Kajjitok ko im Uwaak Ko
“Etke Ij aikuj etal n̄an jemenere eļan̄n̄e Imaron̄ ekkatak jeje ko rekwojarjar kōn n̄a make?”
Aolepen naaj mour eo am̧ naaj ekkatak jeje ko rekwojarjar kōn kwe make, kōn menin eļan̄n̄e ej pād n̄an kwe, bōk em̧m̧an eo an iien eo em̧m̧an ilo jemenere n̄an ekkatak jeje ko rekwojarjar ippān rūkaki ro rem̧m̧an im ro m̧ōttam̧ kiiō.
Katak im ekkatak ium̧win tōl eo an juon rūkaki em̧m̧an ejipan̄ eok bōk juon ļōmņak eo ekāāl kōn jeje ko rekwojarjar me komaron̄ kar jab maron̄ lukkuun meļeļe kake. Rūkaki eo emaron̄ barāinwōt kwaļo̧k katak ko jān rikanaan ko im ritōl ro jet an Kabun̄ in me ej lewaj n̄an eok juon meļeļe eo em̧m̧anļo̧k kōn jeje ko rekwojarjar.
Barāinwōt, emakijkij an kam̧ōņōņō ļo̧k n̄an katak ippān kūlaj eo am̧. Kwonaaj wōr am iien n̄an kōnono kōn men ko kwoj loi ilo am̧ riit. Rijikuuļ ro m̧ōttan ilo kūlaj remaron̄ wōr aer en̄jake ko me kar kōm̧m̧an bwe jet eoon ren aer ko rem̧m̧an tatta. Ron̄jake en̄jake ko aer emaron̄ kepaak tok jeje ko rekwojarjar n̄an mour eo am̧. Im kōnke kwoj ekkatak ko̧jpeļ eo ippān ro jet, komaron̄ lem̧ōņōņō kōn kōjeram̧m̧an in kar kalim̧m̧ur kake: Eļan̄n̄e ruo ak jilu armej rej koba ie ilo etan Irooj, Enaaj pād ibwilijier (lale Lale D&C 6:32).
Jemenere ej barāinwōt ejake juon m̧ōņakjen n̄an ekkatak eo am̧. Kwoj m̧weiur n̄an riit ilo juon jon̄ak, eo ejipan̄ eok kam̧ōj kajjojo bok in jeje ko rekwojarjar. Ewōr an iien em̧m̧an n̄an ekōnono im kakilōklōk eoon ko n̄an jeļā jeje ko rekwojarjar Komaron̄ ilo ejjeļo̧k pere bōk eļapļo̧k jān jeje ko rekwojarjar jen bōk jemenere enan̄in jabdewōt wāween ko jet ilo tōre in ilo mour eo am̧.
Ro M̧ōttad Rekāāl, Ļōmņak ko Rekāāl
Ilo jemenere kwoj ioon ro m̧ōttam̧ rekāāl, im erom epaake ļo̧k doon, āinwōt juon baam̧le. Kwoj katak elōn̄ men ko rekāāl me koban kar jeļā kōn kwe make. Ekam̧ōņōņō im lukkuun ejetōbtōb. Ej kanooj lale bwe kwon jino raan eo am̧ ilo jim̧we. Eļan̄n̄e kwojjab bōk kuņaan kiiō, jinoe im enaaj ukōt mour eo am̧.
Katarina B., 16 iiō dettan, California, USA
M̧ōņōņō
Jemenere ej kōpeļļo̧k raan eo aō. Ej kōm̧m̧an bwe in juon armej em̧ōņōņō ļo̧k im ļap ļo̧k an kōņaan ekōnono kōn ko̧jpeļ eo ippān armej ro jet. Em̧wilaļ ļo̧k ad kōnono kōn jeje ko rekwojarjar, kōn menin eļap ļo̧k aō meļeļe.
Madi S., 15 iiō dettan, Colorado, USA
Koba Ippān Doon Eweppān
Jemenere ej juon en̄jake eo ekōbōkakkak. Jet iien ekkatak kōn kwe make ejjab bwe. Ekkatak an juon make im jemenere rej koba ippān eo eweppān. Rūkaki ro rekabwilōn̄lōn̄, im eļan̄n̄e ewōr jabdewōt am̧ kajjitōk, rūkaki ro am̧ im rijikuuļ ro m̧ōttam̧ ilo kūlaj remaron̄ jipan̄ uwaaki.
Dawson D., 15 iiō dettan, Idaho, USA
Ļap ļo̧k Meļeļe
N̄e Ij ekkatak jeje ko rekwojarjar make ļo̧k, ejjab ļap aō m̧ōņōņō in wōt n̄e Ij ekkatak ippān ro jet. Ekoba, jemaron̄ katak ļōmņak ko rōkaitoktok limo jān ro jet n̄e jej ekkatak jeje ko rekwojarjar ippān doon. Kōn jemenere em̧ōj aō kar katak kōn elōn̄ bwebwenato ko rōkaitoktok limo, im eļapļo̧k aō jeļā kōn kadkad eo an jeje ko rekwojarjar, eo ej kōm̧m̧an bwe ekkatak eo en ļapļo̧k an kaitoktok limo! Ij laudin̄din̄ bwe Iaar kālet n̄an kobaļo̧k ilo jemenere.
