Kōjeram̧m̧an ko an Jemenere
Ilo aolepen laļ in, jemenere ej kepaaktok tok jodikdik ro āinwōt kwe n̄an epaakļo̧k Jisōs Kraist.
Kwojjab make ļo̧k ilo jokālet eo am̧ n̄an etal n̄an jemenere. Ilo aolepen laļ in, buki taujin jodikdik ro rej kōm̧m̧an bwe jemenere en juon m̧ōttan mour ko aer, jikrōkļo̧k ilo kūlajruum̧ ko kōn baj, kōrkōr, baajkōļ, im ebar lōn̄. Jet jodikdik rej ruj ilo jimarrok im ilo̧k ilo kōtaan ko raittok n̄an tōkākļo̧k ilo jejjet in awa eo, jet rej ilo̧k ilo jota, im ewōr ro jet rej ekkatak ilo m̧ōko win jet raan ko ilo wiik eo.
Etal n̄an jemenere ej aikuj karmejete, bōtaab jodikdik ro ipeļaakin laļ in rej lo bwe kobaļo̧k ilo jemenere ewōr tokjen kijejeto otemjeļo̧k. Im ro me rej bōk kuņaer ewōr juon men ejjab oktak ippāer: jeļā eo aer kōn jemenere ej kepaakļo̧k er n̄an Rilo̧mo̧o̧r eo im n̄an Jemedwōj Ilan̄.
Bōk Kōjeram̧m̧an ko kar Kalim̧m̧ur kaki
Etke jemenere ekanooj in aorōk n̄an kwe? Jet iaan un ko ekoba kōjeram̧m̧an kein jān rikanaan ro im rijilōk ro ilo raan-ko āliktata:
-
Ej “erom juon kōjeram̧m̧an jān Anij n̄an lo̧mo̧o̧r eo an Israel eo rainin im juon tōre eo elukkuun pen.”1
-
“Enaaj kōpooj eok n̄an kwaļo̧k ennaan eo an ko̧jpeļ eo kar kōjepļaaktok n̄an ro enaaj wōr am̧ iien em̧m̧an n̄an ioon er.”2
-
Ej jipan̄ eok “bōk meļeļe eo eaorōk an m̧ool eo.”3
-
Jemenere “ej letok iien ko rem̧m̧an raiboojoj n̄an katak katak ko me renaaj kōm̧m̧an bwe kwon m̧ōņōņō. Ej letok iien ko rem̧m̧an raiboojoj n̄an ikitōltōl ippān ro me āinwōt tōmak eo aer āinwōt kwe.”4
-
“Jeļāļo̧kjeņ eo am̧ kōn ko̧jpeļ eo enaaj ļapļo̧k. Tōmak eo am̧ enaaj kajoorļo̧k. Kwonaaj ejaaki m̧ōttā ko im jemjerā ko rem̧m̧an.”5
-
“Ej kwaļo̧k … kōjeram̧m̧an ilo jetōb, kajoor in mour in n̄an jum̧ae nana eo me ej pād ipeļaakid, barāinwōt juon ļapļo̧k eo eļap ilo meļeļe ko̧jpeļ eo.”6
-
Ej “juon iaan kōppopo ko n̄an juon mijen.”7
Pukōt juon Wāween n̄an Pād ie
Ilo̧k n̄an jemenere emakijkij an meļeļe in kwonaaj aikuj in kowaan jabdewōt men kwoj m̧ōņōņō kōm̧m̧ane n̄an am̧ maron̄ lo iien n̄an pād ie. Bōtaab ej juon karmejete me ewōr tokjen kōm̧m̧ane. Elijah Bugayong jān Philippines eaar kālet n̄an kōm̧m̧ane jokālet jab in ilo iiō eo āliktata an ilo high school. Ilo aolepen tōren high school eo, eaar iien otemjej kein karuo ilo kūlaj eo an. Eaar ļōmņake n̄an likūt m̧oktata iiō eo an āliktata im em̧ool kar ļōmņak in jab deļo̧n̄e jemenere, eo me eaar pād ie ilo iiō ko m̧okta, n̄an an maron̄ tōpar menin kōttōpar eo an.
Innān juon raan ļōmņak ko an raar oktak. “Iaar [kalimjōk] tebōļ in ekkatak eo aō,” ej ba. “Iaar lo juon ejouj in bok ko repaak e, jeje ko rekwojarjar aō koba ippān bok in jeje eo aō ilo jemenere im bok in katak eo. Itum̧wilaļ ilowaaō Iaar kajjitōk ippa make, ‘Eo wōt eo eaorōk tata?’”
