan man we i mekem samting long bihaf we bae i helpem man we i gat kaon. Mo tu, yu save ridim ol skripja mo toktok raon long ol skripja we oli tokbaot Sevya olsem man blong yumi blong stap toktok long bihaf blong yumi. Tingting blong ridim2 Nifae 2:27–28 mo Alma 42:24–25.

“Jenis Gud Evriwan,” pej 70: Tingting blong invaetem ol memba blong famle blong dresap long wan klos o mekem se oli wan narafala man. Givim wanwan, wan janis blong serem huia olgeta. Afta we yu ridim stori, eksplenem we nomata wanem rol ia nao bae yumi plei, oltaem, yumi ol pikinini blong God.

Ol Hapi Taem mo Ol Rop we Oli No Save Finis

Taem ol pikinini blong mi oli smol, oli laekem blong plei ol gem afta long famle haos naet. Wan long ol plei we oli laekem hem i “Tranki Elefen” i tekem nem ia folem wan singsing we gel blong mitufala, Joslin, i bin lanem long skul. Afta we mifala i singsing long singsing ia, bae mi kam Tranki mo mekem ol pikinini oli klaem long bak blong mi mo bae mi wokbaot. Faswan, boe blong mi we i gat tu yia, Jorj; afta, gel blong mi we i gat fo yia, Joslin; mo laswan waef blong mi, Elisabet, bae i klaem long bak blong mi. Wetem olgeta tri long bak blong mi, bae mi wokbaot raon long living rum. Mifala i gat ol gudfala taem.

Plante yia afta, ol pikinini blong mi oli bigwan finis mo stap wet long koling blong olgeta blong go long misin. Long taem blong wan famle haos naet, oli bin tingbaot “Tranki Elefen.” Mifala i singsing long singsing tugeta; afta, wan spel blong plante yia, mi kam elefen ia bakegen. Faswan, boe blong mi, afta gel blong mi, mo laswan mama blong olgeta oli klaem long bak blong mi. Mi go flat long floa wantaem, mo mifala i bin laf gud.

Tingting blong taem ia nomo i mekem mifala i talem tangkyu se ol profet oli bin tijim yumi abaot famle haos naet. Mifala i bin lanem se nomata se famle haos naet blong mifala i simpol, samting we i moa impoten i we mifala i bin gat ol hapi taem wetem famle blong mifala, se taem i mekem ol rop we i joenem mifala i kam strong moa.

Vikto G. Joka Rivera