Aolep Jeļā Kajjien Bleck
N̄an Honoura “Bleck” Bonnet, bājkōtbo̧o̧l eaar men eo de eo ej kea kake. Ke eaar tōpar 15 iiō, Bleck eaar juon diktak in m̧ōkade ilo Franch Polynesia—juon iaan rukkure ro rōm̧akede tata n̄an juon iaan tiim ko rōm̧akede ilōn̄ ilo m̧ōttan eo an rūm̧m̧an ded ilo laļ eo. Men̄e etan kōm̧m̧an kōjak eo an eaar bōd jipeeļe jān naan in Pālle eo black, eaar ejjeļo̧k bōd ilo tōļan eo an.
Bōtaab eaar kōņaan eļapļo̧k. Eaar kōņaan ikkure ilo jikin m̧ōkade ilo Europe. Im eļapļo̧k jān jabdewōt men, eaar kōņaan wiini juon matōļ kooļ ilo Ikkure ko an South Pacific.
Kappōjrak eo de eo me eaar āinwōt jutak ilo iaļ eo an eaar Kabun̄ in.
Juon Em̧m̧aan ilo juon Mijen
Men̄e kumi eo Bleck eaar ikkure n̄an e ilo tōre eo eaar juon eo kar jipan̄ jān Kabun̄ in, Bleck eaar wōr jidik an itok limo ilo Kabun̄ in ak kūr eo an rikanaan eo n̄an aolep likao ro rerreo im remaron̄ n̄an jerbale juon mijen.
Em̧ōj an kar jiron̄ ļo̧k bisop eo an ej jamin naaj kar etal n̄an juon mijen. Eaar jab lo ekōjkan an maron̄ kar ikkure ilo jikin m̧ōkade eļan̄n̄e eaar joļo̧k ruo iiō.
Eo eaorōkļo̧k, Ikkur ko an South Pacific—raar kōm̧m̧an aolep emen iiō—naaj kar bōk jikier ilo tōre en mijen eo an, im Tahiti Basketball Federation eo eaar itok limo in bōk e n̄an ikkure n̄an kumi eo an laļ eo. Āliktata eaar wōr an iien em̧m̧an n̄an kōjemļo̧k naan ko jemen eaar ba aolep iien n̄e Bleck eaar jino ļōmņak etōr jān jon̄ak kōn e make: “Aolep jeļā kajjien Bleck, bōtaab ejjeļo̧k juon an matōļ kooļ.”
Jemen Bleck, Jean-Baptiste, eaar kwaļo̧k naan ko ilo wāween eo em̧m̧an. Bōtaab raar kakūtōtōik Bleck. Raar juon kein kakememej bwe men̄e rialooj bājkōt ro ilo aolepen Tahiti raar jeļā kajien, eaar ejjeļo̧k an matōl jān ikkure ko. Jemen eaar wiini juon matōl kooļ ippān kumi eo an em̧m̧aan ilo kar Ikkure ko an South Pacific m̧oktata.
Eaar mijen eo an Bleck n̄an kwaļo̧k bwe naan ko rebōd. Eaar ejjeļo̧k an iien n̄an jabdewōt bar mijen.
Juon Oktak in Ļōmņak, juon Oktak in Bōro
Kōjekdo̧o̧ņ en̄jake ko an kōn juon mijen, Bleck eaar bōk wōt kuņaan ilo m̧akūtkūt ko an Kabun̄ in. Ilo juon eeb an Kabun̄ ke eaar 16, Bleck eaar bōk juon peran n̄an kajjitōk ippān Myranda Mariteragi n̄an eeb. Myranda eaar juon rikkure bājkōt ejeļā barāinwōt—kōn ettōņak ko kōn wiin matōl kooļ eo an make. Jemen eaar barāinwōt pād ilo kumi eo m̧oktata eaar wiini matōļ.
Jekōn ko ālkin an kar kajjitōk ippān, al eo eaar jem̧ļo̧k. Kōn menin raar eeb ilo al eo tok juon, eo eaar al eo āliktata n̄an joten eo. Jen tōre in Bleck eaar jab kōņaan bwe eeb eo en jem̧ļo̧k.
