Tagai i le Itulau Mulimuli

Natalia Shcherbakova, Iukureini, e pei ona faamatalaina ai e Pavlyna Ubyiko

Ina ua ou auai i le Ekalesia, sa ou naunau lava ia auai i galuega o talafaasolopito o aiga. Sa amata ona ou asiasi i mea sa teumalu ai faamaumauga i le lotoifale e saili ai ni faamatalaga o ou augatama i faamaumauga faitele.

Sa ou mauaina ai le faamalieina o le galuega, ae sa le i faigofie i taimi uma. O le tusilima tuai sa tele ina faigata ona faitau, ma o nisi tusi sa limulimua, lea sa oso ai lo’u sela. Ae, sa faaauau pea ona ou sailiili i le mea sili sa ou mafaia.

I se tasi aso a o o’u sailiili e uiga i lo’u tama matua, sa saili lona aso fanau. Sa ou maua ai se tusi e 1,500 ia itulau lea atonu e aoga. Ae a pe afai ou te le mauaina ia tali sa ou manaomia? Sa ou faaatu e suesue i isi tusi lapopoa ma le pefua.

Sa amata ona faatopetope la’u vaai i anotusi o tusi, ma le faamoemoe o le a ou vaaia se igoa ou te masani ai. Na faafuasei, ona ou manatu sa ou faalogo atu o faapea mai se tagata, “O le itulau mulimuli.” Sa ou fetilofai solo, ae e le i foliga mai sa tautala mai se isi ia te au. Sa ou toe faaauau ma faitau le tele o isi itulau. Ona ou toe faalogoina foi lea o ia lava upu: “O le itulau mulimuli.” Sa ou tau le mautonu, ma filifili ai e siaki le itulau mulimuli. Sa ou maua le tusiga lea e masani ona tusia ai iina: O se aotelega o tamaiti na fananau ma le aofaiga atoa o itulau. Sa fai pea, sa ou siakia le itulau e sosoo ma le itulau mulimuli ae leai se mea na maua ai iina e aoga, o lea na ou toe susue ai i tua i le itulau sa ou faitaua muamua.

Sa vave ona toe faalavelaveina foi ou manatu e le leo malu ae pulunaunau: “O le itulau mulimuli!” Sa ou filifili e toe taumafai tasi i le itulau mulimuli ma faitau le tusiga e masani ai mo ni nai taimi.

Ona ou matauina lea o se mea sa misi ia au muamua: o se itulau faaopoopo o loo faapipii i totonu o le faavaa pito i tua. A o ou faitaua le tusilima o loo osiosi i le itulau atoa, sa ou vaaia ai ni igoa o tamaiti na fananau e latalata i le faaiuga o Tesema. O iina sa ou iloa ai le igoa o lo’u tama matua ma vaaia ai o loo tau mai ai le nofoaga ma le taimi na fanau ma papatiso ai. Sa ou maofa ae sa faatumulia i le lotofaafetai ona ua taitai atu au i le faamatalaga sa ou manaomia.

E i ai taimi e mafai ona luitauina ai ia talafaasolopito o aiga, ae ou te iloa e taiala ma fesoasoani mai le Atua ia i tatou i a tatou taumafaiga.

Sa amata ona faatopetope la’u vaai i anotusi o tusi, ma le faamoemoe o le a ou vaaia se igoa ou te masani ai.