E ti‘a paha ia tatou ia pure
Scott Edgar, Utah, USA
I roto i te pu‘e tau faahoturaa raau o te matahiti 1975, te ora ra to’u utuafare e o vau nei i ni‘a i te mau fenua faaapu ruperupe no Rheinland-Pfalz i Heremani i te pae tooa o te ra. I te hoê mahana Sabati, te ho‘i ra matou i te fare na te pureraa mai, ua tapea matou i te hoê vahi no te hi‘o i te hoê pereoo uira tei taahuri i te pae purumu i te hiti o te hoê uru raau. Ua poiri roa i roto i te uru raau no te mea, e mea me‘ume‘u roa te uru raau e te haamata atoa ra i te pô.
Ia oti ta matou hi‘oraa i te pereoo ati, ua ho‘i maira matou i to matou pereoo e ua ite a‘era matou e, ua mau i roto i te vari paruparu. Eita ta’u e nehenehe e otohe, e nehenehe râ ta’u e haere i mua—i roto i te uru raau. Ua tere a‘enei matou na roto i te reira uru raau e ua ite matou e, e rave rahi purumu i roto i te uru raau tei tu‘ati te tahi i te tahi, e e nehenehe e ho‘i faahou mai i rapae, no reira ua faaoti a‘era vau e tere i mua i roto i te poiri.
Aita i maoro, ua ite a‘era vau e, ua hape taua faaotiraa ra. E mea rahi roa te apoopoo i ni‘a i te purumu e ua î i te vari paruparu, e te haere noa’tura i te atearaa i roto i te uru raau poiri. Ua tamata vau i te tapea noa i te huru tere, oi ia tapea noa’tu matou, e mure roa te pereoo. Ua ite a‘era vau i te hoê puu repo teitei rii i mua ia’u e o ta’u i mana‘o e, e mea paari no te vaiiho i te pereoo. To’u hinaaro, o te tatara ïa i te pereoo i rapae i te vari paruparu ia nehenehe ia’u ia feruri rii. Ua oua atura te pereoo i rapae i te vari paruparu.
Ua tupohe au i te pereoo e ua haere mai i rapae. Ua tupohehia te mori pereoo, e aita e nehenehe e ite i te hoê mea. Ua tu‘ama faahou vau i te mau mori o te pereoo, ua rave maira i te mori pata, e ua hi‘ohi‘o a‘era vau i te pereoo, e ua faaoti ihora e, te rave‘a maitai a‘e, o te ho‘i faahou ïa i roto i te uru raau na ni‘a i te e‘a ta matou i tere mai nei.
Ua ho‘i faahou vau i muri roa, ua haapuai i te matini o te pereoo, e ua oua faahou i ni‘a i te purumu, e ua mure roa i roto i te vari paruparu. I teie taime, ua fifi mau matou. E mea poiri e te maniania ore i rapae i te pereoo. Ua parahi noa vau i roto i te pereoo e ta’u vahine e toru tamarii riaria.
Ua ani au i ta’u vahine e mana‘o anei to’na. Tau taime i muri mai, na ô maira oia, « E ti‘a paha ia tatou ia pure ». Ua mărû a‘era te mau tamarii fatata i tera iho taime. Ua pûpû atura vau i te hoê pure haehaa e te oto râ no te ani i te tauturu. I to’u pureraa, ua puta maira te hoê mana‘o ma te papû i roto i to’u feruriraa : « A tamau i te fifi i ni‘a i te huira ».
Na ta’u vahine e tapea i te mori pata ma te ti‘a noa i roto i te vari paruparu e 25 tenetimetera i te hohonu, i roto i to’na ahu pureraa, e na’u e tamâ i te huira no muri e e tamau ai i te mau fifi. Ma te faaroo e te ti‘aturi, ua pure faahou matou e ua faaharuru i te pereoo. Ua tere marû noa matou na roto i te vari paruparu e i te pae hopea ua tae mai matou i ni‘a i te e‘a mau.
No to’u oaoa i te mea e, ua matara mai matou mai roto mai i te vari paruparu e i te poiri, fatata i te mo‘ehia ia’u e, na vai i tauturu ia matou ia matara mai i rapae i te uru raau. Na ta’u tamahine iti e pae matahiti i faahaamana‘o mai ia’u i te na ô raa e, « Papa, e pahono mau te Metua i te Ao ra i te mau pure, e ere anei ? »