Insaed long Nius
Elda Peri I Krietem Fas Stek long Guam
Elda L. Tom Peri blong Kworom blong Olgeta Twelef Aposol, i bin visitim Guam long Disemba 2010 blong krietem Barigada Guam Stek, fas stek long kantri blong Guam. Taem hem i bin stap long ples ia, Elda Peri, we i bin stap long Marin Ami blong Yunaeted Stet long eria ia long taem blong Wol Wo 2, i bin visitim Pasifik Wo Miusium mo ol neiba aelan blong Saepan. I gat 1, 971 memba blong Jos we oli stap long Guam. Kantri blong Guam i pat blong Esia Not Eria blong Jos.
Ol LDS Dokta Oli Tritim Kolera long Papua Niu Gini
Wan grup blong ol LDS dokta blong Ostrelia oli bin spendem taem blong lukluk long olgeta we oli gat sik kolera long ol vilej blong Not Wes Papua Niu Gini, kolosap long en blong yia 2010.
Ol dokta ia oli kam wetem plante handred sikman, mo sevem wan man we sapos oli wet sam minit moa, bae i ded, taem hem i kasem hospital mo ol narafala bae oli no gat tritmen blong 24 aoa.
Ol pipol oli kam plante long menlan mo tu long kenu blong kam luk ol dokta. Deved Wiliams blong Brisban mo Antoni Male blong Kerns, oli talem se afta wan dei we oli kasem vilej blong Sogere, oli bin tritim moa long 200 kes blong kolera. Taem hem i tokbaot eksperiens ia, Dokta Male i bin talem: “Hem i taem long wok blong mi we mi glad moa long laef blong mi,” nomata long ol hadtaem mo bigfala wok we i bin stap.
Jos i no sendem ol dokta nomo, be i givim ol saplae tu, wetem ol meresin mo samting blong mekem wota i klin. Oli bin sendem kakae mo sop tu i go long ol ples ia, aot long ol eria blong Jos long Port Moresbi, mo oli bin sendem ol haejin kit aot long Port Moresbi mo Brisban. Wan kapol misinari we i gat eksperiens long saed blong fasin blong mekem wota i klin, i bin go long Papua Niu Gini blong help blong lukluk long ol wok ia blong givhan.
Wan DVD I Presentem Miutuol Stamba Toktok blong Yia 2011
Long Jenuware, Jos i stat blong serem 2011 DVD Blong Ol Yut Oli Kam Strong, We Believe, i go long ol yunit blong Jos raon long wol blong oli yusum blong sapotem 2011 stamba toktok blong Miutuol.
DVD ia i fulap long ol vidio mo singsing we oli blong helpem ol yut oli mekem stamba toktok ia, Ol Toktok blong Bilif 1:13, i kam long medel blong laef blong olgeta. Ol pat i tekem Presiden Tomas S. Monson, ol jeneral presiden blong Ol Yang Man mo Ol Yang Woman, miusik, ol testemoni blong ol yut, mo plante moa.
Plante samting we oli stap insaed hem i ol testemoni blong ol yut mo ol eksperiens we i pusum tingting blong olgeta.
Miusik, ol mesej, mo ol testemoni ia, oli save yusum blong mekem ol yut klas, ol mitiing, mo ol aktiviti oli kam rij moa raon long yia.
Evri samting ia oli stap tu blong daonlodem long Intanet long youth.lds.org.
DVD ia, i tekem tu translesen long ol lanwis ia: Jaenis, Inglis, Franis, Jeman, Itali, Japanis, Koria, Potugal, Rasia, mo Spanis.