Etke Jemenere?

Ta eo kwoj ļōmņake ej men eo aorōk tata juon rijikuuļ emaron̄ bōk jān jemenere im institute?

Ta eo kwoj ba ej men eo eaorōk tata juon rijikuuļ emaron̄ bōk jān jemenere im institute? Ke juon kumi in rijikuuļ in jemenere raar kajjitōk ippān Commissioner eo an Pedped in Jeļāļo̧kjen ilo Kabun̄ (Church Educational System) eo, Elder Paul V. Johnson an Jiljilimjuonn̄oul eo, ejja kajjitōk in wōt, eaar uwaak bwe men eo aorōk tata komaron̄ bōk ej “naan in kam̧ool eo em̧ool bwe Jisōs ej RiKraist eo. Meļeļe eo me jeļāļo̧kjeņ eo em̧ool ej jeļāļo̧kjeņ ilo jetōb. Ej ta eo ej itok jān Jetōb Kwojarjar n̄an jetōb ko ad kajjojo armej. Ej m̧ool eo ekajoor tata, men eo ekajoor tata me maron̄ itok jān jemenere im institute. Ejjab baj ukōt wōt ta eo kwojeļā; ej ukōt wōn kwe, im ej ukōt ekōjkan am̧ kalimjōk laļ in. Im kain jeļāļo̧kjeņ eo eutiej ļo̧k ej jipan̄ n̄an kōm̧m̧an bwe jeļāļo̧kjeņ ko jet am̧ ren dedeļo̧k” (“A Higher Education,” New Era, Epr. 2009, 15).

Elder Johnson ej juon iaan Rutiej ro an Kabun̄ rellōn̄ eo eaar kōnono kōn kōjeram̧m̧an ko rem̧m̧an me rej itok jān pād ilo jemenere im institute. Kōn menin eļan̄n̄e kwoj ļōmņak etke kwoj aikuj etal n̄an jemenere, errein rej un ko rem̧m̧an rellōn̄ ļo̧k jān rikanaan ro im rijilōk ro.

Bōk kuņaam̧ ilo Jemenere

“Jemenere enaaj jipan̄ kom̧ meļeļe im pedped ioon katak ko im Pinmuur eo an Jisōs Kraist. Kom̧ ņaaj en̄jake Jetōb eo an Irooj ilo ami katak n̄an iakwe jeje ko rekwojarjar. Kom̧ naaj kōpooj kom̧ make n̄an tampeļ im jerbal in mijinede.

“Jodikdik ro, Ij kajjitōk ippāmi n̄an bōk kuņami ilo jemenere. Ekkatak jeje ko rekwojarjar ami kajjojo raan. Kanooj ron̄jake rūkaki ro ami. Mour kōn ta eo kwar lukkuun jar n̄an katak.”

Būreejtōn Thomas S. Monson, “Participate in Seminary,”[Bōk kuņaam̧ ilo Jemenere] seminary.lds.org.

Lo Jilu Men ko Jemenere Emaron̄ Kōm̧m̧ani

“Ewōr jilu men ko rekajoor jemenere emaron̄ kōm̧m̧ani. M̧oktata, ej kobaik jodikdik ro ippān doon ro rej kwaļo̧k kōn aorōk ko reier wōt juon. Jodikdik ro rej kōņaan pād ippān ro jet me rej kwaļo̧k tōmak eo aer im ro rej iakwe jeje ko rekwojarjar. Kein karuo, ej kobaik jodikdik ro ippān doon ippān juon rūkaki eo ewōr an naan in kam̧ool, im rej maron̄ en̄jake kajoor eo an n̄e kwaļo̧ke. Kein kajilu, jemenere ej kōm̧m̧an bwe jodikdik ro ren itok limoier ilo jeje ko rekwojarjar.”

Būreejtōn Henry B. Eyring Rikakpilōklōk eo Kein Kajuon ilo Būreejtōnji eo Kein Kajuon, “A Discussion on Scripture Study,” Liahona, Juļae 2005, 11.

Kōm̧m̧an bwe En Im̧aan Tata

“Rijikuuļ raņ, eļan̄n̄e aorōk ko ami rej pād ilo jejjet, kom̧ij jamin naaj āliklik n̄an joļo̧k juon kūlaj eo kālet jān kwe make me emaron̄ kaitoktok limo n̄an kom̧ ijello̧k in an katakin kom̧ eo emaron̄ dāpij lukkuun pedped eo an. Innām, n̄e kom̧ij deļo̧n̄e, pād ie, ekkatak, im katak. Kareel ro m̧ōttami n̄an kōm̧m̧ane ejja āinwōt. Komij jamin naaj n̄an jidik ajļo̧ke; mein Ij kalim̧m̧uri kom̧.”

Būreejtōn Boyd K. Packer, Būreejtōn eo an Doulul eo an Jon̄oulruo Rijilōk ro, “Agency and Control,” Ensign, Māe 1983, 67.

Āje juon Pedped n̄an Lem̧ōņōņō im Jeram̧m̧an

“Būrookraam̧ ko an jemenere renaaj jipan̄ kom̧ āinwōt juon likao ak jiron̄ n̄an āje juon pedped n̄an lem̧ōņōņō im jeram̧m̧an ilo mour.”

Elder Richard G. Scott an Doulul eo an Jon̄oulruo Rijilōk ro, “Now Is the Time to Serve a Mission!” Liahona, Māe 2006, 88

Karuwaineneik tok Kōjeram̧m̧an ko n̄an Mour eo Am̧

“Ij kam̧oolol kōn jejtōm̧ eo an jemenere ilo Kabun̄ in im kōn būrookraam̧ eo an institute an Kabun̄ in. Ikōņaan libjōrjōre aolep rijikuuļ in high school ro ijin n̄an bōk em̧m̧an eo an būrookraam̧ eo an jemenere. Mour ko ami renaaj ļapļo̧k aer jeram̧m̧an eļan̄n̄e kom̧ij kōm̧m̧ane.”

Būreejtōn Gordon B. Hinckley (1910–2008), “Excerpts from Recent Addresses of President Gordon B. Hinckley,” Ensign, Tij. 1995, 67.

Erom juon Rikadiwōjļo̧k an Jemenere

“Pād ilo jemenere iien otemjej im erom juon rikadiwōjļo̧k an jemenere. Katak an jemenere ej juon iaan en̄jake ko ilo jetōb eļap tokjāer juon likao [im jiron̄] remaron̄ bōke.”

Būreejtōn Ezra Taft Benson (1899–1994), “To the ‘Youth of the Noble Birthright,’” Ensign, Māe 1986, 44; “To the Young Women of the Church,” Ensign, Nob. 1986, 82.

Katak M̧ool ko an Ko̧jpeļ eo

“Ikōņaan bwe aolep ļaddik im leddik ro ren maron̄ etal n̄an jemenere, kōnke en̄in ej ijo rej katak elōn̄ iaan m̧ool ko an ko̧jpeļ eo. Jemenere ej ijo elōn̄ iaer rej bōk jon̄ak ko aer ilo ļōmņak ko aer kōn ta eo renaaj kōm̧m̧ane, im rej etal n̄an mijen ko.”

Būreejtōn Spencer W. Kimball (1895–1985), “President Kimball Speaks Out on Being a Missionary,” New Era, Māe 1981, 49.

Pija in Spencer W. Kimball kōn jipan̄ jān Ļo̧o̧k ko an LDS Kabun̄ in