Ko ha Feilaulau ka ko ha Fiefia
Naʻe meimei mole ʻeku holi ke ngāue fakafaifekaú koeʻuhi ko ʻeku fiefia ʻi he paʻanga naʻá ku ngāueʻí.
Naʻe fetaulaki ʻeku faʻeé mo e kau faifekaú ʻi hoku taʻu onó, pea naʻá ne kau ki he Siasí ʻi Kana, ʻAfilika. Naʻe liʻaki ia mo ha fānau ʻe toko nima ʻe heʻeku tamaí, ka naʻe tokoni e ngaahi akonaki ʻa e Siasí ke ne tauhi lelei homau fāmilí. Naʻa mau feʻofoʻofani pea maʻu ʻa e melinó ʻi homau ʻapí. Naʻá ku saiʻia ke ʻalu mo ʻeku faʻeé ki he lotú peá u saiʻia ʻi he maʻu kalasi he Palaimelí pea hoko atu ai pē ki he seminelí.
Naʻe uiuiʻi au ʻi heʻeku kei talavoú ke u hoko ko ha faifekau fakauooti peá u fiefia ʻi he malanga mo e kau faifekaú. Naʻá ku mamata foki ki he ʻalu ha niʻihi ʻo e kau talavou ʻi homau uootí ʻo ngāue fakafaifekaú. Naʻa nau makehe he taimi naʻa nau foki mai aí. Naʻa nau poto mo matuʻotuʻa ange, fakatuʻasino mo fakalaumālie fakatouʻosi. Naʻe ngāue fakafaifekau foki hoku taʻoketé. ʻI he taimi naʻá ne foki mai aí, naʻá ku sio ki he ngaahi fakalakalaka lahi ʻi hono ʻulungāngá. Naʻá ku toutou fehuʻi loto pē, “Ko e hā ha meʻa ʻokú ne ngaohi ʻa e kakai ko ʻeni ʻi he ngāue fakafaifekaú ke nau liliu mo tupulaki lahí?” Naʻe kamata ke u vēkeveke ke ʻalu ʻo ngāue fakafaifekau.
Naʻá ku ngāue ke tānaki ha paʻanga feʻunga ki heʻeku ngāue fakafaifekaú, hili ʻeku ʻosi mei he ako māʻolungá. Taimi nounou mei ai ne kamata ke mole ʻeku fakaʻamu ke ngāue fakafaifekaú koeʻuhí naʻá ku fuʻu fiefia ʻi he paʻanga naʻá ku ngāueʻí. ʻE hoko ʻeku ʻalu ʻo ngāue fakafaifekaú ko ha feilaulau lahi koeʻuhí he naʻe tokoni e paʻanga naʻá ku ngāueʻí ki hono tauhi hoku fāmilí. Ko e taimi kotoa pē ne u kamata fakafonu ai e ngaahi foomu ngāue fakafaifekaú, naʻá ku fakakaukau ki he paʻanga ʻe molé, peá u liʻaki leva e fōmú kae hoko atu pē ʻa e ngāué.
Naʻá ku ongoʻi tautea ʻi he ʻalu hoku ngaahi kaungāmeʻá ʻo ngāue fakafaifekaú, he naʻá ku ʻiloʻi naʻe totonu ke u teuteu foki ke u ʻalu. Naʻe hanga ʻe he meʻá ni ‘o ‘ai ke u toe vakavakaiʻi ʻeku moʻuí. Naʻá ku fakakaukau, “ʻOku ʻikai ke u poupouʻi pē e palōfitá mo e kau takí ʻi hono hiki hake hoku nima toʻomataʻú. Ka ‘i hono fai ʻo e meʻa ʻoku nau talamaí mo talangofua ki he ngaahi fekau ʻa ‘etau Tamai Hēvaní.”
Ko e taimí pē ʻeni ke u ngāue fakafaifekau aí, ko ia naʻá ku fakahū ʻeku pepa ngāue fakafaifekaú ki he pīsopé. Ko e ʻaho fakafiefia taha ia hono ua ‘o ʻeku moʻuí. Ko e ʻaho fakafiefia tahá ʻa e ʻaho naʻe ui ai au ʻe he pīsopé ki hono ʻōfisí peá ne ʻomai ha sila hinehina ʻa ia ʻoku ʻi loto hoku uiuiʻí ke u ngāue ʻi he Misiona Naisīlia ʻIpataní. Naʻá ku fiefia ʻaupito.
Naʻá ku toe ʻilo lahi ange pea ako ha ngaahi meʻa fakaofo ki he ngaahi tokāteline ʻo e ongoongoleleí ʻi he senitā akoʻanga fakafaifekaú. Naʻe lava foki ke maʻu hoku ʻenitaumení ʻi he temipalé. ʻOku ou houngaʻia koeʻuhí ko ʻeku fili ke u ʻalu ʻo ngāue fakafaifekaú, pea kuo ʻikai pē ke u fakaʻiseʻisa ai. Kuó u tupulaki fakalaumālie foki ʻi he ngāue fakafaifekaú. ʻOku ou tui ʻoku hoko ʻeni ko ʻeku tokoniʻi e kakaí ke maʻu ʻa e ngaahi tāpuaki tatau ʻo e ongoongoleleí kuó ne ʻomi ha fiefia lahi kiate au mo hoku fāmilí.
Fakaʻaongaʻi e taá ʻi he angalelei ʻa Edward M. Akosah