Bōk Iien n̄an Kōnono im Ron̄jake

Jen Rosemary M. Wixom

Būreejtōn eo Eutiej an Būraimere

Jān juon kōnono kar kadiwōjļo̧k kōn jetļait in juon kweilo̧k eļap ilo Salt Lake City kar kwaļo̧k e ilo Oktoba 24, 2010.

Jipadpad in kijejeto eo ad n̄an kōkōm̧anm̧anļo̧k kōnono rainin enaaj kōjeram̧m̧an baam̧le eo ad indeeo.

Ilo juon laļ eo eweppān aolep ajri rej ro̧o̧l n̄an kapijuknen eo aer jān jikuuļ n̄an wōnm̧aeik er kōn juon piliej in chocolate chip kukiij kar iiōke emeņeņe, juon kūlaj aitok in milik m̧ōļo, im juon m̧am̧a epojak n̄an bōk an iien n̄an kōnono im ron̄jake kōn raan eo an ajri eo. Jejjab mour ilo juon laļ eweppān, kōn menin komaron̄ kejoon kukiij ko im milik eo, eļan̄n̄e kwoj kōņaan, bōtaab jab kejoone “bōk iien n̄an kōnono im ron̄jake.”

Rōn̄oul-ratimjuon iiō ko remootļo̧k, Būreejtōn James E. Faust (1920–2007), Rikakipilōklōk eo Kein Karuo ilo Būreejtōnji eo Kein Kajuon, kar būrom̧ōj ilo an kar ba bwe baam̧le ko ewōr jidik wōt aer iien ippān doon. Ļōmņak kake men jab in—29 iiō ko remootļo̧k—eaar ba ilo kweilo̧k eo eļap: “Juon iaan jorrāān ko reļļap ilo baam̧le ko rainin ej bwe edikļo̧k im dikļo̧k ad joļo̧k iien ippān doon. … Iien ippān doon ej iien aorōk—iien aikuji n̄an kōnono, n̄an ron̄jake, n̄an kōketak, im n̄an kwaļo̧k ekōjkan kōm̧m̧ani men ko.”¹

Ilo ad joļo̧k iien ippān doon im kōnono ippān ajri ro nejid, jej jino jeļā kajier im rej jino jeļā kajied. Men ko raorōk tata ad, rej en̄jake ko an būruōd, renaaj erom juon m̧ōttan bwebwenato eo ad ippān kajjojo ajri.

Ta ennaan eo eaorōk tata jān būruōm̧ kwonaaj kar kālet n̄an kwaļo̧k ippān ajri eo nejūm?

Rikanaan Moses ej katakin kōj ilo Duteronomi:

“Im kwōn yokwe Jeova am̧ Anij kōn aolepen būruōm̧, im kōn aolepen am̧, im kōn aolepen am̧ kajoor.

“Im naan kein, ij jiron̄ eok rainin, ren ilo būruōm̧:

“Im kwōn kanooj katakin ro nejōm̧ kaki, im kwōn kōnono kaki n̄e kwōj jijet ilo m̧weo im̧ōm̧, im n̄e kwōj etetal ilo iaļ, im n̄e kwōj babu, im n̄e kwōj jerkak” (Duteronomi 6:5–7; aorōk eo kar kobaik).

Im Imaron̄ ke kobaik bar juon: “Im n̄e kwoj m̧ōn̄ā ilo tebōļ in kōjota eo ippān doon.”

Eļan̄n̄e jej ikrelel bwe baam̧le ko ad ren ippān doon n̄an indeeo, jān jino jekjek in rainin. Joļo̧k iien kōnono ippān ajri ro nejid ej juon jeram̧m̧an ilo baam̧le eo ad indeeo ilo ad etetal ilo iaļ eo ļo̧k n̄an mour indeeo ippān doon.

