O Le Mea Tatou Te Talitonu I Ai

O Le Faamanatuga Manatuaina o le Faaola

O le faamanatuga o se sauniga paia faaleperisitua e faatinoina i Aso Sa taitasi. Sa faavaeina e Iesu Keriso lenei sauniga a o i ai o Ia i lenei lalolagi ma toefuatai mai ai i o tatou aso e ala mai i le Perofeta o Iosefa Samita. “O le sauniga o le faamanatuga,” sa saunoa mai ai Elder Dallin H. Oaks o le Korama a Aposetolo e Toasefululua, “ua mafua ai ona avea le sauniga faamanatuga ma sauniga aupito sili ona paia ma taua i le Ekalesia,”¹

Ua poloaiina i tatou e le Alii ina ia tatou potopoto faatasi ma aai i le faamanatuga i Aso Sa taitasi (tagai i le MF&F 20:75). E faamanuia e e o loo umia le Perisitua Arona ma tufatufa atu le areto ma le vai i tagata o le faapotopotoga, o e e tagofia le faamanatuga e faamanatu ai le tino ma le toto o Iesu Keriso. O le faia o lea mea, latou te toe tautino atu ai e ola i feagaiga sa latou osia ma le Atua ina ua papatisoina i latou. Ae patino lava, latou te folafola atu e manatua pea Iesu Keriso, ia ave i o latou luga Lona suafa, ma tausia Ana poloaiga (tagai i le MF&F 20:77).

O sauniuniga talafeagai e aai ai i le faamanatuga e aofia ai le salamo, se manao e mulimuli i le Faaola, ma le mauaina o se “loto momomo ma le agaga salamo” (3 Nifae 9:20). O le tagofia o le faamanatuga o se avanoa faalevaiaso lea mo le suesueina o le tagata o ia lava ma le toe tuuto atu. E faaleleia e le migao ma le tatalo le aafiaga. O tagata e faia ni agasala matuia e le tatau ona taumamafa i le faamanatuga sei vagana ua latou salamo, e aofia ai le ta’uta’u atu i lo latou epikopo po o le peresitene o le paranesi (tagai i le 3 Nifae 18:28–30).

O le taumafa ma le agavaa i le faamanatuga e aumai ai faamanuiaga sili, e pei o le faamagaloga o agasala, le mafutaga ma le Agaga Paia, ma le faamamaina—o le faapaiaina lea—e ala i le Togiola.

1. Sa faavaeina e Iesu Keriso le faamanatuga faatasi ma Ana Aposetolo e Toasefululua i le po a o lumanai Lona Faasatauroga (tagai i le Luka 22:19–20).

2. Ina ua mavae Lona Toetu mai, sa faavaeina e le Faaola le faamanatuga i Amerika (tagai i le 3 Nifae 18:1–11).

3. E saunia, faamanuia, ma tufatufa atu e e o loo umia le Perisitua Arona le faamanatuga i lalo o le taitaiga a le epikopo po o le peresitene o le paranesi.

4. I le taimi o le sauniga o le faamanatuga, tatou te gauai atu ai i tapuaiga ma aloese mai amioga ia e faalavelave ai i isi.

5. Tatou te manatuaina le soifuaga o le Faaola, faataitaiga, aoaoga, ma le Togiola a o tatou tagofia ma le migao le faamanatuga.

Faamatalaga

1. Dallin H. Oaks, “Sauniga Faamanatuga ma le Faamanatuga,” Liahona, Nov. 2008, 17.

Mo nisi faamatalaga, tagai i le 1 Korinito 11:23–30; Mataupu Faavae ma Feagaiga 27:2.

“Tatou te faailoa atu tatou te faia uma ni mea sese. E tofu i tatou taitoatasi ma se manaoga e ta’uta’u atu ma lafoai a tatou agasala ma mea sese i lo tatou Tama Faalelagi ma i isi ua tatou faatiga i ai. Ua tatou maua i le Sapati se avanoa taua e ofo atu ai—a tatou faamanatuga—i le Alii.”

Elder L. Tom Perry o le Korama a Aposetolo e Toasefululua, “O Le Sapati ma le Faamanatuga,” Liahona, Me 2011, 8.

Taliina o Fesili

E ono tuufesili i latou e le masani i a tatou sauniga o le Aso Sa pe mafai e i latou o isi faatuatuaga ona auai i a tatou sauniga tapuai ma taumamafa i le faamanatuga. E taliaina tagata uma e auai i le lotu faatasi ma i tatou. Ua faamoemoe e fesoasoani le faamanatuga i tagata e faafou ai a latou feagaiga, ae afai o le taumafa i le faamanatuga e fesoasoani ai i tagata asiasi e tapuai, e taliaina lo latou faia o lena mea.

Lalo ifo: O Le Tausamaaga Mulimuli, saunia e Simon Dewey; taumatau: O Le Tausamaaga Mulimuli, saunia e Carl Heinrich Bloch, ua faaaoga ina ua faatagaina e le National Historic Museum i Frederiksborg i Hillerød, Tenimaka, e le mafai ona kopiina; ata na vali e Del Parson; ata na tusia e Edwin Redrino, Robert Milne, ma Christina Smith