Juon Kūr n̄an juon Rioktak
Iaar juon rioktak kāāl im kar ejjeļo̧k kapeel ko kōn kōjan̄jan̄-piano Bōtaab eļap aō kam̧oolol kōn kūr eo eaar ukōt mour eo aō āinwōt juon rijipan̄ ilo piano an branch.
Ejjab etto ālkin Aō kar peptaij ke iaar 10 iiō detta ilo Lappeenranta, Finland, Iaar bōk kūr eo aō jinoin tata an Kabun̄. Eaar ilo 1960 eo, im branch eo am edik eaar lukkuun aikuj juon eo n̄an jipan̄ ilo al ko n̄an kweilo̧k in kwojkwoj ko. Kar kajjitōk ippa n̄an kakūrm̧ool ijjitōn̄ in.
Ilo an jinō kar iien otemjej kōketak būratōr ro aō im n̄a n̄an pukōt tōļan ko kōn kōjan̄jan̄, Iaar jab jeļā ekōjkan kōjan̄jan̄ piano, im eaar ejjeļo̧k juon nejim make piano. Bōtaab Iaar kōņaan kakūrm̧ool kūr eo aō, kōn menin kōm̧ kar kōm̧m̧ane juon karōk.
Ilo nokon in jotan an baam̧le, kōm kar kōnono kōn ta meļeļe in kūr in n̄an aolepem wōj. Ijo wōt ke, kōnke jinō eaar juon eo emej ļeo pāleen kōn ruo ajri ro reddik, kōm kar jeļā enaaj kar kanooj apan̄ n̄an kōm n̄an wiaik juon piano im kōļļā wōņāān katak ko. Kōm kar jokālet bwe kōm kar aolep kōņaan kōm̧m̧ane karmejete ko remenin aikuj.
Karmejete eo jinoin tata baam̧le eo aō eaar kōm̧m̧ane eaar ikkijien jāān. Kōm kar jokālet bwe jān spring n̄an fall kōm naaj kar baajikōļ ijello̧k in baj. Būratōr eo aō, Martti, eaar peran im erom m̧ōkade tata ilo baajkōļ— jekdo̧o̧n ioon jiņo im ice. Iaar leļo̧k enan̄in aolepen nuknuk ko aō kar wiaiki im kar katak keke. Kōm kar barāinwōt katak n̄an mour in kejparok. Kōm kar jino juon jikin kallib ilo countryside iturin m̧weo im̧ōn ro jim̧m̧am̧ im jibūm̧ im kar kejparok m̧ōn̄ā ko n̄an iien m̧ōļo. Iien “kakkije ko” am raar erom tūrep ko an eo jinem n̄an tampeļ eo ilo Switzerland ak piknik ko im kāām ko repaak tok n̄an kapijuknen eo am̧.
Karmejete eo kein karuo baam̧le eo aō eaar kōm̧m̧an eaar kōn iien. Kōm kar ajije jeral ko m̧weo aolep raan im bar jikejuuļi m̧akūtkūt ko jet am im katak in jikuuļ ko am bwe en bwe aō iien n̄an kaminene piano. Kōnke kōn karmejete ko am im puuļ jerbal ko, Jinō ekkā an ba bwe am iien kakkije n̄an kōm̧m̧an irre āinwōt ro jet dettam wōt. Ilo m̧ool, kūr eo aō eaar erom juon kūr an baam̧le m̧okta wōt jān aō kar kōjan̄ juon noot.
Iaar jino ebbōk katak ko ippān juon rūkaki in al ilo juon jikuuļ ijo ij jokwe ie. Iaar kōmālmel kōjerbal juon peba keyboard im ioon juon piano ilo m̧ōn jar eo. Ke rūkaki in piano eo eaar em̧m̧akūt, kōm̧ kar wiaik piano eo nejin, im kar bōk eō n̄an ekkatak ippān juon rūkaki in piano ebun̄bun̄ ilo eria eo.
