Iien Kōnono
“Inaaj kautiej jino im jema im kōm̧m̧ane ijo kunao n̄ankōkajoorlok baam̧le eo aō.” (Jon̄ok ko Aō Ilo Ko̧speļ).
Ekwe, aolep. Jen kōm̧m̧an iien kōnono,” M̧am̧a eo eaar ba.
Josie eaar erreim̧aanļo̧k n̄an iien kōnono eo ilo aolepen raan eo. Aolep jota, Josie im ļaddik ro jatin, Ben im Wes, raar koba ilo ettōņaak eo ippān M̧am̧a im Baba n̄an kōnono kōn ta eo eaar waļo̧k ilo mour ko aer.
Joten in Baba eaar ba enaaj kar jipan̄ Josie kamineneik eoon eo an n̄an kōjeļļā ko jibbon̄ōn eo. Riiti kōjeļļā ko an jibbon̄ōn eo eaar juon iien ejeno̧lo̧k ilo jikuuļ eo an Josie. Ilju Josie eaaj kar kōjan̄ jidik in al eo an em̧m̧an ippān ilo kein kōnono ko an jikuuļ eo im kōjerbal kein kōnaan eo n̄an kwaļo̧k m̧akūtkūt ko an raan eo im ta eo ilo m̧ōn̄ā in raelep eo.
Josie eaar ettōrļo̧k n̄an ettōņaak eo, kar lem̧ōņōņō in kōmālmel e eoon eo an.
“En̄in ej rikōjeļļā eo ad ebun̄bun̄!” Baba eaar ba ke Josie eaar kelōn̄ļo̧k ioon kauuj eo iturin. “Ewi am en̄jake kōn ilju?”
“Ij lem̧ōņōņō bōtaab ikūm̧kūm jidik. Imijak Inaaj kabōd jet men im̧aan aolepen jikuuļ eo,” Josie eaar ba.
“Ej en̄in etke jej kōmālmel,” Baba eaar ba. “Etal wōt im riiti aolepen eoon eo am̧, im Inaaj ron̄jake n̄an jikin ko komaron̄ kōkōm̧anm̧anļo̧k.”
“Kom̧ool, Baba,” Josie eaar ba.
E im Jemen raar bar etale eoon eo elōn̄ kōttan jon̄an Josie eaar jab jeļā jete eo. Innām Josie eaar jutak im kōm̧m̧ane eoon eo an āliktata n̄an baam̧le eo an. M̧am̧a im Baba raar kabbokbok. Ben eaar kabbokļo̧k e pein ippān pein Josie, im Wes eaar ettōn̄ im kabbokboke pein.
Josie eaar ilo̧k n̄an jikin kiki m̧ōņōņō im lōke.
Raan eo juon aolep men raar ilo̧k ilo aer meeoeo. Jekdo̧o̧ņ n̄e eaar ikūm̧kūm, Josie eaar ettōn̄ ke eaar ron̄ al eo an kar jan̄ ilo kein kōnono ko an jikuuļ eo. Eaar laudin̄din̄ bwe eaar kōmālmel e eoon eo an ippān Jemen, im eaar raļo̧k im alikkar an riiti ilo an ejjeļo̧k jabdewōt bōd ko.
“Kwar kōm̧m̧ane juon jerbal ejejjet,” Mrs. Blake, rijipan̄ būrinjebōļ eo, eaar ba.
Ilo jem̧ļo̧k in raan in jikuuļ eo, Josie ekar jutak ilo ļaiin eo n̄an baj eo. Juon ļaddik erūttoļo̧k eaar oktak ļo̧k im kar kajjitōk, “Kwe ke leddik eo me aar riiti kōjeļļā ko rainin?”
Josie eaar ettōn̄. “Aaet, eaar ba.
“Etke kwar kālet al jab eo?” ļaddik eo eaar kajjitōk. Eaar juon al bwebwe. Kwar lukkuun kakkure kōjeļļā ko an jibbon̄ōn eo.” Innām eaar kūr e juon āt nana im kar ettōn̄ ippān ro m̧ōttan.
Josie eaar jijet ilo jea eo im̧aan baj eo make ļo̧k. Eaar en̄jake an nan̄inmej.
Ke Josie eaar tōpar m̧weo, eaar lo bwe Jinen ej ikkure ippān Wes.
“M̧am̧a, Ijeļā ejjan̄in iien kōnono, bōtaab Iaar ļōmņak eļan̄n̄e kejro maron̄ in wōt kōnono kiiō,” Josie eaar ba.
“Aaet, Josie,” M̧am̧a eaar ba. “Ta eo eaar waļo̧k? Ewōr men eaar bōd ke ilo kōjeļļā in jibbon̄ ko?”
“Jaab,” Josie eaar ba. “Aolep men raar jejjet. Āindein aō kar ļōmņak, m̧ae iien eo juon ļaddik eaar jiron̄ eō Iaar kālet juon al bwebwe. Eaar kūr eō juon āt eo elukkuun in nana barāinwōt.”
M̧am̧a eaar den̄ōt laļ iturin. Josie ear etetal ļo̧k im jijet laļ ļo̧k. M̧am̧a eo an eaar atbakwōje. Josie im M̧am̧a eo an raar kōnono kōn aolep men me eaar waļo̧k ilo raan jab eo, ekoba naan in nōbar eo an Mrs. Blake.
“Joļo̧k bōd bwe ļaddik eo im ro m̧ōttan raar lāj n̄an eok,” M̧am̧a eo an eaar ba. “Bōtaab ej āinwōt bwe armej ro jet kwoj kautiej, āinwōt Mrs. Blake, eaar lukkuun m̧ōņōņō kōn wāween am̧ riiti kōjeļļā ko. Baba im n̄a eļap am utiej būruōm̧ kōn kwe. Kwar lukkuun buuļ jerbal, im etōprak!”
Josie eaar atbakwōj M̧am̧a eo an bar juon alen. “Kom̧ool, M̧am̧a,” Josei eaar ba. “Em̧m̧an ļo̧k aō mour.” Josie eaar laudin̄din̄ bwe jabdewōt iien emaron̄ iien kōnono.
Pija jen Jared Beckstrand