Elijah eaar lo uwaak eo an ilo Matu 6:33: “A kom̧win pukot m̧okta aelōn̄ in Anij, im kwojarjar eo An; im naaj koorļo̧k men kein otemjej n̄an kom̧.” Eaar jokālet n̄an tiljek in pād ilo jemenere im pukōt wāween ko jet n̄an kōjeppane iien ko an n̄an an maron̄ jerbale ekkatak ko an ilo jikuuļ. Ilo jem̧ļo̧k in iiō eo, kar kwaļo̧k bwe ej eo em̧m̧an tata an katak im em̧ool eaar wini juon jāān in jikuuļ an univeristy.
Spencer Douglas jān Alabama, USA, eaar jokālet n̄an joļo̧k jet iaan iien iiaio ko bwe en maron̄ bōk eļap jān jemenere. Ium̧win iiō ko ruo m̧oktata in an jemenere, eaar ruj ilo 4:00 a.m. n̄an pād, im iiō ko ruo āliktata eaar ruj ilo 5:00 a.m. Ej ba, “Iaar jab maron̄ kobaļo̧k ilo elōn̄ iaan m̧akūtkūt ko eto aer kōm̧m̧an ilo jota ippān ro m̧ōtta kōnke Iaar aikuj m̧ōkaj aō kiki. Eļan̄n̄e iban kar, Ijjab maron̄ in kar lukkuun bōk kuņaō im katak ilo jibbon̄ōn eo juon.” N̄an Spencer, eaar jab baj kōn jedeļo̧k wōt n̄an kūlaj, eaar barāinwōt kōn lukkuun ruj im kōppopo n̄an katak.
Elder Dallin H. Oaks an Doulul eo an Jon̄oulruo Rijilōk ro eaar katakin: “Kōnke juon men em̧m̧an ejjab bwe juon un n̄an kōm̧m̧ane. Oran men ko rem̧m̧an jemaron̄ kōm̧m̧ani retōr jān jon̄an iien eo ewōr n̄an kadedeļo̧ki. Jet men rem̧m̧anļo̧k jān em̧m̧an, im men kein rej men ko me rej aikuj men ko eļap aer kūnōōr ad ilo mour ko ad.”8 Ej juon kapilōk aorōk n̄an kememej ilo am̧ jokālet ekōjkan kōm̧m̧an bwe jemenere en aorōk ilo jikejuuļ eo am̧.
Kōppopo n̄an Mijen ko
Jemenere ej barāinwōt jerbal āinwōt juon kōppopo eo eaorōk n̄an jerbal in mijinede eo kwonaaj kōm̧m̧ane—āinwōt juon membōr mijinede rainin im barāinwōt eļan̄n̄e kwoj jerbal āinwōt juon mijinede ej jerbal aolep raan ilju im jekļaj. Franco Huamán Curinuqui jān Peru ejeļā bwe ekkatak jeje ko rekwojarjar an ilo jemenere eaar jipan̄ e kōppopo n̄an mijen eo an.
Ej ba kōppopo in ewōr tokjen ruj n̄an jemenere ilo 4:00 a.m., iuwe ļo̧k ioon kōrkōr ko ke allōn̄ in ibwijlep eo eaar pād ilo eria eo, innām etetal ilo pedkat n̄an pād ilo kūlaj eo. Ej ba, “Ikōņaan kōjem̧ļo̧k aō jemenere im jino kūlaj in institute ko n̄an maron̄ in kōppopo n̄an juon mijen. Inaaj eddōkļo̧k wōt ilo Kabun̄ in.” Jemenere ej aorōk n̄an e kōnke ej katak kōn jeje ko rekwojarjar im kakilōklōki eoon ko raorōk, ko renaaj jipan̄ e juon mijinede em̧m̧an.
Jeram̧m̧an ilo Aolep M̧ōttan ko an Mour
Ilo an jodikdik ro ipeļaakin laļ in kōm̧m̧ane kijejeto eo n̄an pād ilo jemenere, rej bōk kajoor eo ilo eļapļo̧k jān ekkatak jeje ko rekwojarjar. Cameron Lisney jān England eaar lo bwe eaar jeram̧m̧an ilo aolep eria ko ilo mour eo an. “Ejjab wōt jemenere eaar jipan̄ kōn men ko ilo jetōb, bōtaab barāinwōt ej jipan̄ ilo jikuuļ im jeļāļo̧kjeņ,” Cameron ej ba.