Juon m̧am̧a jān Illinois, USA, eaar kwaļo̧k ekōjkan an kar kōm̧m̧an iien n̄an kōnono ippān ajri ro nejin:

“Ke ajri ro nejim raar iddik, Iaar deļo̧n̄e juon iminene in alooj jet būrookraam̧ ko rem̧m̧an ippa ilo tipi. … ilo m̧ool, būrookraam̧ ko raar jo̧ ilo ejja iien eo wōt ajri ro raar ilo̧k in kiki.

“… Ilo juon tōre Iaar kile Iaar likūt būrookraam̧ ko aō ilōn̄ tata in laajrak eo aō im ajri ro ilaļ ļo̧k. Ium̧win jidik iien Iaar kajjieon̄ riiti bwebwenato in kiki ko ilo an TV eo jo̧, bōtaab Iaar jeļā ilo būruō eaar jab wāween eo em̧m̧an tata. Ke Iaar kōjekļo̧kjeņ kōn raan ko im wiik ko Iaar mootļo̧k aō ilo iminene in TV eo aō, Iaar jino en̄jake aō bōd im kar jokālet n̄an oktak. Eaar bōk jidik iien n̄an kareel eō make bwe Imaron̄ kar lukkuun kune TV eo.

“Ālkin enan̄in ruo wiik ko in jab kōjo̧ tipi eo, Iaar en̄jake an eddo eo ilo juon wāween kar ļōn̄jak. Iaar kile eaar em̧m̧anļo̧k aō en̄jake, em̧ool erreo ļo̧k ilo juon jekjek, im Iaar jeļā Iaar kōm̧m̧ane kālet eo ejim̧we.”²

Iien kiki ej juon iien ejejjet n̄an kōnono.

Hilamōn eaar ba kōn ritariņae ro, “Raar kōmeļeļeik n̄an eō naan ko an ro jineer, im ba: Kom̧ij jab pere ke ro jinnām raar jeļā” (Alma 56:48).

Eaar “naan ko an jineer” me kar katakin er. Ilo aer kōnono n̄an ajri ro nejier, m̧am̧a ro raar katakin naan eo an Anij.

Kejparok Kōnono An Juon Make

Eļap em̧m̧an ej itok jān kōnono, im rikapo eo ejeļā kōn kajoor eo an naan ko kōnono kaki. Ej kōņaan kadikļo̧k jetōb eo me ej deļo̧n̄ tok ilo m̧ōko im̧ōd n̄e jej kōnono, ron̄jake, kōketak doon, im kōm̧m̧ani men ko ippān doon.

Ejjab tōprak an Satan kar kajieon̄ in bōbraik Jepļaaktok eo an ko̧jpeļ eo an Jisōs Kraist ilo epepen in ke eaar kajieon̄ in kabōjrak wōnm̧aaņļo̧k eo an kōnono eo eaorōk ikōtaan Joseph Smith im Anij Jemed im Nejin, Jisōs Kraist.

Joseph Smith eaar ba bwe eaar m̧ōkaj an jako ļo̧k jān jet kajoor me eaar kanooj in pād ejake eō, im eaar wōr juon an kareel ekabwilōn̄lōn̄ iooō me eaar lukōj loō bwe in jab maron̄ kōnono (lale Joseph Smith—History 1:15).

Rikapo eo ekōņaan lukōj lood—jabdewōt men n̄an bōbrae kōj jān kwaļo̧k ilo ainikien en̄jake ko an būruōd ilo jelm̧ae doon. Ej bōk laudin̄din̄ ilo ettoļo̧k im kōm̧ad ad; ej laudin̄din̄ ilo ekeroro; ej laudin̄din̄ ilo kōnono ilo ejjeļo̧k tokjen—jabdewōt men me enaaj bōbrae kōj jān okmeņeņ in ainikien eo im en̄jake eo an juon make me ej itok jān kōnono ilo jelm̧ae doon.