Rebecca M., 16 iiō dettan, Schleswig-Holstein, Germany
Naan in Kam̧ool Ekajoorļo̧k
M̧oktata, Irooj ej ba bwe ijo ruo ak jilu armej rej koba ie ilo Etan, Enaaj pād ippāer (lale Matu 18:20; D&C 6:32). En̄jake Jetōb eo An emaron̄ jipan̄ kōj kejōkļo̧kjeņ kōn ta eo Eaar kōm̧m̧ane n̄an kōj. Kein karuo, n̄e ekkatak jeje ko rekwojarjar ippān ro jet, jemaron̄ em̧m̧anļo̧k ad meļeļe ta eo kar je. Ilo ad ron̄jake doon, jemaron̄ ron̄ juon men eo me jejjan̄in kar kile ilo kōj make, im ejja men eo wōt emaron̄ waļo̧k ippān ro jet n̄e jejjab kwaļo̧k jeļāļo̧kjeņ eo ad. Kein kajilu, n̄e Ij etal n̄an jemenere, naan in kam̧ool eo ao ej kajoorļo̧k. Jemenere ej juon iien em̧m̧an n̄an kwaļo̧k naan in kam̧ool ko ad im ron̄jake naan in kam̧ool ko an ro jet. Ej jipan̄ kōj n̄an pād ioon iaļ eo ejim̧we.
Dmitri G., 16 iiō dettan, Dnipropetrovs’k, Ukraine
Katak jān Ro Jet
Ilo̧k n̄an jemenere ej juon menin aikuj n̄an n̄a. Ejja wōt rūkaki eo aō ekije ej katakin im kōmeļeļeik m̧ool ko loi ilo jeje ko rekwojarjar, bōtaab Ij barāinwōt katak eļap jān ekōnono ko an kūlaj eo am. Rijikuļ ro jet rej kwaļo̧k en̄jake ko aer kōn men ko raar katak, im raar jipan̄ eō bōk eļapļo̧k jeļāļo̧kjeņ kōn ko̧jpeļ eo im Rilo̧mo̧o̧r eo im Pinmuur eo An. Ejjab bwe n̄an ekkatak kōn n̄an make, bwe Iaar lo jet uwaak ko n̄an inepata ko aō ilo ekōnono ko an kūlaj eo. Imaron̄ kam̧ool bwe jemenere ej kōm̧m̧ane juon m̧ōttan elukkuun aorōk ilo najdik naan in kam̧ool eo aō kōn Kabun̄ eo an Jisōs Kraist em̧ool.
Denzel J., 15 iiō dettan, Western Samoa
Meram im M̧ool
N̄e Ij etal n̄an jemenere, Ij pukōt meram im m̧ool eo im kōņak aolepen nuknuk in tariņae an Anij (lale D&C 27:15–18). Nuknuk in tariņae eo ej jipan̄ eō kile Ainikien ilo iien ko otemjej im ilo jikin ko otemjej. Ekkatak jeje ko rekwojarjar aolep raan ej kōkajoorļo̧k tōmak eo aō im naan in kam̧ool eo aō im ej jipan̄ eō bwe in kajoor ilo mālijon̄ ko aō. Pād ilo jemenere ej juon iaan wāween ko rem̧m̧an tata n̄an pukōt meram im m̧ool eo im n̄an ekkatak jeje ko rekwojarjar im kejōkļo̧kjeņ kaki.
Nohemi M., 17 iiō dettan, Puebla, Mexico
Jilu Un ko
M̧oktata, kōnke Ikōņaan jerbale juon mijen, Ij pād ilo jemenere. Mijinede ro rej aikuj ruj in jibbon̄ tata im ekkatak ko̧jpeļ eo ilo jibbon̄. Pād ilo jemenere ej jipan̄ eō kōļapļo̧k iminene eo em̧m̧an kōn ruj in jibbon̄ tata. Kein karuo, ilo jibbon̄, jemourur, kōn menin jemaron̄ wujlepļo̧k ad ilo katak eo ad im ekkatak. Ejejjet n̄an kōjerbal awa ko rem̧m̧an tata ilo juon raan n̄an katak kōn Anij. Kajilu, eļan̄n̄e Ij ekkatak make iaaō, Imaron̄ jab meļeļe m̧wilaļin āinwōt an rūkaki eo aō jeļā. Kōn tōl eo an im katakin eo an, Imaron̄ katak eļapļo̧k jān aō kōm̧m̧ane kōn n̄a make.
H. Chen Yuan, 16 iiō dettan, T’ai-chung, Taiwan