2012
Katak Eļapļo̧k jen Kweilo̧k eo Eļap
Eprōļ 2012

Katak Eļapļo̧k jen Kweilo̧k eo Eļap

Jen Michael Barber and David Marsh

Ra eo ej loloorjake Laajrak in Kein Katak

Men̄e jej ba “amen” ilo jem̧ļo̧k in m̧wein̄an eo āliktata an kweilo̧k eo eļap, kwojkwoj ilo jetōb ejjab aikuj in jem̧ļo̧k ijo. Emaron̄ wōnm̧aanļo̧k wōt ilo ad ekkatak im kōjerbale katak ko jān kweilo̧k jab eo. Ilo aolepen iiō ko, rikanaan ro raar kōketak kōj n̄an kōm̧m̧ane āindein. N̄an waanjon̄ak, ilo 1946 eo, Būreejtōn Harold B. Lee (1899–1973) eaar libjōrjōr membōr ro n̄an kōm̧m̧an bwe kōnono ko an kweilo̧k eo “ren unin tōl n̄an wāween aer m̧akūtkūt im kōnono ilo allōn̄ ko jiljino tok.” Eaar kōmeļeļeik, “Men kein rej jerbal ko raorōk Irooj ej lo bwe rejejjet n̄an kwaļo̧k n̄an armej rein ilo tōre in.”1

Ilo 1988 eo, Būreejtōn Ezra Taft Benson (1899–1994) eaar bar ālij kapilōk jab in ke eaar katakin, “N̄an allōn̄ kein jiljino tok, māākjiin in kweilo̧k eo ami an Ensign eo aikuj jutak iturin jerbal kwojarjar ko am̧ im kōmakijkij lali.”2

Ilo jem̧ļo̧k in kweilo̧k eo eļap an Oktoba 2008 eo, Būreejtōn Thomas S. Monson eaar bar kwaļo̧k aorōk eo an ekkatak kōnono ko an kweilo̧k eo. Eaar ba: “Kōm̧m̧an bwe en to ad kememej ta eo jaar ron̄ ilo iien kweilo̧k in eļap. Ennaan ko me kar letok n̄an kōj renaaj waļo̧k ilo jeje ilo Ensign im Liaona māākjiin eo an allōn̄ in laļ. Ij libjōrjōre kom̧ n̄an ekkatak kake im kejōkļo̧kjeņ kōn katak ko aer.”3

Ilo ami ekkatak im kejōkļo̧kjeņ kōn ennaan ko an kweilo̧k eo, ta eo kom̧ maron̄ kōm̧m̧ani n̄an aer ļapļo̧k meļeļe eo aer ilo mour eo ami? Errein ej jet iaan elmakot ko n̄an jipan̄ kom̧ kōppopo n̄an, būki, im jerbale ekkar n̄an naan ko reim̧we:

Kōppopo n̄an bōk im̧we. Men̄e kom̧ij alooj, ron̄jake, ak riiti kōnono ko an kweilo̧k eo, kom̧ij aikuj kōpeļļo̧k būruōmi im ami ļōmņak n̄an im̧we eo ekwojarjar. Elder David A. Bednar an Doulul eo an Jōn̄oulruo Rijilōk ro eaar katakin bwe jekdo̧o̧n ta ewi jon̄an an wejepedik an juon rikōnono maron̄ katakin, “kam̧ōņōņō eo an juon ennaan im kam̧ool eo an Jetōb Kwojarjar rej dāiil bōro eo eļan̄n̄e wōt eo ej bōke ej kōtļo̧k bwe ren deļo̧n̄.” Eaar kōmeļeļeik bwe bōk im̧we “ej aikuji kijejeto eo ilo jetōb, kōļmenļo̧kjeņ, im ānbwin im jab ebbōk tak wōt ta ej itok n̄an kom̧.”4

Ļōmņak kein remaron̄ jipan̄ kōpooj kom̧ n̄an katakin jen Jetōb eo:

