Kaminene eo an Ritōl Aolepen Laļ in ej Kalikkar Iaļ eo n̄an Eddōkļo̧k eo Em̧ool
Ritōl ro an Kabun̄ in rej kōmeļeļeik aorōk eo an “eddōkļo̧l eo em̧ool” im ekōjkan n̄an kōttōprake ilo Pāpode 11, 2012, Kweilo̧k in Kaminene eo an Ritōl Aolep Laļ in.
Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, im membōr ro an Doulul eo an Jon̄oulruo Rijilōk ro, Būreejtōnji eo an Jiljilimjuonn̄oul eo, im būreejtōnji ko an radik ko an Kabun̄ in raar bōk kuņaer ilo kōmeļeļeiki ritōl ro an Kabun̄ in ipeļaakin laļ in.
“Ilo naan ko an Kabun̄, eddōkļo̧k maron̄ kōmeļeļeik āinwōt ‘membōr ro rekāāl.’ … Eddōkļo̧k eo em̧ool, mekarta, ej kōmeļeļeik āinwōt ‘eddōkļo̧k in oran ro rej niknik,’” Būreejtōn Uchtdorf eaar kōmeļeļeik.
Elder M. Russell Ballard jen Doulul eo an Jon̄oulruo Rijilōk ro eaar kakkobaba, “Eddōkļo̧k ej waļo̧k n̄e, mour an juon make ej oktak n̄an ko̧jpeļ eo ej tōprak in ļapļo̧k tiljek ilo kajjojo armej im baam̧le.”
Ļapļo̧k in tiljek jab in ekitbuuj men ko rej jab pidodo jon̄ak i, āinwōt jar raan otemjeļo̧k, ekkatak jeje ko rekwojarjar, nokon in jota eo an baam̧le, iakwe ilo m̧weo, im en̄jake an juon make kōn Pinmuur eo, Būreejtōn Uchtdorf eaar ba.
“Emakijkij, ad kōtarpok aiboojoj im pidodo eo an ko̧jpeļ eo an Jisōs Kraist ippān laajrak ko an kōtmene ko kili ejjeļo̧k jem̧ļo̧kier,” eaar ba. “Mekarta, n̄e jej pedped wōt ioon kōttōpar eo an ko̧jpeļ eo, elōn̄ wōt pok ko rej jako ļo̧k.”
Enan̄in aolep kadiwōjļo̧k ko rej pedped wōt ioon katak ko im pedped ko raorōk, ko rej letok uwaak ko n̄an “etke” kajjitōk ko.
“Kajjitōk ko rekkar kōn kōttōpar eo an ko̧jpeļ eo enaaj tōl kōj n̄an kālet ko rekkar kōn wōn eo ejelet e, ta eo n̄an kōm̧m̧ane kake, n̄āāt eo jej aikuj kōm̧m̧ani men ko, etke jej aikuj kōm̧m̧ani men ko, im ewi wāween ad aikuj in kōm̧m̧ani,” Būreejtōn Uchtdorf eaar ba.
M̧are im Baam̧le ilo Karōk in Lo̧mo̧o̧r eo
“Kabun̄ in eaar kōm̧m̧an jān baam̧le ko,” President Boyd K. Packer, Būreejtōn eo an Doulul eo an Jon̄oulruo Rijilōk ro, eaar ba. “Ward ko im stake ko rej n̄an jipan̄ baam̧le ko. N̄e jej kōnono kōn baam̧le ko, innām jej lo eddōkļo̧k eo an Kabun̄ eo.”
Eaar kwaļo̧k bwe aolep ļōm̧aro pālele im baba ro rej aikuj in armej ro rej kōjerbal priesthood eo ilo m̧weo im̧ōn, ej tōl baam̧le eo an ilo jim̧we. Ejja āinļo̧k wōt, eaar ba, ritōl ro an priesthood eo rej aikuj tōl ilo erreo—kōn opiij ko ilo priesthood eo, aolep rikabwijer priesthood eo erreo jon̄an wōt maron̄ eo juon riturin ej kabwijere (lale D&C 1:20).
Elder Russell M. Nelson jen Doulul eo an Jon̄oulruo Rijilōk ro eaar kalikkar bwe ļōm̧aro im lim̧aro pālele, baba ro im m̧am̧a ro, rej aikuj kalōk juon kadkad in iakwe, ukweļo̧k, im jar n̄an wājepdik ilo kōjparok baam̧le eo, “ej dilepen karōk eo an Rikōm̧anm̧an eo n̄an jipadpad eo n̄an mour indeeo an ajri ro Nejin” (“Baam̧le Eo: Juon Naan in Kean̄ n̄an Laļ in,” Liaona im Ensign, Nob. 2010, 129).
