Te mau taime rahi o te haapiipiiraa na te feia faatere o te ao nei, avei‘a no te tupuraa mau
Ua faataa mai te feia faatere o te Ekalesia i te parau no te « tupuraa mau » e te nahea ia rave hope i te reira i te taime no te haapiipiiraa na te feia faatere o te ao nei i te 11 no Fepuare 2012.
Ua tahoê mai te peresideni Dieter F. Uchtdorf, Tauturu Piti i roto i te Peresideniraa Matamua, te mau melo no te Pŭpŭ no te Tino Ahuru Ma Piti Aposetolo, te peresideniraa no te Hitu Ahuru, e te mau peresideniraa no te mau pŭpŭ tauturu o te Ekalesia i roto i te haapiiraa i te feia faatere o te Ekalesia na te ao atoa nei.
« I roto i te parau a te Ekalesia, e nehenehe i te tupuraa e faaauhia mai te ‘mau melo apî’ … Te tupuraa mau râ, ‘o te tupuraa ïa i te rahi te numera o te mau melo itoito’ », o ta te peresideni Uchtdorf ïa i haamaramarama mai.
Ua parau faahou mai o Elder M. Russell Ballard no te Pŭpŭ no te Tino Ahuru Ma Piti Aposetolo e, « E tupu te Ekalesia i te rahi ia rahi ana‘e te haapao maitai o te taata tataitahi e o te utuafare o te noaa na roto i te faafariuraa papu o te taata tataitahi ».
Taua haapa‘oraa rahi ra oia ho‘i o te mau ohipa ïa e ere i te mea ohie roa ia faito, mai te pure i te mahana tata‘itahi, te tuatapaparaa i te papa‘iraa moa, te pureraa pô utuafare, te here i roto i te utuafare, e te iteraa rau o te taata iho o te taraehara, te parau ïa a te peresideni Uchtdorf.
« E mea pinepine tatou i te haafifi i te nehenehe e te ohie o te evanelia a Iesu Mesia na roto i te mau tabula hopea ore o te mau mea titau-hu‘ahu‘a-hia », o ta’na ïa i parau. « Area râ ia faatumu ana‘e tatou i ni‘a i te ‘no te aha’ o te evanelia, e ore ïa te anoiraa ».
Ua faatumuhia te tuhaa rahi o te haapurororaa i ni‘a i te mau haapiiraa tumu e te mau parau tumu, na te reira e horo‘a mai i te mau pahonoraa i te mau uiraa « no te aha ».
« E aratai te mau uiraa tano ‘no te aha’ i te mau faaotiraa tano ‘o vai’, ‘eaha’, ‘afea’, ‘i hea’, e ‘nahea’, te parau ïa a te peresideni Uchtdorf.
Te faaipoiporaa e te utuafare i roto i te faanahoraa
« O te mau utuafare te tino o te Ekalesia », ua na ô mai te peresideni Boyd K. Packer, peresideni no te Pŭpŭ no te Tino Ahuru Ma Piti Aposetolo. « Te mau paroisa e [o] te mau tĭtĭ, e rave‘a noa te reira. Ia paraparau tatou no te mau utuafare, i reira tatou e ite ai i te tupuraa mau i roto i te Ekalesia ».
Ua faahiti mai oia e, e ti‘a i te mau tane faaipoipo e te mau metua tane atoa ia riro ei taata faatere no te autahu‘araa i roto to’na fare, ma te peresideniraa i to’na utuafare na roto i te parau-ti‘a. Oia’toa, ua parau oia e, e ti‘a i te feia faatere o te autahu‘araa ia arata‘i ma te ti‘amâ—noa’tu te rau o te mau toro‘a, e faito au te mana o te taata ti‘amâ e mau nei i te hoê autahu‘araa i te tahi (a hi‘o PH&PF 1:20).
Ua haapapû o Elder Russell M. Nelson no te Pŭpŭ no te Tino Ahuru Ma Piti Aposetolo e, ia patu te tane e te vahine faaipoipo, te metua tane e te metua vahine i te hoê auraa no te here, no te tatarahapa, e no te pure ia manuïa te haapuairaa e te parururaa i te utuafare, oia ho‘i te « tumu no te opuaraa a Tei Hamani no te hopea mure ore o Ta’na mau tamarii » (« Te Utuafare : E Poro‘i i to te Ao nei », Liahona e Ensign, Novema 2010, 129).
