Te haapii nei o Elder Christofferson e o Elder Jensen i te mau melo no te fenua Ra-parata (Argentine)

I te mahana maa 12 no novema 2011, ua paraparau o Elder D. Todd Christofferson no te Pŭpŭ no te Tino Ahuru Ma Piti Aposetolo e o Elder Jay E. Jensen no te Peresideniraa o te Hitu Ahuru i te feia apî, te feia apî paari, te feia faatere o te autahu‘araa, te mau misionare e te mau melo no Salta, Ra-parata.

Tei reira atoa o Elder Mervyn B. Arnold, peresideni area no te tuhaa apatoa no Marite Apatoa ; ta’na vahine, o Devonna; e o Elder Ruben Spitale, Hitu Ahuru Area. Ua amui atoa mai o Kathy, te vahine a Elder Christofferson e te vahine a Elder Jensen, o Lona.

Fatata i te 1 300 feia apî e te mau metua tei tae mai i te pureraa pae auahi i reira o Elder Christofferson raua Elder Jensen i te paraparauraa. Te tahi atoa 10 000 melo i roto 70 mau fare pû no te tĭtĭ i roto ia Ra parata tei mata‘ita‘i i te haapurororaa.

Ua parau Elder Jensen, oia tei tavini a‘e na ei peresideni no te area i te tuhaa apatoa no Marite Apatoa, « Ahani noa’tu eita outou e haamana‘o i ta’u mau parau, te hinaaro nei râ vau ia haamana‘o outou i te hoê parau a te hoê peropheta, te peresideni Thomas S. Monson, o ta’u e faa‘ite papû nei e e peropheta mau na te Atua. Teie te parau : ‘Na te mau faaotiraa e faataa i te ananahi’ ».

Tei ia tatou ra te ti‘amâraa—te iteraa e te ti‘araa ia rave i te mau faaotiraa—te parau ra o Elder Jensen, e na roto i teie mau faaotiraa ua ma‘iti tatou i to tatou ananahi.

Ua faati‘a mai oia i te aamu o te hoê hoa tei maiti i te hoê pô ia inu i te ava e ia faahoro i te pereoo e ua faatupu i te hoê ati tei haapohe roa e piti taata. Ua faati‘a atura oia i to’na iho aamu raua ta’na vahine tei ma‘iti e faataime rii i te faaipoiporaa ia nehenehe ia’na ia tavini i te hoê misioni rave tamau ei taure‘are‘a apî.

« I [to’u ho‘iraa] ua faaipoipo maua i roto i te hiero. Ua rave maua i te mau fafauraa, o ta maua atoa i faaapî tamau noa i te mau hepetoma atoa o to maua oraraa. Ua rave maua i te hoê faaotiraa tei faataa i to maua ananahi », ta’na ïa i parau.

O te tuahine Christofferson tei ti‘a mai i muri iho, ua horo‘a mai oia i to’na iteraa papû no ni‘a i te mau haamaitairaa no te haapa‘oraa i te mau fafauraa, e na Elder Christofferson i opani i te pureraa.

« Te mea faufaa roa‘e o ta tatou e titau atu o te here e te faaroo », te parau ia a Elder Christofferson. « Na te faaroo e tauturu ia tatou i roto i to tatou faaipoiporaa, te utuafare, te ohipa, [e] te raveraa i te ohipa ».

Ua haapapû oia e, na te mau faaueraa e horo‘a i te avei‘a no to tatou oraraa e e tauturu ia tatou ia farii i te mea faufaa a‘e.

I muri iho ua a‘o oia i te feia apî e i te mau metua atoa ia rave i te faaotiraa ia pee i te a‘o te itehia i roto i te buka iti No te Puai o te Feia Apî.

« E haapuai rahi te reira i ta outou mau tamarii, noa’tu aita outou i pihai iho ia ratou—no to ratou ite e, te haapa‘o nei to ratou na metua i taua â mau parau tumu ra », ta’na ïa i parau.

Ua opani o Elder Christofferson ma te faatae atu i to’na here i te mau melo no Ra parata, i reira oia i te taviniraa i te hoê misioni fatata e pae ahuru matahiti i teie nei.

A tere ai raua i Salta, ua farerei atoa o Elder Christofferson e o Elder Jensen i te mau misionare rave tamau e te feia apî paari, e ua faatae ia ratou i te here o te mau Taea‘e.

Ua paraparau atoa o Elder Christofferson e o Elder Jensen i te mau misionare no te misioni no Argentina Resistencia i te omuaraa o te ava‘e no novema 2011.

Hoho‘a na James Dalrymple