Iaar En̄jake Ij Aikuj Itok
Aldo Fabio Moracca, Nevada, USA
Ruo im jimettan iiō ko ālkin peptaij eo aō ilo Buenos Aires, Argentina, naan ko an juon iaan elder ro me raar katakin eō raar āinwōt jan̄ ilo lo̧jiln̄ū: “Ijeļā kwoj juon mijinede.” Ij barāinwōt kememej uwaak eo ekajoor Iaar bōke ke Iaar jar n̄an jeļā eļan̄n̄e en̄jake eo me eaar dāil būruō eaar lukkuun m̧ool. Ke Iaar 20, Iaar jeļā Ij aikuj kōppopo n̄an juon mijen.
Bōtaab ekōjkan aō maron̄ erom juon mijinede? Iaar jab āinwōt likao ro rem̧m̧an me raar katakin eō ko̧jpeļ eo. Im ekōjkan aō maron̄ etal jān jerbal eo aō? Ia eo Inaaj kar mour ie ālkin aō ro̧o̧l tok n̄an kapijuknen? Eaar lukkuun pen n̄an lo juon jikin ewōr ippa, jekdo̧o̧n eaar juon ruum̧ edik ilo tulikin juon im̧ōn juon armej.
Ilo iaļ eo aō ļo̧k n̄an kapijuknen juon joten, en̄jake kein im pere ko raar bar itok n̄an ļōmņak. Ke Iaar tōpar kapijuknen, Iaar kajieon̄ n̄an kōm̧m̧ane juon jokālet. Iaar kālet n̄an bukwelōlō im kōm̧m̧ane juon jar kōn jipan̄. Ilo aō kar kōm̧m̧ane āindein, ewōr juon aō kar im̧we ekajoor me Ij aikuj etal im lo Leandro, juon m̧ōtta eo eaar juon kajoor n̄an eō ilo iien ko rōkabūrom̧ōjm̧ōj.
Bōtaab ļōmņak eo kōn karuji ilo lukōn bōn̄ eaar kōm̧m̧an bwe in jum̧ae ļōmņak eo. Iaar jeļā ej ruj in jibbon̄ tata n̄an etal n̄an jerbal, im Iaar jab kōņaan kōļaļļaļ ilo kōjām eo ilo awa eo. Iaar kakkōt ņae ļōmņak eo bōtaab wōnm̧aanļo̧k wōt n̄an en̄ajke im̧we eo n̄an lo e. Jekdo̧o̧n ta, Iaar kālet n̄an kowaane.
Ijjello̧kin, Iaar kālet n̄an etetal ipeļaakin jikin eo n̄an bōk mejatoto kāāl. Ke Iaar kememej bwe Iaar kōpeļļo̧k wōt kōjām eo aō, mekarta, Iaar jino ro̧o̧l n̄an kapijuknen eo. Ke Iaar deļo̧n̄, Iaar lo Leandro ej jijet ilo ruum̧ eo aō. Jetōb eo eaar pād iioō, im Iaar en̄jake aō jab emenono. Kōn juon ainikien eo ekajoor kōn en̄jake, Iaar kajjitōk ippān, “Kwoj ita ijin kiiō?”
“Ijjab jeļā,” eaar ba. “Iaar en̄jake Ij aikuj itok n̄an lo eok.”
Iaar jiron̄ e kōn pere ko raar pād ippa kōn juon mijen. Eaar kwaļo̧k naan in kam̧ool eo an n̄an eō im kar kōketak eō. Innām eaar jipan̄ eō kanne peba in mijen ko aō, eo Iaar bōkļo̧k n̄an bisop eo aō jibbon̄ eo juon. Ruo allōn̄ ko tok ālik Iaar bōk kūr eo aō n̄an Argentina Salta Mijen.
Ijeļā eo m̧ōtta eaar juon kein jerbal ilo pā ko pein Irooj bon̄ōn jab eo, im kōn aolepen būruō Ijeļā bwe Jemedwōj Ilan̄ ej ron̄jake im uwaaki jar ko me rej ba kōn juon bōro em̧ool im kōn lukkuun kōttōpar.