Ua ofati Oia i te mau tapea o te pohe
« E na reira ratou i te noaa te ora mure ore na roto i te Mesia, i tei ofati i te mau tapea o te pohe » (Mosia 15:23).
I te hoê po, te vai apî noa ra ta maua mau tamarii, te tai‘o ra matou i te papa‘iraa mo‘a. Te tai‘o ra matou no ni‘a i te Faaora e ua paraparau matou e, e mea nahea Oia i ore ai e rave i te hoê noa a‘e hape.
I muri a‘e i taua pô ra, ua afa‘i ta’u vahine i ta maua tamahine e toru matahiti, o Susie i roto i te ro‘i. Ua hi‘o maira o Susie i to’na mama e ua na ô maira, « Mama, ua rave o Iesu i te hoê hape ».
«Eaha ia te auraa ? » te aniraa ïa a to’na metua vahine.
Na ô maira o Susie e, « Ua ofati oia i te hoê mea ».
Ma te maere rii, ua ui atura to’na metua vahine e, « Eaha Ta’na i ofati ? »
Ua pahono maira o Susie « Ua ofati o Iesu i te mau tapea o te pohe »,
Ua haamana‘o a‘era ta’u vahine e, ua himene raua o Susie i te himene Paraimere ra « Par un beau printemps doré » e rave rahi taime, e ua apo mai o Susie i te mau parau ra « I te pu‘e tau faahoturaa raau, ua ti‘a mai Iesu Mesia e ua faaru‘e i te menema i reira oia i te taravaraa; ua ofati Oia i te mau tapea o te pohe ».1 Ua faataa atura te metua vahine o Susie e, te auraa no te mau parau ra ofati i te mau tapea o te pohe, ua tiafaahou ïa o Iesu ia ti‘a hoi ia tatou paatoa ia ora faahou i muri a‘e i to tatou poheraa.
Ua riro taua aparauraa ra ei rave‘a na maua o ta’u vahine no te haapii i ta maua mau tamahine o Lizzie, o Susie e o Emma, i te auraa mau o te taraehara no tatou tata‘itahi. Ua tano o Susie : Ua ofati o Iesu i te mau tapea o te pohe. E ere râ te reira i te hoê hape. O te horo‘a rahi a‘e râ te reira Ta’na i horo‘a mai ia tatou nei ! (A hi‘o Te Parau Haapiiraa e te mau Parau Fafau 14:7.)
Ua pohe te Faaora e ua ti‘a faahou ia ti‘a hoi ia tatou ia ora faahou i piha‘i iho i to tatou Metua i te Ao ra e to tatou utuafare mai te au i to tatou haapa‘o maitai. Mai te mea e, e mea ti‘amâ tatou, e nehenehe ta tatou e fana‘o i te mau haamaitairaa o te tahuti ore e te ora mure ore i te hoê mahana. Te oaoa nei au i te mea e, ua ofati o Iesu i te hoê mea—te mau tapea o te pohe !
Atau : faahoho‘araa na Dilleen Marsh