E Faapefea Ona Ou Iloa Ua Faamagaloina A’u?
Ao ou galue o se peresitene o le misiona, e masani lava ona fai mai e faifeautalai ia fesili nei e lua: (1) E faapefea ona ou iloa ua faamagaloina au agasala? ma le (2) Afai ua faamagaloina au, aisea ou te lagonaina ai pea le tausalaina?
Pe a fai mai na fesili, e masani lava ona ou tali atu faapea, “Afai e te lagonaina le Agaga—pe a e tatalo, faitau i tusitusiga paia, aoao atu, molimau atu, po o soo se isi lava taimi—o lona uiga o lau molimau lena ua faamagaloina oe po o, i se isi itu, ua faataunuu le faasologa o le faamama, aua e le nofo le Agaga i totonu o se tapeneko eleelea” (tagai i le Alema 7:21). O le tele lava o tulaga e fai sina umi o le faagasologa o le faamamaina ona e fai foi sina umi o le suia o o tatou loto, ae i sina taimi puupuu, e mafai ona tatou agai i luma ma le mautinoa ua talia e le Atua lo tatou alualu i luma e pei ona faaalia i le auai mai o Lona Agaga.
Ata na tusia e Scott Snow
O nisi o tagata ua sili atu lo latou faatiga ia i latou lava nai lo le Alii. E moni, e tatau ona tatou salamo ina ia agavaa ai mo mana faamama ma faamagalo a le Togiola, ae o le taimi lava tatou te salamo ai, e leai se mea e igoa o se tagata salamo pulepule i le malo o le Atua. E leai se faailoga lanu uliuli i o tatou tapuvae taumatau o loo fai mai “agasala o le 2008” po o se pisia lanu enaena o i tua o o tatou taliga tauagavale o loo fai mai “solitulafono o le 2010”. Ua tautinoa mai e le Alii le mana faamama atoatoa o le Togiola ina ua Ia fetalai mai, “E ui lava ina pei o ofu mumu a outou agasala, e sisina ia e pei o le kiona” (Isaia 1:18). O le vavega lena o le Togiola a Iesu Keriso.
Ou te talitonu o nisi taimi ua uma ona faamamaina a tatou agasala ao lei aluese le lagona tausalaina. Aisea e tupu ai lena mea? Atonu ona o le alofa tunoa o le Atua, o le manatua o lena lagona tausalaina o se lapataiga, o se “faailoilo o le taofi” faaleagaga lea e alaga mai pe a tatou fetaiai ma faaosoosoga: “Aua e te asaina lena auala. E te iloaina le tiga e oo mai ai.” Atonu mo i latou o loo i le faagasologa o le salamo, o le faamoemoega lava ina ia avea ma se puipuiga, ae le o se faasalaga.
Pe o le a aluese ea lo tatou lagona tausalaina? E mautu lava le folafolaga a le Alii i lena tulaga. Mo e amiotonu, ua fetalai mai i ai le Alii o le a i ai le taimi o le a “leai foi se toe … faanoanoa, po o se aue, e leai foi se toe puapuaga: aua ua mavae atu mea muamua” (Faaaliga 21:4; faaopoopo le faamamafa).
Ou te le iloa pe o le a tatou faagaloina a tatou agasala, ae o le a oo mai le taimi o le a le toe faatiga ai i latou o e ua salamo e a latou agasala. E faapena foi le mea na tupu ia Enosa, o le “sa tafi ese ai lo’u lagona o o’u sese” (Enosa 1:6), ma tagata sa Lamana na liua, o e na molimau ua “aveese le lagona sala mai i o tatou loto” e le Alii (Alema 24:10), faapea foi ma Alema, o le na alaga, “sa ou le toe manatuaina o’u tiga” (Alema 36:19; faaopoopo le faamamafa). Na mautinoa lava sa latou manatuaina uma a latou agasala, ae peitai e le i toe faatiga ia i latou. Sa faamalolo faavavega e le mana lē iu o le Togiola manua uma ma faatoafilemuina mafaufau uma ma le “manuia foi mai le Atua, o loo silisili lava i mea uma e manatu i ai” (Filipi 4:7).
