I Kam long Misin Ples
Smol Ansa Insaed long Blesing blong Mi
Mi bin mekem misin blong mi long Teksas Huston Saot Misin olsem wan elda we mi toktok Spanis. Wan dei, kompanion blong mi mo mi i bin stap noknok long ol doa, mo traem blong faenem wan blong tijim. Mitufala i kam kasem wan haos wetem wan bigfala hol insaed long ruf blong olfala wud veranda.
Wan olfala woman i bin openem doa mo i invaetem mitufala i go insaed. Mi no sua se hem i save se huia mitufala mo wanem nao mitufala i stap mekem, be hem i bin toktok kaen. Mitufala i stat blong tijim hem long fas lesen, mo i luk se ol samting oli gohed gud. I no longtaem, i bin taem blong mi blong tij abaot Josef Smit mo Fas Visen. Mi bin luk se long fes blong woman ia, i luk se tingting blong hem i fasfas. Mi luk gud se hem i no stap folem wanem we mi stap traem blong eksplenem long hem.
Afta we mitufala i bin askem sam kwestin long wanem we mifala i bin tokbaot, mo hamas hem i bin andastanem, mi filim se mi harem nogud se hem i no andastanem tingting biaen long Fas Visen. Hem i bin wan longfala dei, mo las samting we wan misinari i wantem, i blong wan i no andastanem gud wanem we hem i wantem ol pipol blong save se i tru.
Long haf seken nomo, mi bin filim ol filing blong mi oli stap go long kros, mo wan ples long petriakel blesing blong mi i kam long tingting blong mi. Hem i wan pat abaot fiuja famle blong mi we i givim advaes long mi blong tijim ol fiuja pikinini blong mi long saed blong ol tingting blong gospel. Taem paragraf ia i kam long hed blong mi, mi bin save se Spirit i bin stap talem long mi se woman ia, we i gat tingting i stap daon, long semfala wei we bae mi tijim wan pikinini.
Mi stat blong tijim hem wetem wan moa simpol wei mo wetem lav. Mi traem blong gat pikja se ol pikinini blong mi oli sidaon raon long wan famle rum mo stap lukluk mi, papa blong olgeta, taem mi stap tijim olgeta abaot Profet Josef Smit. Mi bin sapraes blong luk jenis long fes blong hem. Ol aebro blong hem oli go antap, mo ae blong hem i stat blong saen. Lukluk long fes blong hem we i olsem se tingting blong hem i fas, i jenis i kam blong gat intres mo stap tingting. Taem mi tokbaot stori blong Papa long Heven mo Jisas Kraes we Tufala i bin kamaot long Josef Smit, ol ae blong hem oli bin fulap long wota we i ron daon long fes blong hem. Spirit i bin fulumap rum ia, mo kros blong mi i tanem i kam wan bigfala glad.
Bae mi neva fogetem eksperiens ia. Nao, mi no save wet blong tijim ol semfala prinsipol ia long ol pikinini blong mi wan dei mo filim bigfala glad ia bakegen.
Pikja i kam long Braean Kol