Ron̄jake Būruōn Ajri ro Nejid

Ron̄jake ej aorōk in wōt kōnono. Elder Jeffrey R. Holland an Doulul eo an Jon̄oulruo Rijilōk ro eaar ba: “Eļan̄n̄e jej ron̄jake kōn iakwe, jeban aikuj in ļōmņak kōn ta eo n̄an ba. Enaaj letok n̄an kōj … jān Jetōb.”³

N̄e jej ron̄jake, jej meļeļe en̄jake ko an ro ipeļaakid. Jemedwōj Ilan̄ ewōr an karōk n̄an kajjojo ajri ro Nejin. Ļōmņak eļan̄n̄e jemaron̄ kar lo karōk eo an kajjojo ajri ro nejid. Ta eo eļan̄n̄e jemaron̄ kar jeļā ekōjkan n̄an kōkōm̧anm̧anļo̧k menin leļo̧k ko ad ilo jetōb? Ta eo eļan̄n̄e jemaron̄ kar jeļā ekōjkan kareel juon ajri n̄an tōpar kōjatdikdik eo an? Ta eo eļan̄n̄e jemaron̄ kar jeļā ekōjkan n̄an jipan̄ kajjojo ajri oktak jān tōmak an juon ajri n̄an naan in kam̧ool?

Ekōjkan ad maron̄ jeļā?

Jemaron̄ jino n̄an jeļā kōn ron̄jake.

Juon baba in Armej ro Rekwojarjar ilo Raan-ko Āliktata eaar ba: “Ij kōm̧m̧an eļapļo̧k n̄e Ij ron̄jake ajri ro nejū jān n̄e Ij kōnono n̄an er. … Jidik kōn jidik em̧ōj aō kar jeļā bwe ajri ro nejū rejjab aikuji kapilōk ko aō me rej āinwōt rejejjet, im uwaak ko remeletlet. … N̄an er, maron̄ n̄an kajjitōk kajjitōk ko aer im n̄an kōnono kaki inepata ko aer eļapļo̧k an aorōk jān bōk uwaak ko aō. Ekkā n̄e rej dedeļo̧k aer kōnono, eļan̄n̄e eaar aitok aō kar ron̄jake im jejjet, rejjab lukkuun aikuji uwaak eo aō. Em̧ōj kadede aer lo uwaak eo aer.”⁴

Ebōk iien n̄an kalimjōk men ko me eļap tata aer aorōk. Kōnono, ron̄jake, im kōketak rejjab m̧ōkaj aer waļo̧k. Rejjab aikuj ekairir kaki ak jikejuuļ—em̧m̧an tata aer waļo̧k ilo aer wōnm̧aaņļo̧k. Rej waļo̧k n̄e jej kōm̧m̧ani men ko ippān doon: jerbal ippān doon, ejaaki ippān doon, im ikkure ippān doon. Rej waļo̧k n̄e jej kuni kein alooj im kōjan̄jan̄ ko, julo̧k kōm̧ad ko an laļ in, im kalimjōk wōt doon.

Kiiō, ej juon men epen n̄an kōm̧m̧ane. N̄e jej bōjrak im kuni aolep men, jej aikuj pojak n̄an ta eo enaaj waļo̧k tok ālik. Ilo jino in ikōn̄ emaron̄ jab em̧m̧an; mejatoto nana kōn luuji emaron̄ waļo̧k jān e. Kijenmej, kōttar jet jōkōn ko, innām lem̧ōņōņo̧. Kōmaat aolepen am̧ n̄an ro ipeļaakūm̧ kōn kajjitōk juon kajjitōk kōn er innām jino ron̄jake. Ro jinen im jemen, kōnono kōn juon itok limo eo an ajri eo nejūm̧. Ettōn̄ kōn jem̧aan—im ettōņak kōn ilju im jekļaj. Bwebwenato eo ebwebwe em̧ool emaron̄ oktak n̄an juon ekōnono eo eļap meļeļe in.