“Jilu alen ilo jeje ko rekwojarjar ej kakkōl eo eaar kōm̧m̧an bwe aolepen laļ in enaaj kar jej tokjān ilo bar rool tok eo an Irooj eļan̄n̄e jet jekjek ko raar jab bōk jikier,” eaar ba. “Ilo kajjojo iien ko me kakkōl eo ej iook ļo̧k jekjek ko an baam̧le eo an armej ilo ejjeļo̧k kain̄i in liāp ko an tampeļ. Ilo an ejjeļo̧k kain̄i ko an mour āinwōt anij, aiboojoj eo an Anij ej jamin naaj kar kile.”
Tōpar kōttōpar jab in āliktata—mour indeeo im mour āinwōt Anij n̄an aolep ajri ro nejin Anij—ej eddōkļo̧k eo em̧ool ej waļo̧k ilo m̧ōko im̧ōd, ilo ward ko im branch ko, im ilo aolepen Kabun̄ in.
Jibadpad eo an Ko̧jpeļ eo
Eddōkļo̧k eo em̧ool im oktak eo ej itok jān kōjerbal ko̧jpeļ eo n̄an mour kajjojo raan. Ilo juon iien kajjitōk im uwaak, Elder L. Tom Perry im Elder D. Todd Christofferson jen Doulul eo an Jon̄oulruo Rijilōk ro raar kōmeļeļeik bwe jibadbad eo eļaptata an ko̧jpeļ eo ej n̄an jipan̄ armej ro kōm̧m̧an im kōjparok bujen ko an tampeļ ko. Pokake bujen ko, Elder Christofferson eaar ba, maron̄ ukōt piktok in armej eo n̄an juon Rikwojarjar ilo juon iien.
Pukōtļo̧k ro jet ej bar juon jekjek eaorōk an jipadpad eo an ko̧jpeļ in. Membōr ro rej eddo in kajjojo im āinwōt juon Kabun̄ n̄an pukōtļo̧k n̄an lo̧mo̧o̧r ro me rej pād ilo aikuj ilo kannōk im jetōb, ritōl ro raar ba.
Jej aikuj jab jenliklik n̄an jibwe pein doon ippān ro jet ilo tōmak ko jet im doulul ko n̄an jipan̄ n̄an kōjparok rijeram̧ōļ ro im riaikuj ro, Elder Christofferson eaar ba. Ritōl ro an priesthood eo rej aikuj tōl ilo kijejeto kein, bōtaab membōr ro im mijende ro rej aikuj rejtake jerbal jab in barāinwōt.
Juon ekōnono ippān juon kurub in armej kar kalikkar jibadbad eo kōn kwaļo̧k n̄an baam̧le ko, kōkajoorļo̧k rikabwijer ro an priesthood eo an melkisedek, im jipan̄ n̄an kalōk tōmak ilo naan in kam̧ool an jodikdik ro. Elder Ballard im Elder Neil L. Andersen jen Doulul eo an Jon̄oulruo Rijilōk ro kar bōk kuņaer, ippān ļo̧k Ronald A. Rasband jen Būreejtōnji eo an Jiljilimjuonn̄oul eo; Elaine S. Dalton, būreejtōn eo eutiej an Doulul eo Jiron̄ ro; im Rosemary M. Wixom, būreejtōn eo eutiej an Būraimere.
Elder Rasband eaar ba bwe aolep ritōl ro rej aikuj bōk kuņaer ilo bar kōrool tok membōr ro n̄an lukkuun niknik, im Elder Andersen eaar kalikkar bwe jodikdik ro rej aikuj in ļapļo̧k aer bōk kuņaer ilo bar kōrool tok membōr ro im kōkajoorļo̧k jodikdik ro jet.
Tōpar Eddōkļo̧k eo Em̧ool
Eddōkļo̧k eo em̧ool ej itok ilo ad kōjerbal pedped ko an ko̧jpeļ eo ilo mour ko ad kajjojo raan, Būreejtōn Uchtdorf eaar kalikkare.
“Ilo ami ļōmņak kōn unin kōnono kein, kajjitōk ippāmi make kōn ‘etke’ kom̧ij kōm̧m̧ane jerbal eo im kwaļo̧k eo im ‘ta eo kom̧ij’ aikuj kōm̧m̧ane āinwōt tōprak eo, ilo eddo ko ami āinwōt kajjojo armej im āinwōt ko̧o̧njeļ ko,” eaar ba.
Katak Eļapļo̧k
Kajjojo armej remaron̄ alooje, ron̄jake, būriin, im kanne kein katakin ko jān kadiwōjļo̧k eo ilo elōn̄ kajin ko kōn etal n̄an lds.org/study/other-addresses im jiped Worldwide Leadership Training.
Elder M. Russell Ballard jen Doulul eo an Jon̄oulruo Rijilōk ro ej kōnono ilo juon kumi in ekōnono eaar kōm̧m̧an ejja m̧ōttan wōt Kweilo̧k in Kaminene eo an Ritōl Aolepen Laļ in ilo Pāpode 2012.
© IRI