Kōnono Rainin
Elder Christofferson, Elder Jensen rej Katakin Membōr ro ilo Argentina
Ilo Jadede, Nobōm̧ba 12, 2011, Elder D. Todd Christofferson jen Doulul eo an Jon̄oulruo Rijilōk ro im Elder Jay E. Jensen jen Būreejtōnji eo an Jiljilimjuonn̄oul eo kar kōnono n̄an jodikdik ro, rūm̧m̧an ded ro, im ritōl ro an priesthood eo, mijenede ro, membōr ro ilo Salta, Argentina.
Barāinwōt eaar pād Elder Mervyn B. Arnold, Būreejtōn eo an South America South Eria; lio pāleen, Devonna; im Elder Ruben Spitale, Eria Jiljilimjuonn̄oul eo. Lio pāleen Elder Christofferson, Kathy, im lio pāleen Elder Jensen, Lona raar barāinwōt pād.
Epaakeļo̧k 1,300 jodikdik ro im ro jinen im jemen ro raar pād ilo jar in jota eo me Elder Christofferson im Elder Jensen raar jim̧or kōnono. Bar 10,000 membōr ro ilo 70 stake ko aolepen Argentina raar alooj kōn kadiwōjļo̧k.
Elder Jensen, eo eaar im̧aanļo̧k kar jerbal āinwōt Eria Būreejtōn eo an South America South Eria eo, eaar ba, “Eļan̄n̄e kom̧ij jab kememej jabdewōt men Iaar ba, Ikōņaan bwe kom̧in kememe juon naan jān rikanaan eo ad, Būreejtōn Thomas S. Monson, eo Ij kam̧ool ej juon rikanaan eo an Anij em̧ool. En̄in ej naan eo: Jokālet ko rej ļōmake jem̧ļo̧k eo.’”
Ewōr ad anemkwōj—maron̄ eo im jim̧we eo n̄an kōm̧m̧an jokālet ko—Elder Jensen eaar ba, im kōn jokālet ko jej kālet jem̧ļo̧k ko ad.
Eaar kwaļo̧k bwebwenato eo kōn juon m̧ōttan eo me eaar kālet juon bon̄ n̄an an kadōk im kattōr im kar kōm̧m̧ane juon jorrāān eo me kar kamej ruo armej. Eaar keidi menin ippān bwebwenato eo kōn kālet eo an im lio pāleen n̄an karum̧wijļo̧k m̧are eo aerro bwe en maron̄ jerbale juon mijen āinwōt juon likao.
“Ilo [rool eo aō] kōm̧ kar m̧are ilo tampeļ. Kōm̧ kar kōm̧m̧ani bujen ko, ko kōm̧ij bar kōkāāli aolep wiik ilo aolepen mour ko am. Kōm̧ kar kōm̧m̧ane juon jokālet me eaar ļōmake jem̧ļo̧k eo am.” eaar ba.
Sister Christofferson eaar kwaļo̧k ālkin, kwaļo̧k naan in kam̧ool eo an kōn kōjeram̧m̧an ko an kōjparok bujen ko, im Elder Christofferson eaar kōjem̧ļo̧k kweilo̧k eo.
“Men eo de eo kom̧ij aikuji ej iakwe im tōmak,” Elder Christofferson eaar ba. “Ej tōmak eo me ej jipan̄ kōj ilo m̧are eo ad, baam̧le eo, jerbal eo, [im] jikin jerbal eo.”
Eaar kalikkar bwe kien ko rej letok tōl n̄an mour ko ad im jipan̄ kōj bōk ta eo elukkuun in aorōk.
Innām eaar kapilōk jodikdik ro im ro jinen im jemen jim̧or n̄an kōm̧m̧ane juon kalim̧m̧ur n̄an ļoor kapilōk eo loe ilo Non kokajurļok Jodrikdrik ro bok eo.
“Menin enaaj ļap an kōkajoorļo̧k ajri ro nejimi, em̧ool n̄e rej lo aer make ļo̧k—jeļā bwe ro jinier im jemeer rej mour kōn ejja pedped kein wōt.”
Elder Christofferson eaar kōjem̧ļo̧k kōn kwaļo̧k an iakwe n̄an membōr ro ilo Argentina, ijo eaar jerbal in mijen ie epaakeļo̧k lemn̄oul iiō ko rem̧ootļo̧k.
Ilo aer kar pād ilo Salta, Elder Christofferson im Elder Jensen raar barāinwōt kweilo̧k ippān mijenede ro ijo im rūm̧m̧an ded ro, me raar kwaļo̧k iakwe eo an Em̧m̧aan ro.
Elder Christofferson im Elder Jensen raar jim̧or kōnono n̄an mijenede ro jān Argentina Risistencia Mijen eo jino in Nobōm̧ba 2011.
Pija jen James Dalrymple