Jej Kōnono kōn Kraist
Jouj Kabwilōn̄lōn̄
Ij pedped ioon jouj eo an Jisōs Kraist aolep raan.
“Ilo kweilo̧k ko ad ilo Kabun̄ in, ejjab emakijkij ad kōnono kōn jouj,” rūkaki eo aō kōn kabun̄ ilo Brigham Young University eaar ba, “bōtaab kōj, kōnke jej membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jej tōmak ilo jouj.”
Ilo m̧ool, Ijjab maron̄ kememej jabdewōt katak ko an Doulul eo an Jiron̄ ro ak Jabōt Jikuuļ kōn jouj, bōtaab ļōmņak ko aō raar kememej ļo̧k kumi in al eo aō ilo high school im kar al “Amazing Grace.”
Jouj Kabwilōn̄lōn̄! (jon̄an an em̧m̧an peļļo̧kin)
Me eaar lo̧mo̧o̧ren juon eo ejjab m̧ōņōņō āinwōt n̄a!
Iaar juon iien jōbwāwe, ak kiiō em̧ōj lo eō;
Kar pilo, ak kiiō Ij loļo̧kjeņ.1
“Jouj ej kajoor eo an Anij jān Pinmuur eo an Jisōs Kraist,” rūkaki eo aō eaar kōmeļeļeik. “Ij ajije jouj n̄an emen kajoor ko: jerkakpeje, pinmuur, kemour, im kōkajoorļok.” Eaar wōnm̧aanļo̧k wōt n̄an kōmeļeļeik kajjojo kajoor, bōtaab ļōmņak eo aō eaar jino bar ro̧o̧l n̄an ememļo̧k ko aō.
Ejja kumi in al eo ilo high school kar juon iien ilo̧k n̄an California, USA, n̄an jiāe ilo juon iien jiāe al. Iaar jino nan̄inmej m̧okta jān em̧m̧akūt eo, im metak bar eo aō eaar meļeļe in bwe Ijjamin maron̄ kar al ippān kumi in al eo aō ilo jiāe eo—ak eļan̄n̄e In kar, Enaaj kar nana aō al, kōn an metak. Iaar kajjitōk ippān jema kōn juon kōjeram̧m̧an an priesthood im jar ilo raan ko jilu kōn ājmour.
Bōlen eaar jab lukkuun polel aō meļeļe tōre eo, ke Iaar al “Amazing Grace” kōn juon bōro eo elukkuun ājmour ilo jiāe eo, bwe Iaar al kōn kajoor eo me kar kemour eō ilo raan ko m̧okta ļo̧k. Pinmuur eo an Rilo̧mo̧o̧r eaar kōjeram̧m̧an eō raan jab eo; An jouj eaar kein jipan̄ n̄an kemour eō.
“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k; im menin bwe naan eo en maron̄ kūrm̧ool eo kar ba Enaaj bōk Ioon metak ko im n̄aninmej ko an armej ro An” (Alma 7:11).
Ālkin high school, āinwōt elōn̄ rijikuuļ ilo iiō eo m̧oktata, eaar ļo̧kjeņ aō kōn kūlaj ko aō ilo college im apan̄ ko an mour ettoļo̧k jān kapijuknen eo ilo ejja iien eo wōt bōtaab barāinwōt ippān ļalem ro kōmij kiki ippān doon.
Menin eaar iien eo Iaar katak n̄an meļeļe kōkajoorļo̧k eo im kajoor in jipan̄ eo an jouj eo an Kraist. Iaar joļo̧k iien jerbal ko aō im ekkatak, bōtaab Iaar pedped ioon jar ko aō raan otemjeļo̧k ilo eo Iaar akweļap n̄an Jemedwōj Ilan̄ kōn maron̄ eo n̄an kadedeļo̧k jerbal ko remenin aikuj. Ke iiō in jikuuļ eo eaar wōnm̧aanļo̧k, Iaar lo n̄an lan̄lōn̄ eo aō bwe kōn kōkajoorļo̧k eo im kajoor in jipan̄ eo an Pinmuur eo an Kraist, eaar jab em̧m̧an wōt aō jerbal bōtaab ilo an ejjeļo̧k apan̄.
“I maron̄ in kōm̧m̧an men otemjej ilo Eo ej kakajoor eō” (Pilippai 4:13).
Men̄e Ijjan̄in kar en̄jake m̧ōttan ko ruo an jouj eo An—jerkakpeje im tallep in en̄taan eo—Ij pedped wōt ioon Pinmuur eo an Jisōs Kraist kajjojo raan. Jouj, kajoor eo an Anij jān Pinmuur eo an Jisōs Kraist, eaar kemour eō im kōkajoorļo̧k eō. Ilo aō kajjieon̄ pokake kien ko an Anij im ļoor An kilaan, Ij bōk jipan̄ eo an lan̄ etōr jān jon̄an maron̄ eo aō make.
“Ej jān jouj jej mour, ālkin aolep ijo jemaron̄ kōm̧m̧ane make” (2 Nipai 25:23).
Pija eo kōm̧m̧ane jen Ash Ram