Iaar katak al ko kōn n̄a make im kar kōmālmel kōn elōn̄ ippān ritōl al eo an branch eo. Aolep raar kōketak eō—jekdo̧o̧n eļan̄n̄e eaar bōd noot eo kar kōjan̄e. Rūkaki eo aō eaar ļo̧kjeņ an ālkin an kar jeļā bwe Iaar kōjan̄jan̄ im̧aan armej m̧oktaj jān aō kar kōjem̧ļo̧k katak eo im kakilōklōk m̧ōttan ko. Bōtaab kōjan̄jan̄ kōn juon pā eaar em̧m̧anļo̧k jān an ejjeļo̧k kōjan̄jan̄ n̄an jidik.
Iaar baajkōļ n̄an katak ko aō, im n̄e winter ej itok, Iaar kajieon̄ etetal ak ski eļan̄n̄e emaron̄. Ilo Jabōt ko Iaar etetal make ļo̧k n̄an kweilo̧k ko an Kabun̄ in bwe In maron̄ kar tōkākļo̧k juon awa m̧okta im ewōr iien n̄an kōmālmel. Iaar kālet n̄an iuwe ilo baj n̄e jon̄an an m̧ōļo eaar tōpar laļ in -15ºC (5ºF). Wōt im jiņo raar jab lukkuun kabūņōņōik eō; iien eaar m̧ōkaj an ilo̧k ilo aō kar etetal kōnke ekanooj lōn̄ al ko rem̧m̧an raar kōrwaan e eō. Ilo aō kar etetal, Iaar kijoon meļaaj ko ippān bainier ro (lale “Itok, Itok, Ro Rekwojarjar,” Al, nō. 4), etetal utiej ioon jabōn toļ ilo Zaion (lale “Jabān Tol Eo Uteij,” Al, nō. 19), im jutak ippān jodikdik ro me rejjamin bōjrak aer kajoor (lale “True to the Faith,” Hymns, nō. 254). Ijjamin maron̄ bōjrak aō kajoorļo̧k kōn rejtak eo—jekdo̧o̧n n̄e baam̧le eo aō im n̄a kar Armej ro Rekwojarjar ilo Raan-ko Āliktata ilo jukjuk in pād eo am ilo eastern Finland, epaakeļo̧k tōrerein Russia.
Ium̧win iiō ko eaar em̧m̧anļo̧k aō kōjan̄jan̄ im maron̄ kar kōm̧m̧an al ijello̧kin baj kōjan̄jan̄ noot ko rejim̧we. Iaar katak n̄an lukkuun jar ilo kālet al ko bwe Jetōb eo enaaj kar pād ilo kweilo̧k eo. Im aorōk tata eo, naan in kam̧ool eo aō kōn ko̧jpeļ eo eaar itok n̄an eō kōn al. Epidodo aō maron̄ kememej en̄jake ko, naan ko, im ennaan ko an al ko eļan̄n̄e ewōr aō kar kajjitōk kōn jabdewōt men. Ijeļā bwe pedped ko im kain̄i ko an ko̧jpeļ eo raar m̧ool, jān kar katak kaki ļain im bar ļain im noot ālkin noot.
Ij kememej bar juon raan ke kalim̧m̧ur eo aō n̄an pedped ko kar idajon̄jon̄i. Iaar 14 iiō detta; Iaar iakwe aaō im kar ettōņak kōn aaō ilo Olympics. Iaar jab jiāe ilo Jabōt ko, bōtaab Iaar wōnm̧aanļo̧k wōt. Āliktata, ke Olympic eo ilo Mexico City eaar epaaktok, juon kooj eaar kūrļo̧k eō n̄an bōk kuņaō ilo kaminene eo ejeno̧lo̧k.