Ej ba bwe “juon ijjino eo em̧ōkaj n̄an raan eo ej jino jerbal kōmelij eo am̧. Jet iaan ro m̧ōtta raar ba raar lukkuun boub n̄an pād—ekwe, ejjab āinwōt n̄e kwoj tōn etale math ilo 6:00 a.m., kwoj ke?” Ilo am̧ ekkatak, “Irooj enaaj jipan̄ eok ilo teej ko am̧, im eļan̄n̄e kwoj etal n̄an jemenere, Enaaj jipan̄ eok em̧ool eļapļo̧k,” Cameron ej ba.
Aaet, jemenere eaar jipan̄ Cameron kōkajoorļo̧k naan in kam̧ool eo an barāinwōt. Ej ba, “Jinoin naan in kam̧ool eo aō eaar itok jān būrookraam̧ in jemenere eo. Ilo dettan eo an jodikdik 14, Iaar lukkuun jorrāān ilo ko̧jpeļ eo. Eaar jab itok limoū ilo jar, im Iaar kōm̧m̧ani men ko me Ijjab aikuj in kar būki. Eaar jejjo wōt allōn̄ ko m̧okta jān aō naaj kar ajeļo̧k aolepen aō.” Bōtaab ke juon m̧ōttan Cameron eaar karuwaineneiki n̄an pād ilo jemenere, eaar jokālet n̄an etal ippān. Innām kōjeram̧m̧an ko raar lukkuun jino itok.
“Iaar jino en̄jake Jetōb eo bar juon alen,” Cameron ej ba. “Iaar jino leļo̧k aō n̄an m̧ōn jar eo im kar jino pād ilo Jabōt Jikuuļ eo aō im katak ko an priesthood. Eaar jino pidodoļo̧k, im Iaar jino en̄jake m̧ōņōņōļo̧k. Āliktata Iaar bōk juon naan in kam̧ool kōn ko̧jpeļ eo kōn n̄a make.” Ālkin ruo allōn̄ ko in jemenere, Cameron eaar ioon bisop eo an im kar kapiti juon rūkaki ilo Priesthood eo an Aaron.
Cameron ejeļā bwe jemenere ej jipan̄ e jutak pen ņae kapo ko an laļ in. “Ilo an jemenere kar wōnm̧aanļo̧k wōt,” ej ba, “Iaar lo an pidodoļo̧k n̄an ņa mejļan apan̄ ko me laļ in ej kwaļo̧ki. Ebwe an pen n̄an erom juon jodikdik ilo laļ in jej mour ie—jerawiwi ej jepooļ kōj jān aolep jikin. Ij kam̧ool n̄an kwe bwe eļan̄n̄e kwoj pād ilo jemenere, kwonaaj lo kajoor eo n̄an bōbraik eok make ņae jerawiwi. Jemenere ej ejaake juon kattōrak ilo jetōb n̄an kejparok eok. Elōn̄ kain mālijon̄ ko im kapo ko raar itok n̄an ilo iaļ eo aō, im jemenere eaar juon jipan̄ eļap ilo dāpij eō ilo iaļ eo erāinin̄ im eaidik.”
Kōkajoorļo̧k Doon
Jemenere ej barāinwōt kōm̧m̧an bwe kwon kuk ļo̧k ippān jodikdik ro jet me rej kwaļo̧k ejja tōmak ko wōt am̧. Vika Chelyshkova jān Russia ej ba, “Ij im̧we kōn armej ro kajjojo ewōr juon wōt aer ļōmņak me rej mour kōn jon̄ak ko an mour reier wōt juon im ro rej tōmak ilo Anij āinwōt N̄a. Ej kakobaba, “Eļan̄n̄e ewōr aō jabdewōt kajjitōk ko, Imaron̄ ekōnono kaki ippān rūkaki in jemenere eo aō im rijikuuļ ro jet. Imaron̄ kwaļo̧k ļōmņak ko aō im naan in kam̧ool eo aō ippān ro jet n̄an kōkajoorļo̧k tōmak eo aō make im tōmak eo an ro jet. Jen riiti jeje ko rekwojarjar ippān doon im kejōkļo̧kjeņ kōn kam̧ōņōņō eo ilo jetōb, jej epaakeļo̧k Anij im doon.”
Ksenia Goncharova jān Ukraine em̧ōj an bar lo ejja tōprak kein wōt. Ej ba, “N̄e jej kwaļo̧k en̄jake ko ad ippān ro jet, jej erom kajoorļo̧k im em̧m̧an ļo̧k ad meļeļe jeje ko rekwojarjar. N̄e jej kōnono kōn waanjon̄ak ko jān mour ko ad ilo tōre in katak ko, Ij lo wāween eo ko̧jpeļ eo ej jerbal ilo mour eo aō im ilo mour ko an ro jet.”