Bleck eaar jab ļōmņak in m̧are ilo tampeļ ak em̧ool m̧areiki juon membōr n̄an wāween jab in. Bōtaab men jab eo eaar jino an oktak ke eaar jino an em̧m̧an ļo̧k an jeļā kajien Myranda ium̧win iiō tok ruo. Ilo kapijuknen eo an juon raan, juon men eaar kōm̧m̧ane ilo Doulul eo an Jiron̄ ro kar kareel ļōmņak eo an. Eaar riit, “Inaaj m̧are ilo tampeļ.”
Itok limo eo an Bleck ilo Myranda im kalim̧m̧ur eo an epen n̄an m̧are ilo tampeļ raar bwe n̄an kōm̧m̧an bwe en bar ļōmņak kōn karōk ko an. Eaar jokālet n̄an jino ļōmņak kōn Kabun̄ in ilo m̧ool. Jokālet ko an raar tōl ļo̧k n̄an m̧akūtkūt ko me kar kōtļo̧k bwe Jetōb Kwojarjar en jerbal ilo mour eo an.
Jokālet eo
Juon iaan jokālet ko eaar n̄an kōppopo n̄an bōk juon kōjeram̧m̧an an petriak ilo 18 iiō dettan. Ke patriak eo eaar ba ilo kōjeram̧m̧an eo bwe Bleck enaaj kar jerbale juon mijen im m̧are ilo tampeļ, eaar en̄jake Jetōb. “Iaar jeļā bwe en̄iin ta eo Anij eaar kōņaan bwe in kōm̧m̧ane,” ej ba.
Men̄e kumi eo an laļ eo eaar āinwōt ren kar wōr juon aer matōļ, Bleck eaar kālet kōn rejtak eo an baam̧le eo an bwe enaaj kar likūt ta eo Anij eaar kōņaan im̧aan jān ta eo ekōņaan. Jokālet eo eaar jab pidodo. Kōņaan eo n̄an ikkure eaar ļap. Im em̧ōkaj an kar jeļā bwe jokālet eo an n̄an leļo̧k n̄an an kilaan Anij enaaj kar idajon̄jon̄e eļapļo̧k jān juon kōttan.
Ālkin an kar jerbal āinwōt juon mijinede ilo Tahiti ium̧win juon iiō, basketball federation eo eaar kajjitōk eļan̄n̄e emaron̄ bar ro̧o̧l n̄an kumi eo n̄an juon wōt allōn̄ n̄an bōk kūņaan ilo ikkure ko.
Mijen būreejtōn eo an Bleck, eaar n̄ūrbōktak kōn tōprak in en̄jake eo enaaj kar pād ilo maron̄ eo an Bleck n̄an bar ro̧o̧l im jerbal, eaar en̄jake im̧we n̄an jiron̄ e, “Kwomaron̄ em̧m̧akūt eļan̄n̄e kwoj kōņaan, bōtaab kojjab maron̄ bar jepļaaktok.”
Bleck eaar kōņaan matōļ eo, bōtaab ejako an kar kōņaan eļapļo̧k jān jabdewōt bar men. Mijen eo an eaar kabwilōn̄lōn̄. Eaar jab kōņaan joļo̧k iiō eo an āliktata, jekdo̧o̧n n̄an bājkōtbo̧o̧ļ.
Bleck eaar pād wōt.
Kumi eo eaar wiin kooļ.
Jekjek ko Reoktak, Ejja Jokālet eo wōt
Ālkin an Bleck kar kadedeļo̧k mijen eo an ilo utiej, eaar m̧areiki Myranda ilo Papeete Tahiti Tampeļ, im raar jino juon baam̧ļe. Eaar barāinwōt jino ikkure n̄an kumi eo an laļ eo.
Myranda eaar ikkure point guard ilo kumi eo an laļ eo an kōrā im kōppopo n̄an Ikkure ko an South Pacific e make.
Ijowōt ke, ke ikkure ko raar epaaktok, ripālele eo raar jino kajoorļo̧k aer en̄jake bwe rej aikuj bwe en wōr nejier kein karuo.
