O Le Faataitaiga a Lo’u Tina
Ata na tusia e Brian Call
Sa ou togiina i totonu o le masini fuluipu se ipu mafolafola ma tagi i le faalii.
“Erin, e mafai ona e alu i le pati e fai i le vaitaele,” o le tala lea a lo’u tama. “E mafai ona fai sau malologa.”
“E le o le mea lena!” Sa ou ee atu ai a’o o’u masau mai le potu.
O lo’u le fiafia e le o faatatau i le pati taele a Adriane. Sa mamai lou tina ma lou uso laitiiti o, Abby, i le niumonia. Sa ma tausia ma lou tama i laua i le vaiaso ua tuanai ma sa ma taumafai e faagaoioi mea uma i le fale e pei o le tulaga masani. O lona uiga o le kuka, teu le fale, fai le faatau, fai le tagamea, ma faatietie solo i le taavale isi ou uso e toalua.
Na faafilemu e nei mea uma lo’u tomumu popole ma le fefe. Sa ou popole i lo’u aiga ma lē mautonu i lo’u alu ese atu mo le kolisi i se taimi vave. Ma o lea sa ou galue punouai ai i taimi uma ma taumafai e aveese ou popolega. Sa oo lava lau fuafuaga i le faamisi o le pati a Adriane, aua sa ou le lava ma o le mafaufau atu i se po e malolo ai, ma tafafao ai ma uo i le vaitaele, na uunaia ou lagona e sopo atu i le tuaoi. Sa faapa atu lou ita ma oo atu lou le fiafia i lou tama.
Sa ou tagi mo sina taimi i totonu o lou potumoe. Ona, o le lagonaina o le tausalaina, sa ou alu ai i le fogafale i luga e vaai pe i ai se mea e mananao ai lou tina ma Abby. Sa ou mauaina atu lou tina o faaiunu fualaau a lo’u uso ua matua fiva lava. Sa tau le mafai ona manava lou tina ma sa faataotolia o ia i le moega mo le tele o aso. Sa ma uunaia ma lou tama o ia e toe alu e taoto. Sa ma fai atu ia te ia o le a ma tausia ia Abby. Sa lei faalogo o ia.
“O lea ua ou malosi. Fai sina lua moe,” o lana tala lea. “E manaomia au e Abby.”
Sa ou taumafai ia aua nei ou tagi ao ou vaai atu i lou tina o faamafanafana lou uso e 10 tausaga. Sa ia siakia lona fiva, fesoasoani e tuu o ia i le moega, ona tolotolo atu lea i totonu ia te ia ma taofi lona tino o loo tetete. Sa le toe oi Abby ma sa toafilemu i le puipuiga a lou tina.
Sa matuai ma’i lava lo’u tina. E oo lava ina ave o ia i le falemai mo le tele o aso ona o le niumonia. Ae i le ogatotonu o ona luitau, sa ia faagaloina ia lava. Nai lo le tomumu i lona lava ma’i, sa ia sailia se auala e faaitiiti ai tiga o lana tama teine.
Sa ou fuafuaina e ositaulaga i lena po e ala i le nofo i le fale e fesoasoani. Nai lo lena, sa ou lagona le ma e ala i lou ee ma sa lagona foi le faamaualalo ona o taga a lo’u tina. Sa ou matauina o ia, ma ou iloa ai e na te faia soo se mea e fesoasoani ai i lo’u uso faapea ma a’u.
Sa ou lagonaina lona alofa i lena po ma sa ou manao e mulimuli i lana faataitaiga. Sa tonu ia te au e faaali atu ia i latou ou te alofa i ai ma o le a ou i ai iina pe a latou manaomiaina au, e tusa lava pe manaomia ai se osigataulaga patino.