Pe Le Mafai Ona Papatiso Foi ma Au?
“Ma ia papatisoina a latou fanau mo le faamagaloina o a latou agasala pe a valu tausaga le matutua” (MF&F 68:27).
“Nuno ma Miriama, pe o le a oulua mulimuli ea i le faataitaiga a Iesu Keriso ma papatiso i le Aso Toonai a sau?” Na fesili ai Sister Silva.
Na le mafai ona talitonu taliga o Paulo. O lea faatoa valaaulia lava e faifeautalai tamaitai lona uso ma lona tuafafine e tai 10-tausaga e papatiso!
“Ioe! Ioe. le tala fiafia a le masaga.
Na le mafai ona taofi le ataata a Miriama. Na po atu le lima o Nuno i le lima o Sister Lopesa. Na sagisagi fiafia mai Tinamatua mai lona nofoa lapoa mumu i le tulimanu.
Na aoaoina e faifeautalai tamaitai ia Paulo ma ona tei mo ni nai vaiaso i le fale o Tinamatua e i le motu lanu lauvao, ma savili o São Miguel, e 1,000 maila (1,600 km) le mamao mai le atunuu autu o Potukale. Na fiafia Paulo e tatala le afa i luga o le faitotoa i luma a Tinamatua ma lagonaina le savili o le sami ao ia vaavaai atu ia Sister Lopesa ma Sister Siliva o savavali mai i luga o le auala e aoao o ia e uiga i le talalelei.
Na fai mai faifeautalai tamaitai o nei o le a fai ai se lesona faapitoa. O lea la ua iloa e Paulo le mafuaaga. O le a papatisoina Nuno ma Miriama, e pei lava ona aoaoina e Iesu! Na manao foi Paulo e mulimuli i le faataitaiga a le Faaola.
“Sister, e mafai ona ou papatiso foi i le Aso Toonai lea?” na ia fesili atu ma le naunau, ao taofimau lana Tusi a Mamona.
Na ataata mai Sister Siliva ae na lulu lona ulu. “Ou te faamalie atu, Paulo. Na tau mai e le Alii ia i tatou e manaomia e i tatou uma ona papatisoina ae sei vagana ua atoa le valu tausaga. Ona na o le ono ou tausaga, e lei oo i le taimi e te tali atu ai oe lava mo au filifiliga.”
“Ae, tuafafine,” le tetee atu a Paulo, “Sa ou tatalo ma faitau faatasi ma lo’u aiga le Tusi a Mamona, e pei ona oulua aoaoina ai au. Ou te alu i le Peraimeri i vaiaso uma faatasi ma Tinamatua ma Uncle Mário. Ou te iloa e moni le Ekalesia.”Pe le mafai ona matou papatiso faatasi ma Nuno ma Miriama?”
“Ua lelei tele le mea ua e faia o le tausia o poloaiga ma aoao e uiga i le talalelei,” na fai atu ai Sister Lopesa. “Ae peitai e manaomia pea lou faatali mo le isi lua tausaga ona faatoa e papatiso lea.”
Na amata ona vevela le fa’a’i o Paulo, ma na faatumuina ona mata i loimata. Na ia oso i luga ma tamoe i lona potu i le falealuga, lea e momoe ai ma ona tei.
Ina ua uma lona tagi i lona aluga mo ni nai minute, na faalogoina e Paulo se tagata o ae mai i luga o le fale. Na nofo ifo i lalo Uncle Mário i le moega o Paulo.
“O le a le mea ua tupu, Paulo?” Le fesili a Uncle Mário.
“Na fai mai Sister Siliva ma Sister Lopesa e le mafai ona ou papatiso, ae mafai ona papatiso Nuno ma Miriama,” le tala a Paulo. “Ou te fia avea ma tagata o le Ekalesia! Ou te fiafia e usu pese i le lotu faamanatuga ma aoao tusitusiga paia i le Peraimeri. Ou te le fia faatali.”
“Paulo, e mafai pea ona avea oe ma se vaega o le Ekalesia, e tusa lava pe lei lava lou matua e papatiso ai,” le tala filemu a Uncle Mário.
“E faapefea?” Na manavanava Paulo i lona aluga.
“Ia, ua e iloa o loo saunia e le Peraimeri le polokalama mo le lotu faamanatuga,” na fai atu ai Uncle Mário. “Na tau mai e lou faiaoga o le Peraimeri o loo ia sailia nisi e ofo mai e fai a latou molimau i le polokalama. O le tasi auala lena e mafai ai ona e auai i le ekalesia,” o le faamalamalama atu lea a Uncle Mário.
“E mo’i?” Na nofo i luga Paulo ma faasaga atu i le uso o lona tama. Na ia mafaufau mo sina taimi. “Masalo e mafai foi ona fai lau molimau i le papatisoga o Nuno ma Miriama!”
“O se manatu manaia tele lena!” Na fai mai ai Uncle Mário. “E tusa lava pe e te laitiiti tele e papatiso, e mafai lava ona maua sau molimau.”
Na oso ese Paulo mai lona moega ma faatopetope agai i lalo o le fale.
“O fea a e alu i ai, Paulo?” Le valaau a Uncle Mário.
“Ou te alu e faataitai le faiga o lau molimau i faifeautalai!” Le toe valaau fiafia mai a Paulo “O le a ou faasoaina atu lau molimau ao faatali lou papatisoga!”
Ata na tusia e Jared Beckstrand