Kaminene eo, ijowōt ke, eaar aolep jibbon̄ in Jabōt ilo tōren Jabōt Jikuuļ eo. Iaar meļeļe bwe Imaron̄ etal n̄an kōmālmel im jab pād ilo Jabōt Jikuuļ kōnke Inaaj kar bar pād ilo m̧ōn jar eo ilo awa eo ejejjet n̄an kweilo̧k in kwojkwoj eo ilo jota. Iaar kakkoņ jāān n̄an wōņāān baj im kar karōk men otemjeļo̧k. Jādede eo m̧okta jān kaminene eo kein kajuon, Iaar jiron̄ jinō kōn karōk eo aō.
Iaar lo būrom̧ōj im inepata ilo mejān, bōtaab uwaak eo an eaar bwe jokālet eo eaar aō im em̧ōj kar katakin eō ta eo eaar jim̧we. Bōn̄ōn eo Iaar jab maron̄ julo̧k naan ko n̄an “Choose the Right” (Al, nō. 239) jān ļōmņak eo aō. Naan ko kar āliji ilo bōra āinwōt juon ļo̧o̧k eo em̧ōj rupe.
Ilo jibbon̄ in Jabōt eo, Iaar likūt pāāk in kein aaō ko aō ilo juon pā im pāāk in al eo aō ilo pā eo juon, kōjatdikdik n̄an kōm̧m̧an bwe jinō en tōmak Iaar tōn etal n̄an m̧ōn jar eo. Iaar diwōjļo̧k n̄an jikin baj eo. Eaar lukkuun alikkar bwe jikin baj eo ej etal n̄an jikin aaō eo eaar pād ilo turājet eo ij pād ie ilo iaļ eo im eo ej etal n̄an m̧ōn jar eo eaar pād ilo turājet eo juon. Ke Iaar kōttar, Iaar jino kūtōtō. Ilo lo̧jilin̄ū Iaar ron̄ al eo kōn “Have I Done Any Good?” (Al, nō. 223)—al eo kar karōke n̄an Jabōt Jikuuļ eo ilo raan jab eo. Iaar jeļā jān en̄jake bwe, kōn biit eo epen, naan ko rōkaipokpok, im noot ko reutiej, al in enaaj kar juon jorrāān ilo an ejjeļo̧k rijipan̄.
Ke Iaar ļōmņak, aolepen baj ko raar epaaktok. Baj eo n̄an jikin aaō eo eaar bōjrak n̄an n̄a, im rikattōr eo an baj eo n̄an m̧ōn jar eo eaar bōjrak im kalimjōk eō, pok kōnke eaar jeļā Iaar iien otemjej kar bōk baj eo waan. Kōm kar aolep kalimjōk doon Ium̧win jet jekōn ko. Ta eo Iaar kōttare? Iaar kālet Irooj (lale “Who’s on the Lord’s Side?” Al, nō. 260). Iaar kalim̧m̧ūr n̄an ilo̧k ia eo Ekōnaan bwe in ilo̧k (lale “Emaron̄ Jab Ion Tol Eutiej,” Al, nō. 36). Jokālet eō aō n̄an kejparok kien ko em̧ōj kar kōm̧m̧ane etto (lale “Keep the Commandments,” Al, nō. 303).
M̧okta jān an kōmālij eo aō ekkeijel ippān būruō, ānbwinū eaar bōk jikin. Iaar ettōrļo̧k kijoon iaļ eo im iak-iakwe ļo̧k rikattōr eo juon an baj eo. Iaar kōļļāik wōņea im ilo̧k n̄an tulik in baj eo eaar jipadōkļo̧k m̧ōn jar eo, lale ļo̧k an ettōņak in aaō ko aō etal ilo turājet eo juon.
Aolep raar ļōmņak Iaar jan̄ raan jab eo kōnke Iaar en̄jake Jetōb. Bōtaab ilo m̧ool Iaar jan̄ kōnke ettōņak eo aō ke iaar juon ajri ejab kūrm̧ool im kōnke Iaar jook bwe Iaar tōn ļōmņak kōn bōklōkōt eo kōn aaō ilo Jabōt. Bōtaab Jabōt jab eo, āinwōt ko im̧aanļo̧k im tokālik, Iaar kakūrm̧ool kūr eo aō.
