Bōlen Jej Aikuj Jar
Scott Edgar, Utah, USA
Ilo spring in 1975 baam̧le eo aō im n̄a kar jokwe ibwilijin jikin kallib ko remaroro im aiboojoj ilo Rheinland-Pfalz eria eo ilo Western Germany. Ettōr n̄an kapijuknen eo jān m̧ōn jar eo juon Jabōt ejidiwōtwōt, kōm kar bōjrak n̄an lale juon waan ettōr me eaar jabwilbwil n̄an turājet in iaļ eo etutu ilo jem̧ļo̧k in wōjke ko. Ilo wōjke ko eaar lukkuun marok kōnke wōkar ko remejjel kar kōm̧m̧ani jān wōjke ko im ej jota ļo̧k.
Ālkin lale waan ettōr eo ejorrāān, kōm kar bar ro̧o̧l n̄an waan ettōr eo waam im kar lo eaar rūm̧ļo̧k ilo pedkat. Ijjab maron̄ kar pāāk, bōtaab Imaron̄ kar ettōr m̧aanļo̧k—n̄an bukin wōjke ko. Kōm kar ettōr m̧aanļo̧k wōt ilo wōjke ko im kar lo bwe elōn̄ iaļ ko ilo wōjke ko raar ekkeijel ippān doon im kar āliktata kadiwōjļo̧k, kōn menin Iaar kālet n̄an wōnm̧aanļo̧k n̄an marok jilōn̄lōn̄ eo.
Em̧ōkaj aō kar kile bwe Iaar kōm̧m̧ane juon jokālet eo ebōd. Iaļ eo eaidik, etutu ekar obrak kōn annan̄in neen wa ko ilo pedkat im kar tōl ļo̧k n̄an wōjke ko remarok. Iaar kajieon̄ dāpij wōt jon̄an iiūm̧ eo, mijak bwe eļan̄n̄e kōm bōjrak, kōm naaj kar rūm̧ļo̧k. Iaar lo juon jikin eutiej im̧aam wōt me eaar āinwōt ebwe an pen n̄an dāpij eddo eo an waan ettōr eo. Ļōmņak eo aō eaar n̄an bōk waan ettōr eo jān pedkad eo n̄an letok n̄an eō iien n̄an ļōmņak. Waan ettōr eo eaar rūm̧ļo̧k im diwōj jān pedkad eo.
Iaar kune waan ettōr eo im tallōn̄. Kōn an tōm̧a ko kun, Iaar jab maron̄ lo juon men. Iaar kōjo̧ tōm̧a ko, jibwe tein̄ki eo am, im ālkin etale waan ettōr eo, kar kālet bwe jerbal eo aō eaar n̄an pāāk ļo̧k n̄an bukin wōjke ko innām buuļ ilo iaļ eo kōm kar itok ie tok.
Iaar pāāk ļo̧k n̄an wōjke ko jon̄an wōt eo emaron̄, kōjo̧ injiin eo jidik, dibōj iaļ eo, im kar rūm̧ļo̧k ilo pedkat eo. Kiiō kōm kar lukkuun pād ilo jorrāān. Itunabjen waan ettōr eo eaar jako ļo̧k kōn marok lep im ikōn̄. Itjiulowaan waan ettōr eo lio pāleō im n̄a kar jijet ippān jilu ajri ro releln̄o̧n̄.
Iaar kajjitōk ippān lio pāleō kōn jabdewōt ļōmņak. Ālkin jidik iien eaar ba, “Bōlen jej aikuj jar.” Ajri ro raar jokane enan̄in iien eo wōt. Iaar kōm̧m̧ane juon jar kōn jipan̄ ettā bōtaab ekabūrom̧ōjmōj. Ke Iaar jar, juon ļōmņak eaar alikkar an itok n̄an ļōmņak eo aō: “Kōļaki nee jein ko.”
Jutak ilo 10 iniij (25 cm) ilo pedkat kōn nuknuk in Jabōt eo an, lio pāleō ejitōnbōro eaar jibwe ten̄ki eo ke Iaar karreoik nee ko itulik kōn peiū im likūt jein ko ie. Kōn tōmak im lōke, kōm kar bar jar im kar kōjo̧ injiin eo. Jidik kake kōm kar ettōr ilo pedkat eo im āliktata bar rooļ ļo̧k n̄an iaļ eo epij.
Ilo lem̧ōņōņō eo kōn kar deeor jān pedkat eo im marok lep eo, Inan̄in kar meļo̧kļo̧k won eo eaar jipan̄ kōm̧ jān bukin wōjke ko. Leddik eo nejim ļalem-iiō-dettan eaar kakememj eō ke eaar ba, “Baba, Jemedwōj Ilan̄ ej lukkuun in uwaaki jar ko, Ej ke?”