E foliga mai e lua tulaga o le a faasaolotoina i tatou mai le tausalaina ma le tiga uma. O le mea muamua o lo tatou faatuatua le maluelue lea ia Iesu Keriso ma Lana Togiola. Ina ua fesili Enosa pe na faapefea ona “tafi ese” lona lagona tausalaina (tagai i le Enosa 1:6–7), sa tali mai ai le Alii, “Ona o lou faatuatua ia Keriso” (Enosa 1:8). Ma o lea, o le tele o lo tatou aoao e uiga i le Togiola ma faatino le faatuatua i mana faamalolo a Keriso, o le tele foi lea o lo tatou gafatia ina ia faamagaloina ma faamagalo i tatou lava. Lona lua o le atiina ae lea o se uiga e “le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Pe a tupu lenei mea, tatou te le toe vaaia lo tatou “tulaga faaletino” (Mosaea 4:2) ae o ni atalii ma afafine faaleagaga o le Atua. Ua tatou iloa ua ese i tatou mai le tagata na agasala. O Scrooge, o se tagata e le mo’i tautaua a Charles Dickens i le A Christmas Carol, lea na suia lona olaga ma mafai ona ai ona ia folafola mai ma le faamoni, “Ua le o toe avea a’u ma tagata sa ou i ai muamua.”1
Pe a tatou salamo, ua avea i tatou ma se tagata ese nai lo le mea sa tatou i ai. O le a fesoasoani le iloaina o lo tatou faasinomaga fou, faatasi ai ma lo tatou faatuatua i mana faamama o Keriso, tatou te ausia ai le tulaga lea e mafai ona tatou faapea ifo ai e pei ona fai mai Alema, “Sa ou le toe manatuaina o’u tiga; ioe, sa ou le toe laga atuatuvaleina au i le manatuaina o au agasala” (Alema 36:19). Ma o lea la, ua mafai ona faamafanafanaina i tatou e le upumoni faapea o le a iu ina faamasinoina i tatou e le Atua e ala i le tulaga o le a avea ai i tatou, a e le o le tulaga sa tatou i ai.
Sa tuu mai e le Aposetolo o Paulo ni fautuaga aoga mo i tatou uma lava o e ua agasala ae o loo taumafai ina ia salamo. Fai mai o ia e ao ona tatou “le faagalogalo i mea ua tuanai, ou te momoe punou ai foi i mea o lumanai” (Filipi 3:13). I se isi faaupuga, ua tatau ona tatou faagaloina mea ua tuanai ma fetaomi atu i luma, ma faalagolago i le mana togiola a le Atua. O sea ituaiga taumafaiga i la tatou vaega o se faatinoga lea o le faatuatua. Sa faaauau pea ona fautua mai Paulo, “Amuia le ua le faasalaina o ia e ia” (Roma 14:22).
I le taimi nei, seiloga ua aveesea lena matāūa o le lagona tausalaina, afai tatou te lagonaina le Agaga o le Alii ua mafai loa ona tatou agai i luma ma le lototele ma faapea ifo ua faamamaina i tatou pe faapea foi o loo galueaina e le tulaga o le faamama se vavega paia i o tatou olaga. Ua mautinoa le folafolaga—afai tatou te faia le mea sili ina ia salamo, o le a faamamaina a tatou agasala ma o le a iu lava ina tafi ese o tatou sese, aua e le gata ina o’o ifo le Togiola a le Faaola i lalo o a tatou agasala ae faapea foi ma o tatou sese po o lagona tausalaina. Ma o le a lagonaina e i tatou lava le filemu atoatoa ma i tatou lava faapea ma le Atua.