Ilo iien eo Iaar pojak in ilo̧k n̄an college, Iaar kamineneik jet membōr in branch eo n̄an tōl al im kōjan̄jan̄ piano. Ilo college Iaar wōnm̧aanļo̧k n̄an kōjan̄jan̄ piano im ebbōk kuļaj in o̧kōn. Iaar ļōmņak iien eo aō n̄an etal n̄an Latin America eaar jako indeeo ke Iaar joļo̧k jie aaō, bōtaab ālkin aō kadedeļo̧k master degree eo aō ilo Brigahm Young University, Iaar jerbale juon mijen ilo Colombia. Ke iaar pād ilo mijen, Iaar katakin kūlaj in piano ko. Iaar kōņaan likūt ippān Armej ro Rekwojarjar menin letok eo an al. Ajri ro im jodikdik ro in Colombia kar etetal m̧ail ilo bwil in al n̄an wōr iien eo em̧m̧an n̄an katak kōjan̄jan̄ piano. Raar ijjino kōn juon pā m̧ae iien raar eddōkļo̧k n̄an kōjan̄jan̄ kōn aolepen pā ko. Im raar kōm̧m̧ane elōn̄ ļo̧k karmejete ko jān kar n̄a ilo kijejeto ko aer n̄an katak kōjan̄jan̄ piano.
Em̧ōj an ļōn̄ļo̧k jān 50 iiō ko jān ke Iaar peptaij. Em̧ōj aō itok itak ettoļo̧k im jepelōklōk jān kapijuknen eo aō ilo Finland, bōtaab jekdo̧o̧n ia eo Iaar etal n̄an e, iien otemjej eaar wōr juon aikuj n̄an juon n̄an kōjan̄jan̄i al ko. Kajin eo ipeļaakin laļ in an al eaar kōm̧m̧an ekkeijel ko an meļeļe im iakwe ilo elōn̄ jikin ko.
Rainin pā ko peiū rōraļo̧k im kūrro. Elōn̄ ļo̧k rikōjan̄jan̄ ro rekekke em̧ōj aer bōk jikū. Jinō ekkā an en̄jake būrom̧ōj n̄e ej reilikļo̧k n̄an iiō ko aō im̧aan tata ilo Kabun̄ in im karmejete ko Iaar kōm̧m̧ani, m̧ail ko Iaar etetal, im men ko Iaar dipuki. Ej mijak bwe kūrro eo aō eaar jān m̧ōļo. Ijowōt ke, Ij kōņak “kinjen ko” aō kōn lan̄lōn̄. Iaar lutōki lan̄lōn̄ ko aō im būrom̧ōj ko n̄an al. Iaar katak n̄an ettōn̄ im jan̄ kōjerbal addi in peiū.
Būruō ej al kōn kam̧oolol n̄e Ij ļōmņak bwe Jemedwōj Ilan̄ im ritōl ro aō raar kea n̄an kajjitōk ippān juon leddik edik n̄an kakūrm̧ool juon ijjitōn̄ eidajon̄jon̄ āinwōt in. Kūr eo eaar jipan̄ eō bōk juon meļeļe epen kōn ko̧jpeļ eo im kar kōtļo̧k bwe in jipan̄ ro jet en̄jake Jetōb eo kōn al. Ij juon kam̧ool eo emour bwe rioktak kāāl ro rej aikuji juon kūr—jekdo̧o̧ņ leddik ro reddik kōn ejjeļo̧k kapeel ilo piano. Kōn kūr eo aō kein kajuon, Iaar lo bwe ippān Anij ejjeļo̧k men epen im bwe ewōr juon An karōk im juon kōttōpar n̄an kajjojo ajri ro Nejin. Im kōn al, Iaar bōk juon naan in kam̧ool edim kōn jepļaaktok eo an ko̧jpeļ eo an Jisōs Kraist.
Pija jen Mike Malm