Te mau Blueberries e te Buka a Moromona
Suellen S. Weiler, Georgia, USA
Tau matahiti i ma‘iri a‘enei ua faanuu matou mai te hoê vahi oire haere atu i ni‘a i te hoê fenua faaapu i rapae i te hoê oire iti e te hau. I te tahi a‘e pae te vai ra te hoê faaapu blueberry o te ore e atuatu-faahou-hia ra, e na roto i te tahi mau hoa o te fatu faaapu, ua fariihia matou ia pafa‘i i te mau blueberries atoa ta matou e hinaaro.
E rave rahi poipoi i te mau hepetoma atoa i taua pu‘e tau mahanahana ra, ua haaputu matou i te mau patete e te mau pute i roto i te pereoo, e ua pau ia matou hoê hora oaoa e te au maitai no te pafa‘i i te mau blueberries. I te hoê poipoi aita ta maua tamaiti hopea o Hyrum i hinaaro roa ia haere mai na muri iho ia matou. Ua papû ia’na e, ua pau te mau blueberries atoa i te pafa‘ihia e matou e e pau te taime ia haere faahou. Tera râ, ua hitimahuta oia i te iteraa e, ua rahi atu â te mau blueberries. E pûpâ taatoa te vai ra i te mau vahi aita oia i hi‘o maitai, e te vai ra te tahi mau huero maa pape maitai te tarere noa ra i ni‘a i te mau amaa ta’na i papû maitai e, ua pafa‘ihia e oia na reira na mua a‘e.
I taua atoa area taime ra, ua titau to matou feia faatere no te feia apî paroita i te feia apî ia tai‘o hope roa i te Buka a Moromona hou a haamata faahou ai te haapiiraa i taua ava‘e atete ra. Ua hopoi mai ta maua mau tamarii i taua titauraa ra i te fare, e ua amui atu to matou utuafare taatoa i roto i taua ohipa ra.
Aita i maoro te otiraa ia matou te tai‘oraa i te Buka Moromona, te tae mai nei ta matou Ensign no atete 2005, e i roto i te reira te titau ra te Peresideni Gordon B. Hinckley (1910–2008) ia tai‘o i te Buka a Moromona na mua i te hopea matahiti. Ua maere roa o Hyrum e to’na taea‘e o Joseph—ia feruri e, ua haapa‘o a‘ena matou i te parau a te peropheta ! I reira, ua faahaamana‘o maira to raua nau tuaana o Seth e o Bethany e, ua ani mai te Peresideni Hinckley ia tatou ia tai‘o faahou, noa’tu te rahiraa taime ta tatou i tai‘o a‘ena.
« No te aha ? » te aniraa ïa a na tamaroa. « Ua tai‘o tatou i te mau parau atoa, eaha’tu â te mea ta tatou e haapii mai taa ê atu i ta tatou i tai‘o a‘ena ? »
I muri a‘e i te tahi taime muhu ore, ua faahiti mai ra hoê taata i te parau no te mau blueberries. « Te haamana‘o ra orua i te taime a feruri ai tatou e, ua pau pauroa te mau blueberries i te pafa‘ihia e tatou ? Tera râ, i to tatou ho‘i-faahou-raa e pafa‘i, te vai noa ra â te mau blueberries—te vai noa ra ! Noa’tu ehia taime to tatou haereraa e pafa‘i, noa’tu e, aita i maoro a‘enei, te vai noa ra â e rave rahi blueberries.
Ua ite oioi a‘era matou i te faaauraa. Mai taua faaapu ra e te rahiraa o te mau blueberries monamona, ua riro te Buka a Moromona ei pihaa tamau no te maa pae varua e ta’na mau parau mau e ti‘a ia itehia. No reira, ua haamata faahou matou i te tai‘o i te Buka a Moromona.
Na roto i to’u fariiraa i te titauraa a te peropheta, ua tai‘o vau i roto i te Buka a Moromona i te mau mea ta’u i tai‘o e rave rahi taime na mua a‘enei, tera râ, i teie taime, e mea taa ê rii ta’u hi‘oraa e aore râ, to’u iteraa i te reira i te mea e, e mea apî to’u vairaa e aore râ, te mau titauraa. Ua ite au e, i te mau taime atoa e tai‘o tatou i te Buka a Moromona ma te aau tae, e nehenehe ta tatou e farii i te hoê hi‘oraa apî e e haafatata atu i te Faaora.