  1. Kōjeno̧lo̧k juon iien im ejaake juon mejatoto eo ejjeļo̧k-ekeroro ie me kom̧ maron̄ bōk im̧we ko ilo jetōb.

  2. Pukōt tōl eo ekwojarjar kōn jar.

  3. Kōllaajraki kajjitōk ko ak n̄ūrbōktak ko ami make me kom̧ij pukōt uwaak ko n̄an i.

Meļeļe ennaan ko. Rikanaan ro im rijilōk ro rej mour rej katakin, kōmeļeļeiki, kōketak, kakkōl, im kam̧ool. Kanooj lale kōnono ko aer renaaj jipan̄ kom̧ kōļapļo̧k ami meļeļe kōn ennaan ko aer. Ijin rej jet iaan kilen ekkatak ko rowejepedik:

  • Kajjitōk kajjitōk ko. N̄an waanjon̄ak: Ta eo Irooj ekōņaan bwe in katak jān ennaan in? Ekōjkan an kōnono in kōļapļo̧k meļeļe eo aō kōn juon pedped an ko̧jpeļ eo ak juon eoon jān jeje ko rekwojarjar? Bwebwenato ta ko kōjerbali n̄an kōmeļeļeik pedped ko an ko̧jpeļ eo, im ta eo Ij katak jān i?

  • Je juon laajrak. Kanooj leļo̧k ami n̄an ta laajrak eo an rikōnono ej arrome ļo̧k. Ajije kōnono eo n̄an m̧ōttan ko im je tukadu in me ej kōmeļeļeik ļōmņak eo eaorōk tata kwaļo̧ke ilo kajjojo m̧ōttan ko.

  • Kile aorōk ko rellōn̄ ilowaan kōnono eo. Jei men ko me rej āinwōt katak ko, eoon ko, bwebwenato ko, kakkōl ko, laajrak ko, naan in kam̧ool ko, kūr ko n̄an jerbal, im kōjeram̧m̧an ko kalim̧m̧ur kaki kōn pokake kapilōk eo.

  • Ekkatak kōn kōnono eo elōn̄ļo̧k jān juon kōttan. Emenin aorōk n̄an ekkatak m̧ool ko an ko̧jpeļ eo eļapļo̧k jān juon kōttan n̄an meļeļe kōn tallep in meļeļe eo im aorōk eo aer. Kajjojo iien kom̧ij ekkatak, kōm̧m̧an kakememej kōn ta eo ekāāl kom̧ij bōke.

Jerbal ioon ta eo kwoj katak. Eļan̄n̄e kom̧ij jar ilo ami ekkatak kōnono ko, kom̧ naaj lo ekōjkan an ennaan ko jerbal ilo mour eo ami. Kom̧ maron̄ jeļā ekōjkan n̄an kōm̧m̧ani oktak ko eļap meļeļeier jān kajjitōk kajjitōk ko āinwōt Ta eo Irooj ekōņaan bwe in kōm̧m̧ane kōn ta eo Ij katak? Im Ta eo Iaar katak me enaaj jipan̄ eō ilo baam̧le eo aō, jerbal, ak kūr eo ilo Kabun̄ in? Je im̧we ko bwe kom̧in jab meļo̧kļo̧k i. Eļan̄n̄e kom̧ij kōm̧m̧ane āindein, kom̧ naaj im̧we n̄an mour kōn katak ko im kom̧ naaj bōk kōjeram̧m̧an ko kar kalim̧m̧ur kaki.

Kweilo̧k eo eļap ej iien eo me Irooj ej kwaļo̧k An kilaan kōn ro Rikarejeran n̄an kom̧. Būreejtōn Spencer W. Kimball (1895–1985) eaar katakin, “Ejjeļo̧k bok ijello̧kin wōt jerbal ko rekwojarjar an Kabun̄ in aikuj in wōr juon jikin aorōk ioon rā ko ilo ļaibōrāre eo ami make—ejjab kōn ewi jon̄an em̧man jei ak ewi jon̄an aer kareel ilo aer jei, bōtaab kōn katak ko me rej ba kajien iaļ eo n̄an mour indeeo.”5

Kakeememej ko

  1. Harold B. Lee, ilo Conference Report, Epr. 1946, 68.

  2. Ezra Taft Benson, “Come unto Christ, and Be Perfected in Him,” Ensign, Māe 1988, 84.

  3. Thomas S. Monson, “Until We Meet Again,” Liahona, Nob. 2008, 106.

  4. David A. Bednar, “Seek Learning by Faith,” Liahona, Jept. 2007, 17, 20.

  5. Spencer W. Kimball, In the World but Not of It, Brigham Young University Speeches of the Year (May 14, 1968), 3.