« E toru taime i roto i te papa‘iraa mo‘a, te hiti ra te faaararaa e, e riro te ao atoa nei ei mea faufaa ore i te ho‘iraa o te Fatu aita ana‘e te vairaa o te taata i te tahi faito ti‘a », o ta’na ïa i parau mai. « I te mau taime atoa, e tu‘ati taua faaararaa ra i te utuafare o te taata nei aita te mau oro‘a taati no te hiero i ravehia. Aita teie mau oro‘a no te faateiteiraa, aita atoa ïa te hanahana o te Atua e tupu ».
E titau te faaotiraa i teie opuaraa hopea—te ora mure ore e te faateiteiraa o te mau tamarii a te Atua—i taua tupuraa mau ra i roto i to tatou mau utuafare, i roto i te mau paroisa e te mau amaa, e na roto i te Ekalesia taatoa.
Faaohiparaa i te evanelia
E tae mai te tupuraa mau e te faafariuraa na roto i te faaohiparaa i te evanelia i roto i te oraraa i te mau mahana atoa. I roto i te hoê taua-parau-raa uiraa pahonoraa, ua faataa mai o Elder L. Tom Perry e o Elder D. Todd Christofferson no te Pŭpŭ no te Tino Ahuru Ma Piti Aposetolo e, te faaohiparaa mau o te evanelia o te raveraa ïa e te tape‘araa i te mau fafauraa no te hiero. Ua parau o Elder Christofferson e, e taui te haapa‘oraa i te mau fafauraa i te taata tino nei ei taata mo‘a na roto i te tau.
Te tororaa i te rima tauturu ia vetahi ê o te tahi ïa huru no te faaohiparaa i te evanelia. Tei te mau melo ra te hopoia, ei taata hoê e ei Ekalesia, ia toro i te rima tauturu no te faaora i te feia rava‘i ore i te pae varua e i te pae tino, te parau ïa a te feia faatere.
Eiaha roa tatou e otohe no te horo‘a i te rima tauturu i te tahi atu mau faaroo e mau faanahoraa taviniraa rau, no te aupuru atu i te feia vĕvĕ e te rava‘i ore, te parau ïa a Elder Christofferson. E ti‘a i te feia faatere no te autahu‘araa ia arata‘i mai i roto i teie mau tutavaraa, e ti‘a râ i te mau melo e i te mau misionare ia paturu maitai mai i roto i teie ohipa.
Na te hoê taua-parau-raa i faananea roa i te faatumuraa i ni‘a i te aupururaa i te mau utuafare, te haapuairaa i te feia e mau nei i te autahu‘araa a Melehizedeka, e te tautururaa i te paturaa i te faaroo e te iteraa papû o te feia apî. Ua amui mai o Elder Ballard e o Elder Neil L. Andersen no te Pŭpŭ no te Tino Ahuru Ma Piti Aposetolo, oia’toa o Elder Ronald A. Rasband no te Peresideniraa no te Hitu Ahuru ; o Elaine S. Dalton, peresideni rahi no te Feia apî Tamahine e o Rosemary M. Wixom, peresideni rahi no te Paraimere.
Ua parau o Elder Rasband e, ia faaô mai te feia faatere atoa no te tauturu i te faaho‘i-papû-raa mai i te mau melo, e ua haapapû mai o Elder Andersen e, ia faaô rahi mai te feia apî no te tauturu i te ohipa faaho‘iraa mai e te haapuairaa i te tahi atu feia apî.
Rave-hope-raa i te tupuraa mau
E tae mai te tupuraa mau a faaohipa ai tatou i te mau parau tumu o te evanelia i roto i to tatou oraraa i te mau mahana atoa, te faahitiraa ïa a te peresideni Uchtdorf.
« A feruri ai outou i teie mau tumu parau, a ui ia outou iho ‘no te aha’ o ta outou taviniraa e te hopea o te ‘no reira’ i roto i ta outou mau hopoia ei taata e ei apooraa », ta’na i parau.
Haapii hau atu
E nehenehe te mau taata e mata‘ita‘i, e faaroo, e nene‘i, e e faaî atea i te mau materia no roto mai i te haapurororaa i roto i na reo e 12 i ni‘a i te tahua itenati lds.org/study/other-addresses e te pataraa i ni‘a i te Worldwide Leadership Training.
Ua paraparau o Elder M. Russell Ballard no te Pŭpŭ no te Tino Ahuru Ma Piti Aposetolo i roto i te hoê taua-parau-raa no te haapiipiiraa na te feia faatere o te ao nei no Fepuare 2012.
© IRI