O Se Ositaulaga ae o se Fiafiaga
O lo’u manaoga e ave se misiona na toeitiiti lava a le taunuu ona ua ou fiafia i tupe sa ou mauaina.
Ina ua ono ou tausaga, sa feiloai lou tina i faifeautalai ma auai i le Ekalesia i Kana, Aferika. Sa tuua e lo’u tama o ia ma le fanau e toalima, ae sa fesoasoani aoaoga a le Ekalesia e faamalosia lo matou aiga. Sa matou fealofani ma sa i ai le filemu i totonu o lo matou aiga. Sa ou fiafia ma te o ma lo’u tina i le lotu ma fiafia e auai i vasega o le Peraimeri ma sosoo ai ma le seminare.
Ao avea o se alii talavou sa valaauina au o se faifeautalai a le uarota ma sa ou fiafia e talai faatasi ma faifeautalai faamisiona. Sa ou vaaia foi le o o nisi o alii talavou o la matou uarota i ni misiona. Ina ua latou foi mai, sa ese i latou. Ua sili atu lo latou aoaoina ma faatagata matutua, i le faaletino faapea ma le faaleagaga. Sa ave foi se misiona a lo’u uso matua. Ina ua ia foi mai, sa ou vaai i le tele o mea na faaleleia o lana amio. Sa ou fesili pea lava pea ia te au lava ia, “O le a se mea e uiga i le misiona ua matuai tele ai ni suiga ma le tuputupu ae o nei tagata uma?” Sa amata ona ou naunau e ave se misiona.
Ina ua maea la’u aoga maualuga, sa ou faigaluega e sefe se tupe mo se misiona. E lei umi ae ua leai so’u manaoga e ave se misiona ona ua ou fiafia i tupe sa ou mauaina. O le a avea ma se ositaulaga le alu i se misiona aua sa fesoasoani le tupe sa ou mauaina e tausi ai lo’u aiga. O taimi uma lava e amata ai ona faatumu au pepa o le misiona, ou te mafaufau ai i le tupe o le a ou le toe mauaina, ma faapea ai ona tuuese au pepa ae faaauau pea ona ou faigaluega.
Ao o a’u uo i ni misiona, sa le lelei ni ou faalogoga aua sa ou iloa ua tatau foi ona ou sauni e alu. O lenei mea sa mafua ai ona ou tilotilo ia te au lava ia. Sa ou mafaufau, “O le lagolagoina o le perofeta ma ou taitai e le na o le siiina o lo’u lima taumatau. O le faia o mea latou te fai mai ai ma usitai i poloaiga a le Tama Faalelagi.”
O le taimi lenei e ave ai se misiona, ma o lea sa ou tuuina atu loa au pepa o le misiona i le epikopo. O se aso lona lua sili lea ona ou fiafia i ai i lou olaga. O le aso sili ona ou fiafia i ai o le aso lea na valaauina ai au e lo’u epikopo i lona ofisa ma tuu mai ia te au se teutusi lanu paepae ma lo’u valaauga o le misiona i le Misiona a Nigeria Ibadan. Sa tumu lo’u loto i le fiafia.
O totonu o le nofoaga autu e aoao ai faifeautalai, sa ou faamasani atili ai i aoaoga faavae o le talalelei ma aoaoina ni mea matagofie. Sa mafai foi ona maua lo’u faaeega paia o le malumalu. Ou te matua faafetai mo la’u filifiliga e sau i le misiona, ma ou te le o lagonaina ai lava se faanoanoa. Ua ou tuputupu ae foi faaleagaga i lau misiona. Ou te talitonu ona o loo ou fesoasoani i tagata ina ia maua ia faamanuiaga o le talalelei lea ua ou maua ai le tele o le fiafia faatasi ai ma lo’u aiga.
Ata pue mai le faaaloaloga a Edward M. Akosah