Visiting Tijing Mesej

Stamba Tingting blong Rilif Sosaeti

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Fet• Famle • Help

Taem oli bin singaotem presidensi blong mifala blong fas taem, oli bin givim long mifala sam risos abaot Rilif Sosaeti. Mifala i bin stadi ol risos ia wetem prea, mo wantem blong save stamba tingting blong Rilif Sosaeti mo wanem Lod i wantem mifala blong mekem. Mifala i bin lanem se stamba tingting blong Rilif Sosaeti olsem we Lod i bin stanemap, hem i blong oganaesem, tijim, mo helpem ol gel blong Hem blong rere from ol blesing blong laef we i no save finis.

Blong fulfilim stamba tingting ia blong Rilif Sosaeti, Lod i bin givim raet mo wok ia long wanwan sista mo ful oganaesesen blong:

1. Kam antap long fet mo fasin blong yuwan blong stap stret mo gud.

2. Mekem ol famle mo hom oli kam strong moa.

3. Givim help taem yu givim seves long Lod mo ol pikinini blong Hem.

Yumi save mekem wok ia long wei blong Lod nomo taem yumi lukaot, kasem, mo mekem wok folem revelesen blong yumiwan. Sapos i no gat revelesen blong yumiwan, bae yumi no save gat sakses. Sapos yumi lisin long revelesen blong yumiwan, bae yumi no save foldaon. Profet Nifae i bin tijim yumi se Tabu Spirit bae i soemaot long yumi “evri samting we bae [yumi] mas mekem” (2 Nifae 32:5). Yumi mas letem yumiwan blong no muvmuv tumas mo save stap kwaet blong yumi save lisin long voes blong Spirit.

Ol sista, yumi gat wan impoten rol blong mekem blong help blong bildimap kingdom blong God mo rere from taem we Lod bae i kambak. I tru, wok blong Lod bae i no finis gud sapos yumi ol gel blong Hem i no help. From hemia, Lod i wantem yumi blong kam antap long ofring blong yumi. Hem i wantem yumi blong mekem stamba tingting blong Rilif Sosaeti i hapen moa bitim bifo.

Juli B. Bek, Rilif Sosaeti jeneral presiden.

Aot long Ol Skripja

Dutronome 6:5–7; Luk 10:30–37; Jemes 1:27; 2 Nifae 25:26; Mosaea 3:12–13

I Kamaot long Histri blong Yumi

Long wan miting blong Rilif Sosaeti, long 9 Jun 1842, Profet Josef Smit i bin tijim ol sista se sosaeti blong olgeta i no blong “helpem olgeta we oli pua nomo, be blong sevem ol sol tu.”¹ Toktok ia we i gat stamba tingting blong hem long saed blong spirit, mo tu, long saed blong wol, i bin talemaot gud wanem hem i Rilif Sosaeti truaot long histri blong hem. Long 1906, Presiden Josef F. Smit (1838–1918) i bin tijim: “[Rilif Sosaeti] i no lukluk nomo long ol samting long saed blong ol stamba nid blong olgeta we oli pua, olgeta we oli sik mo olgeta we oli stap long nid nomo, be wan pat blong diuti blong hem—mo bigfala pat blong hem, tu—hem i blong lukaotem welfea blong ol mama mo ol gel blong Saeon long saed blong spirit mo fasin blong sevem olgeta; blong luk se i no gat wan i stap hemwan, be, se evriwan long olgeta mama mo gel ia, oli lukaotem gud olgeta agensem trabol, disasta, ol paoa blong tudak mo ol nogud samting we oli stap wantem spolem olgeta long wol.”² Long 2001, Elda M. Rasel Balad blong Kworom blong Olgeta Twelef Aposol i bin ripitim bakegen se, “Evri sista long Jos ia we i bin mekem ol kavenan wetem Lod i gat wan wok we i kam long heven blong help blong sevem ol sol, blong lidim ol woman blong wol, blong mekem ol hom blong Saeon oli kam strong moa, mo blong bildimap kingdom blong God.”³

Ol Not

1. Joseph Smith, long History of the Church, 5:25.

2. Teachings of Presidents of the Church: Joseph F. Smith (1998), 185.

3. M. Rasel Balad, “Women of Righteousness,” Liahona, Disemba 2002, 39.

Blong rid abaot wan woman we i bin wan eksampol blong fet mo i gat fasin blong stap stret mo gud, luk long pej 28.

Wanem Mi Save Mekem?

1. Wanem insperesen nao mi bin kasem blong helpem ol sista blong mi blong oli kam antap long fet mo fasin blong olgetawan blong stap stret mo gud, mo mekem ol famle mo hom blong olgeta oli kam strong moa? Wanem help nao mi save givim?

2. Olsem wanem nao mi save yusum mesej ia blong mekem fet blong mi i kam strong moa mo kam antap long komitmen blong mi long fasin blong stap stret mo gud?

Blong kasem moa infomesen, go long www.reliefsociety.lds.org.

Pikja foto i kam long Kristina Smit