Ksenia Goncharova jān Ukraine
Juon kumi in jodikdik ejjab to kar kajjitōk ekōjkan an jemenere kar kōjeram̧m̧an er. Uwaak ko aer rej kwaļo̧k juon unin kōnono eļap—me jemenere ejipan̄ er epaakeļo̧k Jemedwōj Ilan̄ im Rilo̧mo̧o̧r eo. Elder David A. Bednar an Doulul eo an Jon̄oulruo Rijilōk ro eaar katakin: “Aolep unin kōnono ko me kwoj ekkatak ilo jemenere rej aorōk. Kajjojo iiō ilo am̧ kalimjōk wōt ioon juon iaan jeje ko rekwojarjar, kalimjōk eo eaorōk tata ej Irooj Jisōs Kraist.”9
Errein ta eo jet iaan jodikdik ro raar ba kōn ekōjkan an jemenere kar kepaakļo̧k er n̄an Jisōs Kraist.
-
“Iaar katak ta eo Rilo̧mo̧o̧r eo eaar kōm̧m̧ane n̄an eō, riiti aolepen bwebwenato kein jān elōn̄ rikanaan ro im kile ewi aorōk in n̄a n̄an E. Ij kile bwe Eaar iakwe eō n̄an mej im en̄taan kōn metak eo aō.”
-
“Jemenere ej juon wāween eo em̧m̧an n̄an aō jino juon raan. Jekdo̧o̧n ta ewi jon̄an aō kar m̧ōk, Ij en̄jake Jetōb eo im en̄jake kōkajoorļo̧k bwe n̄e men ko reppen rej waļo̧k tok ilo raan eo aō, Ijeļā ilo ejjeļo̧k pere bwe aō Rilo̧mo̧o̧r ej iakwe eō, im eļap aō lōke n̄an jutak ņae ta eo ejim̧we.”
-
“Ij juon rioktak n̄an Kabun̄ in. Iaar jino bōk jemenere m̧okta jān aō kar peptaij. Ilo an ejjeļo̧k jemenere, Ijjab jeļā eļan̄n̄e Inaaj kar peptaij ļo̧k wōt n̄an jidik. Ilo an ejjeļo̧k jemenere, Eban kar wōr Rilo̧mo̧o̧r ilo mour eo aō kiiō ak jeļā bwe maron̄ kar jeorļo̧k jerawiwi ko aō. Ejjamin n̄an lukkuun wōr Jemedwōj Ilan̄ ak Jisōs Kraist ilo mour eo aō. Jemenere eaar jipan̄ eō Loi im kōm̧m̧an bwe Ren erom juon m̧ōttan mour eo aō indeeo im mour eo an ajri ro nejū ilju im jekļaj.”
-
“Ilo̧k n̄an jemenere aolep raan eaar jipan̄ eō epaakeļo̧k aō Irooj im Rilo̧mo̧o̧r, Jisōs Kraist, kōn katak kōn katak ko An, An iakwe eļap n̄an eō, im ekōjkan Aō maron̄ bar ro̧o̧l n̄an mour Ippān.”
-
“N̄e Ij pād ilo jemenere, Ij lo juon meļeļe em̧wilaļ ilo jeje ko rekwojajar. Ej jipan̄ kakememej eō aolep jibbon̄ n̄an āinwōt Kraist ilo jerbal ko aō kajjojo raan.”
-
“Jemenere eaar katakin eō wāween riiti jeje ko rekwojarjar aō im ejjab wōt n̄an lem̧ōņōņō kake ak barāinwōt n̄an kōjerbal ta eo Ij riiti ilo mour eo aō. Iaar katak katak ko im pedped ko me raar jipan̄ kōkajoorļo̧k naan in kam̧ool eo aō kōn juon Jemed Ilan̄ eo ej iakwe im Jisōs Kraist, eo Inaaj bōke ippa ilo aolepen mour eo aō.”
Ippān kōjeram̧m̧an ko rekanooj in ellōn̄ me rej itok jān pād ilo jemenere, epidodo n̄an lo etke jodikdik ro ipeļaakin laļ in rej kōm̧m̧ane en juon im̧aan tata ilo jikejuuļ ko aer.
Pija eo kōn jipan̄ an CES; pija ko jān Scott Greer
Pija jen Christina Smith
Ituanbwijmaron̄: Pija in Provo, Utah, rikadiwōjļo̧k in jemenere ro jipan̄ an LDS Church Archives