Te Paraparau nei Tatou no te Mesia
Te Aroha Maere
Tei ni‘a to’u ti‘aturiraa i te aroha o Iesu Mesia i te mau mahana atoa.
« I roto i ta tatou mau pureraa, aita tatou e paraparau pinepine i te parau no te aroha », te parau ïa a te orometua haapii evanelia no te Fare Haapiiraa Tua Toru no Brigham Young, « tera râ, tatou te mau melo o te Ekalesia a Iesu Mesia i te Feia Mo‘a i te mau Mahana Hopea nei, te ti‘aturi mau nei tatou i te parau no te aroha ».
Aita vau e haamana‘o nei i te mau haapiiraa no te Haapiiraa Sabati a te Feia Apî Tamahine no ni‘a i te aroha, tera râ, ua haamana‘o vau i ta’u pŭpŭ himene no te fare haapiiraa i te himeneraa « Amazing Grace [Te Aroha Maere] ».
Te aroha Maere ! (aue te nehenehe o te otootoraa reo !)
Na te reira i faaora i te hoê taata ati rahi mai ia’u te huru !
I mo‘e na vau, ua itehia mai râ i teie nei;
I matapo na vau, te ite nei râ vau i teie nei.1
« Te aroha o te mana ïa o te Atua no roto mai i te Taraehara o Iesu Mesia », te parau ïa a to’u orometua haapii. « Te vahi nei au i te aroha i roto e maha mana: te ti‘a-faahou-raa, te faaoraraa, te oraraa, e te haapuairaa ». E ua haamata a‘era oia i te faataa maite i te mana tata‘itahi, tera râ, ua ho‘i faahou to’u feruriraa i roto i te mau mea ta’u i haamana‘o.
I te hoê taime ua ratere taua pŭpŭ himene ra no te fare haapiiraa i Californie, USA, no te tata‘u i roto i te hoê ta‘urua himeneraa. Ua pohehia vau i te ma‘i hou te revaraa, e ua fifi to’u arapoa, te auraa ra, aita ïa e ti‘a ia’u ia himene i roto i te pŭpŭ himene i roto i te ta’urua—e aore râ, mai te mea e himene au, e ere ïa i te mea maitai ta’u himeneraa, e mea mauiui atoa no’u. Ua ani au i to’u metua tane ia horo‘a mai i te hoê haamaitairaa autahu‘araa e ua tamau noa vau i te pure i roto i na mahana e piti no te ani i te ora.
I tera taime a himene ai au « Te Aroha maere » e to’u arapoa ora i roto i te ta’urua, penei a‘e aita vau i maramarama roa i taua taime ra e, te himene ra vau no ni‘a i te mana mau tei faaora ia’u hoê noa mahana na mua’tu. Ua haamaitai te Taraehara o te Faaora ia’u i taua mahana ra; no roto mai to’u ora i To’na aroha.
« E e haere atu [Iesu], ma te faaoroma‘i i te mauiui, e te ati, te mau huru faahemaraa atoa ra; e e na reira oia ia faati‘ahia te parau tei na ô mai ra e, e rave oia i te mauiui e te mau ma‘i o ta’na mau taata ia’na iho » (Alama 7:11).
I muri a‘e i te haapiiraa tuarua, mai te mau piahi no te matahiti matamua e rave rahi, ua teimaha roa ta’u mau haapiiraa e tae noa’tu te fifi o te oraraa i te atea i te utuafare e te faaearaa i roto i te hoê piha taotoraa e pae taata.
I reira to’u taaraa i te mana faaitoito e te puai no te aroha o te Mesia. E hope te mau mahana i te ohiparaa e te haapiiraa, tera râ, ua pure au i te mau mahana atoa ma te taparu i te Metua i te Ao ra ia horo‘a mai i te aravihi ia faaoti i te ohipa i titauhia. A tere noa ai te matahiti haapiiraa, i to’u oaoa rahi, ua ite a‘era vau e, na roto i te mana faaitoito e te puai o te Taraehara a te Mesia, ua nehenehe ta’u e rave maitai i te ohipa e ma te fifi ore ho‘i.
« E ti‘a ia’u te mau mea atoa nei i te Mesia, tei tauturu mai ia’u ra » (Philipi 4:13).
Noa’tu e, e mea ti‘a â ia’u ia farii i te iteraa no na tuhaa e piti o To’na aroha—te ti‘a-faahou-raa e te îraa o te faaoraraa—tei raro noa vau i te mana no te Taraehara o Iesu Mesia i te mau mahana atoa. Na te Aroha, te mana o te Atua no roto mai i te Taraehara o Iesu Mesia, i faaora mai ia’u e i haapuai mai ia’u. Mai te mea e, e rohi au ia haapa‘o i te mau faaueraa a te Atua e ia haapa‘o i To’na hinaaro, e farii ïa vau i te tauturu no te ra‘i mai i te hau roa’tu i to’u iho puai.
« No roto i te aroha e ora ai tatou, hope noa’tu to tatou itoito atoa » (2 Nephi 25:23).
Hoho‘a papa‘i na Ash Ram