E pohe au !

Ramona Ross, Tennessee, USA

E tuati au i roto i te hoê fare utuuturaa, e i te hoê mahana ua farii au i te hoê niuniu no ni‘a i te hoê taata ma‘i o Bill te i‘oa, no tapu-noa-hia a‘enei oia. Ua titauhia ia afa‘i ia’na i roto i te hoê fare utuuturaa papû, tera râ, ua î roa taua fare utuuturaa ra, e no reira, ua afa‘ihia mai oia ia’u ra.

Aita i maoro te tae mai nei taua ma‘i ra e to’na utuafare. Ua topa to’u hau i to’u iteraa’tu e, e mea itoito oia, e mai te mea ra, e ere i te mea fifi roa.

Ia oti te hi‘opo‘araa ia’na e te faaiteraa i to’na piha ia’na e i to’na utuafare, ua haere au i roto i te piha ohiparaa no te papa‘i i te tahi mau nota i ni‘a i ta’na parau. I te taime a haamata ai au i te papa‘i, ua faaroo a‘era vau i te hoê reo i te na ô raa e, « A ho‘i i roto i to’na piha ». Ua faaea vau i te papa‘i e ua hi‘o vau i muri ia’u. Aita hoê taata i reira. Ua feruri a‘era vau e, e mana‘o noa teie no’u, i taua iho taime ra, ua faaroo faahou vau i te reo no te piti o te taime—e mea huru puai a‘e.

Ua horo atura vau i roto i te piha o Bill, e ite atura vau e, ua oru roa to’na arapoa, e ua fifi roa oia no te huti i te aho. Ua feruri au e, ua puta to’na uaua arapoa, no reira, ua taumi au i to’u rima atau i ni‘a i to’na arapoa, e ua niuniu i te taote uaua i to’u rima aui, e ua haere mai oia e rave i ta’na ohipa. Ua parau maira te taote e, e tono mai oia i te hoê pŭpŭ i ni‘a nei no te rave oioi ia Bill. « E eiaha e tatara i to oe rima ! » ta’na ïa parau.

A taumi noa ai au, ua ite atura vau i te hoê buka na te Ekalesia i piha‘i iho i te ro‘i o Bill. « E melo oe no te Ekalesia ? » Ta’u ïa uiraa.

Ua tamata oia e ta‘iri‘iri i te upoo, e ua parau maira e, e rave ohipa hiero oia i roto i te Hiero no Atlanta Georgia. Ua tahe maira te tahi pape mata e na ô maira oia, « E pohe au ! »

Ua parau atura vau ia’na e, eita oia e pohe, ma te parau papû atu e, « E faaipoipohia vau i roto i te hiero no Atlanta i te ava‘e i muri nei, e e tae atoa mai oe i reira ». Ua tae maira te pŭpŭ taote tapu e ua afa‘i atura ia Bill.

I roto i te faaineineraa o to’u faaipoiporaa i te ava‘e i muri iho, ua fatata roa o Bill i te mo‘ehia ia’u, to’na ho‘i tera mahana ra, ua fifi oia i te tahi mau raau. A arata‘i ai te peresideni vahine ia’u i roto i te piha taatiraa i to’u mahana faaipoiporaa, ua ite atura vau i te hoê hoho‘a mata matauhia e au : te vahine a Bill, o Georgia. I to’u parauraa’tu ia’na e, te faaipoipohia ra vau, ua haere atura oia e tii ia Bill. Tau taime rii hou a haamata ai te oro‘a, ua matara maira te opani e ua tomo maira oia i roto. I muri a‘e e rave rahi hepetoma o te mauiui upoo, te topiha‘e e te rohirohi, ua afaro mai o Bill i taua mahana ra no te ratere i te hiero, ma te ite ore e, o te mahana ïa no to’u faaipoiporaa.

E piti matahiti i muri mai, ua piihia maua o ta’u tane ei rave ohipa hiero i roto i te hiero no Nashville Tennessee. I to maua taeraa’tu i te hiero no te faataaraa, ua iriti mai te hoê taata i te opani no’u e ua na ô maira e, « Maeva i te hiero no Nashville ! » O te Taea‘e Bill ïa.

Ua tavini amui matou e toru matahiti te maoro. Ua parau o Bill i te mau taata atoa e, ua faaora vau ia’na, tera râ, ua ite au e, na te Fatu i faaora ia’na. Na roto i taua ohipa ra, ua haapii mai Oia ia’u i te faufaa ia haapa‘o i te mau muhumuhu o te Varua.

Ua parau maira te taote e, e tono mai oia i te hoê pŭpŭ i ni‘a nei no te rave oioi ia Bill. « E eiaha e tatara i to oe rima ! » ta’na ïa parau.