Ļo̧mņak ko Kōn Nokōn in Jota an Baam̧le
Peba in epād e bwebwenato im m̧akūtkūt ko me remaron̄ in jerbal n̄an iien Nokin in Jota an Baam̧le. Laajrak in ej ruo waanjon̄ak ko.
“Kōjeram̧m̧an ko an Jemenere,” peij 21: Etale bwebwenato eo im̧aanļo̧k im ļōmņake ewi jejjet tata in n̄an kōjerbale ennaan eo n̄an baam̧le eo ami. Eļan̄n̄e ewōr nejimi jodikdik ro ilo jemenere, jino kōn kajjitōk ippāer etke jemenere ej aorōk n̄an er. Innām riiti m̧ōttan eo ņa etan “Bōk Kōjeram̧m̧an ko kar Kalim̧m̧ur kaki.” Rōjan̄ ajri ro reddikļo̧k n̄an kōppopo n̄an pād ilo jemenere n̄e ebwe aer rūttoļo̧k. Eļan̄n̄e ejjeļo̧k nejimi jodikdik ro repād ilo iiō in jemenere, komaron̄ in kōņaan riiti bwebwenato eo innām ekōnono kōn aorōk eo an jemenere n̄an jodikdik ro rainin.
“Aolep Rejeļā Kajien Bleck,” peij 42: Ļōmņak in al “Kōmmōne Ta Eo Ejimwe” (al, nōm̧ba 237) āinwōt al in kōpeļļo̧k eo. Riiti ak ba tukadu in bwebwenato eo kōn Bleck. Kajjitōk ippān ro uwaan baam̧le eo n̄an kwaļo̧k juon en̄jake ke raar aikuj in kōm̧m̧ane juon jokālet epen ikōtaan iaļ ko roktak im ta kaje ko raar itok jān jokālet eo raar kōm̧m̧ane. Kōjem̧ļo̧ke jān riiti kout eo jān Būreejtōn Thomas S. Monson.
Pidodo, Ineem̧m̧an, im Jab Meļo̧kļo̧k
Eaar juon nokon in jota an baam̧le eo jab meļo̧kļo̧k ippān leddik ro ruo nejim reddik, Angelique, 6 iiō dettan, im Bethanie, 4 iiō dettan. Ļeo pāleeō im n̄a kar oļo̧k ļo̧k n̄an jea ko am̧ro, kar m̧ōk im jab jeļā ia eo n̄an ijjino. Kōn menin leddik ro nejim raar bōk eddo eo im kōro̧o̧l will in kūr eo an nokon in jota an baam̧le eo, letok n̄an kōm kajjojo jerbal. Jerbal eo an ļeo pāleeō eaar n̄an kōjeikiik, Bethanie eaar bōk al, Iaar bōk eddo in m̧akūtkūt ko, im Angelique eaar letok katak eo.
Béthanie eaar kālet “I Love to See the Temple” (Children’s Songbook, 95), im kōm̧ kar al kake ippān doon. Baba eaar letok jar in kōpeļļo̧k eo. Innām Angélique eaar bōk juon mākjiin eo ekāāl tata an Liaona eo im kālet juon bwebwenato ilo m̧ōttan eo an ajri ro. Ej katak ewi wāween riiti ilo jikuuļ, kōn menin eaar riiti bwebwenato eo n̄an kōm. En̄jake eo ilo kapijuknen eo am eaar juon eo eineem̧m̧an. Jetōb eo eaar kam̧ool bwe ta eo eaar riiti eaar m̧ool.
Kōm kar ikkure jet ikkure ko ippān doon, im Iaar kōm̧m̧ane jar in ikkilōk. Ke Iaar jar, Iaar jab maron̄ bōjrak jān kam̧oolol Jemedwōj Ilan̄ kōn Jetōb eo An im iakwe eo im barāinwōt kōn kōjeram̧m̧an kapijuknen eo am kōn jetōb kein reddik. Ļeo pāleeō im n̄a jeļā bwe eddo eo am ej n̄an kōjparok er im n̄an katakin er ko̧jpeļ eo. Kōm̧m̧an nokon in jota an baam̧le ej m̧ōttan wōt eddo jab in ekwojarjar.
Sylvie Poussin, Réunion