Kōllaajraki Aorōk ko an Jipadpad eo Ad Indeeo

Spring eo ļo̧k, ke Iaar loļo̧k juon kūlaj ruum̧ an jiron̄ ro, rūkaki eo eaar kajjitōk ippān kūlaj eo n̄an je men ko 10 raorōk tata. Iaar jino m̧ōkaj aō jeje. Ij aikuj kwaļo̧k, ļōmņak eo aō m̧oktata eaar ijjino kōn “Nōm̧ba 1: karreoik tūro̧o̧r in pinjeļ eo ilo jikin m̧ōn̄ā eo.” Ke laajrak ko am raar dedeļo̧k, ritōl eo an Doulul eo an Jiron̄ ro eaar kajjitōk ippām n̄an kwaļo̧k ta eo kōm kar je. Abby, eo ej kab tōn tōpar 12, eaar jijet turū. En̄in eaar laajrak eo an Abby:

Etal n̄an college.
Erom juon interior designer.
Etal n̄an juon mijen n̄an India.
M̧are ilo tampeļ ippān juon mijinede eaar ro̧o̧l jān mijen.
Wōr laļem ajri ro im juon em̧.
Jilkinļo̧k ajri ro nejū n̄an mijen ko im n̄an college.
Erom juon “cookie-giving” būbū.
Kautiej ajri ro jibū.
Katak eļapļo̧k kōn ko̧jpeļ eo im lem̧ōņōņō kōn mour.
Bar ro̧o̧l n̄an mour ippān Jemed ilo Lan̄.

Ij ba, “Kom̧ool, Abby. Kwar katakin eō kōn bōk juon meļeļe eo kōn karōk eo an Jemedwōj Ilan̄ n̄an kōj aolep. N̄e kwojeļā kwoj etetal ilo iaļ eo, kōjekdo̧o̧n jabdewōt iaļ ko remaron̄ in waļo̧k, kwonaaj EM̧M̧AN. N̄e iaļ eo am̧ ej kalimjōk wōt menin kōttōpar eo eļaptata—eo an mour āinwōt Anij im bar rooļ n̄an Jemed Ilan̄, kwonaaj tōpar ijōņ.”

Ia eo Abby eaar bōk ļōmņak in an jipadpad an indeeo? Ej ijjino ilo kapijuknen ko ad. Ej ijjino ilo baam̧le ko ad. Iaar kajjitōk ippān, “Ta eo kwoj kōm̧m̧ane ilo baam̧le eo am̧ n̄an kōm̧m̧ani kain men in aorōk kein?”

En̄in eaar uwaak eo an: “Ijjello̧kin riiti jeje ko rekwojarjar, kōmij ekkatak Kwaļo̧k Ko̧jpeļ eo Aō.” Innām eaar kakobaba, “Eļap am kōnono—ilo nokon in jota an baam̧le, ilo kōjota ippān doon, im ilo waan ettōr eo am ilo am ettōr.”

Nipai eaar je: “Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist.” Etke? “Bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jerawiwi ko aer” (2 Nipai 25:26).

Kōnono, ron̄jake, kōketak doon, im kōm̧m̧ani men ko ippān doon āinwōt juon baam̧le enaaj kepaakļo̧k kōj n̄an ad Rilo̧mo̧o̧r, eo ej iakwe kōj. Jipadpad in kijejeto eo ad n̄an letok letak meļeļe em̧m̧anļo̧k rainin—lukkuun rainin—naaj kōjeram̧m̧an baam̧le ko ad indeeo. Ij kam̧ool bwe n̄e jej kōnono kōn Kraist, jej barāinwōt m̧ōņōņō ilo Kraist im ilo menin letok eo an Pinmuur eo. Ajri ro nejid renaaj jeļā “n̄an ia rej maron̄ reilo̧k n̄an jeorļo̧k jerawiwi ko aer.”