Kōn ikkure ko rej itok edik ļo̧k jān juon iiō, enaaj kar pidodo n̄an jab ļōmņake juon bar nin̄nin̄ m̧okta ļo̧k n̄an Myranda n̄an ikkure. Kumi eo an kōrā eaar wōr an iien n̄an matōļ.
Bōtaab ripālele eo eaar katak jān en̄jake bwe leļo̧k kōņaan ko aer n̄an Anij eaar bōkļo̧k n̄an er kōjeram̧m̧an ko rōļļapļo̧k jān jabdewōt men remaron̄ kar kōjatdikdik kake jān ļoor ikrelel ko aer make. Ālkin lukkuun ekkatak im jar, rar jokālet n̄an door m̧okta baam̧le eo aer.
Ilo 1999, ke Myranda eaar ralitōk allōn̄ in an bōro̧ro, kumi eo an kōrā eaar wiini ko̧o̧l.
Aolep Rejeļā Kajjien Bleck
Bleck im Myranda raar maron̄ in ikkure bājkōtbo̧o̧ļ ilo jon̄ak ko ilōn̄ tata ilo Franch Polynesia ium̧win jon̄oul iiō ko remootļo̧k—wiini national league championship ko im tournament cup ko im ikkure n̄an kumi eo an laļ eo ilo 2003 im 2007 ikkure ko.
Ilo 2011 ikkure ko, erro jim̧or kar bōk kuņaerro, ilo iien wōt Bleck eaar pād āinwōt kooj eo an kumi eo an em̧maan. Ilo an Myranda im kumi eo an kōrā kar wiini matōļ kooļ, kumi eo an em̧m̧aan eaar bōk bronze, bar juon alen likjab jān ettōņak eo an Bleck kōn kooļ.
Jet iien Bleck ej ļōmņak ta eo mour eo an emaron̄ in kar āinwōt eļan̄n̄e eaar kōm̧m̧ane ta eo eaar kōņaan ijjello̧kin ta eo Anij eaar kōņaan.
“Imaron̄ in kar wōr juon aō matōļ kooļ,” ej ba. “Bōlen Inaaj kar ikkure ilo jikin an m̧ōkade, bōlen jaab.”
Bōtaab ripālele eo ejjab ajļo̧ke jokālet ko raar kōm̧m̧ani. Rejjab jeļā ekōjkan aer maron̄ kar m̧ōņōņō ļo̧k.
“Iaar m̧are ilo tampeļ,” Bleck ej ba. “Ewōr juon pāleō kōrā em̧m̧an, emen nejim ajri ro raiboojoj, im Ij pād wōt ilo Kabun̄ in. Bājkōtbo̧o̧l make ejjab maron̄ letok n̄an eō jabdewōt iaer. Kōjeram̧m̧an ko kein me raar itok āinwōt juon tōpran likūt Irooj m̧okta.”
Likūt Irooj m̧okta eaar jab kōjakoik kōjak eo an jemen, bōtaab eaar leļo̧k naan ko rōkāāl meļeļeier. Jet iiō ko ļo̧k ke federation eo eaar ļōmņak in jikejuuļi ikkure ko an league eo ilo Jabōt ko, būreejtōn eo an club eo eaar kweilo̧k n̄an ekōnono kake. Juon eaar kajjitōk, “Kwar ke kajjitōk ippān Bleck?”
Jipadpad eo eaar jako.
Kōnke Bleck eaar likūt Irooj m̧okta, aolep raar jab jeļā wōt kajien Bleck—raar jeļā ta eo ej tōmak kake.
Honoura “Bleck” im Myranda Bonnet raar aitok aer bōk kūņaer ilo bājkōtbo̧o̧l ilo Tahiti.
N̄an Bleck im Myranda, wejepedik ilo ikkure eo aer kar dikļo̧k an aorōk n̄an wejepedik eo ilo baam̧le eo aer.
Pija jen Adam C. Olson, ijjello̧kin n̄e kar je
Pija in bājkōtbo̧o̧ļ jen Tamara Ratieta © IRI