O Tatalo, Faamatalaga, ma Faalavelave Faalenatura

Saunia e Marissa Widdison

Mekasini a le Ekalesia

E ui e eseese gagana e tautatala ai nei teineiti e toalua ma e silia ma le 6,000 maila (9,6000 km) le mamao e nonofo eseese ai, peitai e i ai se mea faapitoa la te tutusa ai: ua la mauaina se auala e tausia ai pea se uiga lelei pe a osofaia e ni faalavelave faalenatura o laua nuu. Tagai i se tala moni lava ia Honoka O. mai Iapani ma Maggie W. mai Misuri, ISA. O le a se mea na fesoasoani ia i laua ina ia la tumau ai pea i le faamaoni ma le fiafia, i taimi o le faanoanoa ma le taufaafefe.

Honoka

O lou igoa o Honoka, ma ou te nofo i Chiba, Prefecture, Iapani. Ou te fiafia e taalo, tafue, ma tusi ata. O le mea ou te moemiti i ai o le avea lea ma se tusi ata i se aso.

O le tala faatusipaia ou te fiafia tele i ai e faatatau lea i le miti a Liae (tagai i le 1 Nifae 8). Ou te manatu e matua taua tele le Peraimeri aua e tele mea ou te aoao mai ai e uiga i le Atua ma Iesu. Ou te fiafia i le sauniga faamanatuga aua e mafai ai ona ou lagonaina lou lava mama pe a ou ai ma inu i le faamanatuga, ma o le mea lena ou te matua fiafia lava i ai.

Sa ou i ai i le aoga i le taimi na lulu ai se mafuie tele lava. O ou manatu muamua lava sa i ai, “Matua taufaafefe lenei mea!” ma “sa ou mafaufau pe o loo manuia lou aiga.” Sa ou tatalo i lou loto ina ia latou saogalemu ma ia faasao ola o tagata. Sa ou iloaina mulimuli ane e leai ma ni au uo na lavevea. I lena taimi, sa ou lagonaina ai na puipuia i matou e le Atua. Ou te iloa o loo soifua le Atua ma Iesu.

Maggie

Talofa! O au o Maggie mai Joplin, Misuri. I se tasi po sa iloa ai e lou tina ni lapataiga o se afa i luga o talafou, ma sa matou o uma i le fale a lalo. Sa ou fefe i le leotele ma le pao o le matagi. Sa ou popole i au uo ma a matou manu. Ina ua tea le afa, sa ou faafetai ua saogalemu lou aiga ma e le i tele ni mea na faaleagaina o lo matou fale.

Sa faaleagaina le tele o isi fale ma pisinisi e le asiosio lea na ui mai i totonu o le aai. Sa ou lagona le faanoanoa mo tagata na leiloloa ma feoti e na pele ia i latou. Sa fuafua e ou matua ma lou tuagane ma lou uso matua e fesoasoani e faamama lo matou taulaga. Sa ou mafaufau ai i le mau, “Pe a outou auauna atu i o outou uso a tagata, ua na o lo outou auauna atu lava lea i lo outou Atua” (Mosaea 2:17).

Sa ou manao foi e fesoasoani atu e faamama, ae na fai mai lou tina e le saogalemu mo se teineitiiti. Ona ou faalogoina lea o le Agaga Paia o faasoa mai se manatu maoae e faafiafia ai ia tagata. Sa ou faia ni faamatalaga pupuu se 20 o le faafetai e avatu i tagata volenitia. Sa ou faaaluina le tele o taimi e fai ai ia kata faapitoa taitasi ina ia lagona ai e tagata le Agaga ma iloa ai lo latou taua tele i lo matou taulaga.

Sa ou iloa ai foi e tusa lava pe le mafai ona e faia ni mea faapitoa e auauna atu ai, ae e mafai lava ona e mafaufau i nisi auala e auauna atu ai. O le a faamanuiaina oe e le Tama Faalelagi mo le auauna atu ia te Ia faapea ou uso a tagata.

Fale o Maggie

Fale o Honoka