O Le Valaau a le Faaola e Auauna Atu

Saunia e Peresitene Thomas S. Monson

O i latou uma e suesueina le matematika e iloaina le mea e ta’u o le common denominator [numera tutusa pito i lalo o le vaega mea]. Mo le Au Paia o Aso e Gata Ai, o loo i ai se common denominator [vaega tutusa] o loo fusia faatasi ai i tatou. O lena vaega tutusa o le valaau taitasi lea ua mauaina e i tatou taitoatasi e faatumuina ni tofiga i le malo o le Atua iinei i le lalolagi.

Pe o ta’usalaina oe i le muimui pe a oo atu se valaauga ia te oe? Pe o e taliaina ma le lotofaafetai ia avanoa taitasi e auauna atu ai i ou uso ma tuafafine, ma le iloaina o le a faamanuiaina e lo tatou Tama Faalelagi i latou Na te valaauina?

Ou te faamoemoe o le a le galo ia i tatou le autu tonu o a tatou avanoa faapelepele e auauna atu ai. O lena faamoemoega, lena sini faavavau, o le mea lava lea e tasi na fetalai mai ai le Alii ma o loo mauaina i le Penina Tau Tele: “Aua faatua, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”¹

Tau ina ia tatou manatua pea o le ofu o le auai i Le Ekalesia a Iesu Keriso o le Au Paia o Aso e Gata Ai e le o se pulupulu e faamafanafana ai ae o se ofutalaloa o tiutetauave. O lo tatou tiute, e faaopoopo atu i le laveaiina o i tatou lava, o le taiala lea o isi i le malo selesitila o le Atua.

E ala i le savali ma le loto i ai i le ala o le auauna atu i le Atua, o le a le mafai ai lava ona tatou i ai i le tulaga o Cardinal Wolsey lea na tusia e Siekisipia. Na aveesea le pule mai ia te ia ina ua mavae se olaga tautua i lona tupu, sa ia tagiauē ai ma le faanoanoa:

Pe a na fai lava ou te auauna i lo’u Atua ma le afa o le naunautai 
Sa ou auauna ai i lo’u tupu, semanu Na te le
Tuua lava a’u ua lē lavalavā i o’u fili.2

O le a le ituaiga o auaunaga e manaomia e le lagi? “E manaomia e le Alii le loto ma le mafaufau naunautai; ma o e e naunautai ma usiusitai o le a aia le lelei o le laueleele o Siona i aso nei e gata ai.”³

Ou te tu ma ou mafaufau i upu a Peresitene Ioane Teila (1808–87): “Afai tou te le faalauteleina o outou valaauga, o le a faamasinoina outou e le Atua mo i latou semanu tou te laveaiina pe ana faapea na fai o outou tiute.”⁴

E pei o se sulu malama o loo saili mo le lelei, o le soifuaga lea o Iesu a o Ia auauna atu i tagata. “A o a’u nei, o loo ia te outou pei o le auauna lava,”⁵ na folafola mai ai e Iesu a o Ia aumaia le malosi i vae o le pipili, le vaai i mata o le tauaso, le faalogo i taliga o le tutuli, ma le ola i le tino o le ua oti.

I le faataoto o le Samaria agalelei, sa aoao mai ai e le Matai i tatou ia alolofa i o tatou tuaoi e pei o i tatou lava ia i tatou.⁶ I Lana tali i le aoao talavou, sa Ia aoao mai ai i tatou ia lafoai lo tatou manatu faapito.⁷ I le fafagaina o le 5,000, sa Ia aoao ai i tatou ia vaai i manaoga o isi tagata.⁸ Ma i le Lauga i luga o le Mauga, na Ia aoao ai i tatou ia muai saili le malo o le Atua.⁹

I le Lalolagi Fou, sa tautino mai ai e le Alii toetu, “Ua outou iloa mea e tatau ona outou faia i la’u ekalesia; ona o galuega na outou vaai na ou faia o mea ia tou te faia foi; aua o mea na outou vaai ua ou faia o mea lava ia tou te faia.”¹⁰

Tatou te faamanuiaina isi a o tatou auauna atu i le ata lafoia o “Iesu o le Nasareta … o le sa femaliuai ma agalelei.”¹¹ E faamanuia i tatou e le Atua ia maua le olioli i le auauna atu i lo tatou Tama o i le Lagi a o tatou auauna atu i Lana fanau i le lalolagi.

Aoao Atu mai Lenei Savali

“O le a le faatagaina i tatou e [le Alii] ia toilalo pe afai e fai la tatou vaega. O le a ia faalauteleina i tatou e oo lava i tala atu o o tatou lava taleni ma tomai. … O se tasi o aafiaga sili ona tausaafia e mafai ona oo mai i se tagata” (Ezra Taft Benson, i le Aoao Atu, E Leai Se Isi Valaauga e Sili Ai [1999], 20). Mafaufau e faasoa atu se aafiaga i se taimi na e lagonaina ai po o se tasi e te iloaina sa lagonaina le faalauteleina e le Alii o ana taleni ma tomai. Valaaulia le aiga e faasoa mai nisi o o latou lava aafiaga lelei a o latou tali atu i le “valaau a le Faaola e auauna atu.”

O Keriso ma le Alii Mauoa Talavou, saunia e Heinrich Hofmann, faaaloaloga a le C. Harrison Conroy Co.; ata na tusia e Matthew Reier © IRI

Ata na pue i faaaloaloga a Wendy Bentley; ata na tusia e Beth M. Whittaker