Ta eo ej Itok ālkin Jemenere?
Kadiwōjļo̧k jān jemenere ejjab jem̧ļo̧k eo an ekkatak ko an kabun̄. Juon men eo eaiboojoj kar kōpooj n̄an eok.
Ilo jemenere kwoj ekkatak jeje ko rekwojarjar im bōlen ioon ro jet dettaer wōt kwe iien otemjej. Kwoj en̄jake karuwainene, im komaron̄ en̄jake Jetōb eo. Kōn menin n̄e kwaar kadedeļo̧k jemenere, en̄jake kein rej ke jem̧ļo̧k? Lukkuun in jaab.
Būrookraam̧ eo an institute an Kabun̄ in ej bun̄tōn eo tok juon, im kwonaaj iakwe. Men̄e kwoj etal n̄an college ak jaab, komaron̄ wōnm̧aanļo̧k wōt n̄an katak kōn ko̧jpeļ eo, kōppopo n̄an juon mijen im m̧are ilo tampeļ, im kwaļo̧k en̄jake ko ippān ro jet dettam̧ wōt.
Errein rej jet iaan uwaak ko n̄an kajjitōk ko raorōk kōn institute. Komaron̄ lo elōn̄ļo̧k ilo institute.lds.org.
Ta in institute?
Institute epād ie kūlaj ko kōn ekkatak kōn ko̧jpeļ eo, ekoba kūlaj ko kōn jeje ko rekwojarjar, katak ko an rikanaan ro, im kōppopo n̄an juon mijen ak m̧are ilo tampeļ. Ilo jet institute ko komaron̄ kālet jān elōn̄ kūlaj ko.
Wōn emaron̄ pād ie?
Aolep rūm̧m̧an ded ro rej lukkuun kōketak er n̄an pād ilo kūlaj ko an institute. Jabdewōt—raar m̧are ak jab m̧are—ikōtaan iiō ko 18 n̄an 30 maron̄ pād ie.
Ia eo Imaron̄ lo institute?
Jet eria ewōr im̧ōn institute ko repāāke college ko im university ko. Ilo eria ko jet kūlaj ko rej kōm̧m̧an ilo m̧ōko im̧ōn Kabun̄ ak jikin ko jet. Kūr ļo̧k bisop eo am̧ ak branch būreejtōn eo n̄an katak kōn būrookraam̧ eo an institute ilo eria eo am̧, ak etal n̄an institute.lds.org n̄an pukōt juon institute epaake eok.
Etke Ij aikuj ebbōk kūlaj in institute ko?
Būreejtōn Thomas S. Monson eaar ba: “Kōm̧m̧an bwe bōk kuņaam̧ ilo institute ej im̧aan tata. … Ļōmņak kake. Naaj wōr m̧ōttam̧, Jetōb naaj en̄jake, im tōmak enaaj kōkajoorļo̧k. Ij kalim̧m̧uri kwe bwe ilo am̧ bōk kuņaam̧ ilo institute im ekkatak jeje ko rekwojarjar ilo niknik, am̧ kajoor n̄an joļo̧k kapo im n̄an bōk tōl eo an Jetōb Kwojarjar ilo aolep me ko kwoj kōm̧m̧ani naaj ļapļo̧k.” (institute.lds.org, Epr. 21, 2009).
Pija jen Media Services